ក្រសួងអប់រំ យុវជន និងកីឡា បានប្រកាសដាក់ឱ្យអនុវត្តជាផ្លូវការ កញ្ចប់សម្ភារអំណានថ្នាក់ទី៣ នៃកម្មវិធីកុមាររៀនកុមារចេះ ដើម្បីផ្តល់ជំនាញមូលដ្ឋានគ្រឹះដល់សិស្សថ្នាក់ទី៣។ លោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ បានប្រកាសឱ្យអនុវត្តជាផ្លូវការនេះ ធ្វើឡើងនៅថ្ងៃទី១៧ ខែឧសភា ឆ្នាំ២០២៤ នៅសាលាបឋមសិក្សាច្រេស ស្រុកកំពង់ត្រឡាច ខេត្តកំពង់ឆ្នាំង។
បើតាមសេចក្តីប្រកាសព័ត៌មានរបស់ គម្រោងអប់រំបរិយាបន្ននៅបឋមសិក្សា (IPEA) បញ្ជាក់ថា ការដាក់ឱ្យប្រើប្រាស់កញ្ចប់អំណាននេះ នឹងក្លាយជាទុននៅក្នុងដំណើរការរៀនសូត្ររបស់កុមារ ហើយ ក៏ជាព្រឹត្តិការណ៍ដ៏សំខាន់មួយ ក្នុងការលើកកម្ពស់ការអប់រំកម្រិតថ្នាក់ដំបូង នៅបឋមសិក្សានៅកម្ពុជាដែរ។
កញ្ចប់សម្ភារអំណាន និងវិធីសាស្ត្របង្រៀនថ្នាក់ទី៣ រួមបញ្ចូលទាំងសម្ភារសិក្សាស្របតាមអាយុសិស្ស និងសៀវភៅណែនាំសម្រាប់គ្រូ ត្រូវបានបង្កើតឡើងស្របទៅនឹងកម្មវិធីសិក្សាជាតិ ក្រោមកិច្ចសហការរវាងក្រសួងអប់រំ និងគម្រោងអប់រំបរិយាបន្ននៅបឋមសិក្សា (IPEA) ដែលទទួលបាន មូលនិធិពីទីភ្នាក់ងារជំនួយអាមេរិក (USAID)។ កញ្ចប់សម្ភារអំណាននេះ ត្រូវបានរៀបចំដោយផ្អែកលើ វិធីសាស្ត្រជោគជ័យ ដែលបានបង្កើតឡើង និងអនុវត្តនៅកម្រិតថ្នាក់ទី១ និងថ្នាក់ទី២ ដោយមានការគាំទ្រពី USAID ចាប់តាំងពីឆ្នាំ២០១៧។ នេះបើតាមសេចក្តីប្រកាសព័ត៌មានដដែល។
លោកស្រី Kerry Pelzman នាយិកាបេសកកម្មរបស់ USAID បានលើកឡើងថា ការប្រកាសដាក់ឱ្យអនុវត្តន៍កញ្ចប់សម្ភារអំណានថ្នាក់ទី៣ ជាសក្ខីភាពមួយបង្ហាញពីកិច្ចខិតខំប្រឹងប្រែងរួមគ្នា រវាងគម្រោងអប់រំបរិយាបន្ននៅបឋមសិក្សា នៃទីភ្នាក់ងារជំនួយសហរដ្ឋអាមេរិក USAID និងក្រសួងអប់រំ។ សម្រាប់លោកស្រី Kerry Pelzman ព្រឹត្ដិការណ៍ដ៏សំខាន់នេះ គូសបញ្ជាក់ពីការប្តេជ្ញាចិត្តរបស់ USAID ក្នុងការធ្វើឱ្យប្រសើរឡើង នូវការអប់រំកម្រិតថ្នាក់ដំបូងនៃបឋមសិក្សានៅកម្ពុជា និងផ្តល់នូវបំណិនអាន និងសរសេរ ដល់សិស្សថ្នាក់ទី៣ ដើម្បីទទួលបានជោគជ័យក្នុងការសិក្សា។
លទ្ធផលតេស្តរង្វាយតម្លៃអំណានថ្នាក់ដំបូង ដែលគាំទ្រដោយ USAID បានបង្ហាញពីការរីកចម្រើនគួរឱ្យកត់សម្គាល់ ក្នុងរយៈពេលតែមួយឆ្នាំ ក្នុងចំណោមសិស្សថ្នាក់ទី៣ នៅតាមសាលារៀន ដែលបានអនុវត្តកម្មវិធីកុមាររៀនកុមារចេះ បើប្រៀបធៀបទៅនឹងសិស្សក្នុងសាលារៀនដែលមិនបានទទួលអន្តរាគមន៍។ ល្បឿនអំណានជាមធ្យមរបស់សិស្សថ្នាក់ទី៣ បានកើនឡើងពី៣២ ទៅ៥០ពាក្យ ក្នុងមួយនាទី ខណៈដែលពិន្ទុនៃការអានយល់ន័យរបស់សិស្ស ដែលបានបញ្ចប់រង្វាយតម្លៃនេះ កើនឡើងជិត ទ្វេដងពី ៣២ ទៅ ៥៧ភាគរយ។
លោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យល់ឃើញថា កំណើជិតទ្វេដងនៃការអានយល់ន័យរបស់សិស្ស នៅគ្រប់សាលាបឋមសិក្សានៅខេត្តកំពង់ឆ្នាំង បន្ទាប់ពីការអនុវត្តកញ្ចប់សម្ភារៈអំណានថ្នាក់ទី៣ បានបង្ហាញពីការប្ដេជ្ញាចិត្ត ក្នុងការជំរុញឱ្យមានការធានាបានគុណភាពនៃការអប់រំនៅកម្ពុជា។
«ក្រសួងសូមប្រកាសដាក់ឱ្យអនុវត្តកញ្ចប់សម្ភារៈអំណាន ដែលមានភស្តុតាងបញ្ជាក់ពីប្រសិទ្ធភាពនេះ ជាផ្លូវការនៅទូទាំងប្រទេស ចាប់ពីពេលនេះតទៅ សម្រាប់ជាប្រយោជន៍ដល់ការសិក្សារបស់សិស្សថ្នាក់ទី៣ ទាំងអស់នៅកម្ពុជា»។ នេះជាប្រសាសន៍របស់រដ្ឋមន្ត្រីក្រសួងអប់រំ នៅក្នុងសេចក្តីប្រកាសព័ត៌មានរបស់ IPEA។
នៅឆ្នាំ២០២៣ USAID តាមរយៈគម្រោងអប់រំបរិយាបន្ននៅបឋមសិក្សា (IPEA) បានបណ្តុះបណ្តាលគ្រូបង្រៀនប្រមាណ ៣ ០០០នាក់ លើវិធីសាស្រ្តបង្រៀនអំណានថ្នាក់ដំបូង ដែលជាវិធីសាស្ត្របង្រៀនថ្មី និងផ្តល់អត្ថប្រយោជន៍ដល់សិស្សថ្នាក់ទី១ ដល់ថ្នាក់ទី៣ ប្រមាណ ៩០ ០០០នាក់។ ផ្អែកលើសមិទ្ធផលទាំងនេះ USAID នឹងបន្តគាំទ្រក្រសួងអប់រំ ពង្រីកវិសាលភាពនៃការអនុវត្តអំណានកម្រិតថ្នាក់ដំបូង និងពង្រឹងអភិបាលកិច្ចសាលារៀនបឋមសិក្សាទូទាំងប្រទេសបន្ថែមទៀត នាពេលអនាគត៕