អន្តរជាតិ
កម្ពុជាបន្តការពារខ្លួននៅប្រទេសជប៉ុនថា ព្រែកជីកហ្វូណន និងកំពង់ផែរាម មិនមានពាក់ព័ន្ធចិន ![ឧបនាយករដ្ឋមន្ត្រីកម្ពុជា ស៊ុន ចាន់ថុល ក្នុងជំនួបជាមួយ លោក Tsuyosi Hasabe ប្រធានក្រុមហ៊ុន Nikkei នៅថ្ងៃទី២៣ ខែឧសភា។ រូបភាព Facebook_Chanthol Sun DPM](https://image.thmeythmey.com/pictures/2024/05/23/1111.jpg)
ឧបនាយករដ្ឋមន្ត្រីកម្ពុជា ស៊ុន ចាន់ថុល ក្នុងជំនួបជាមួយ លោក Tsuyosi Hasabe ប្រធានក្រុមហ៊ុន Nikkei នៅថ្ងៃទី២៣ ខែឧសភា។ រូបភាព Facebook_Chanthol Sun DPM
×![]()
នៅលើទឹកដីជប៉ុន ឧបនាយករដ្ឋមន្ត្រីកម្ពុជា លោក ស៊ុន ចាន់ថុល បានបញ្ជាក់ឡើងវិញប្រាប់មេដឹកនាំក្នុងតំបន់អាស៊ី ទាំងរឿងព្រែកជីកហ្វូណនតេជោ និងទាំងរឿងកំពង់ផែរាម មិនមានពាក់ព័ន្ធនឹងផលប្រយោជន៍នៃរដ្ឋាភិបាលបរទេសណាមួយឡើយ។
សំណុំរឿងចាស់កំពង់ផែរាម និងសំណុំរឿងថ្មី ព្រែកជីកហ្វូណនរបស់កម្ពុជា នៅតែជាប្រធានបទក្ដៅនៅក្នុងវេទិកាអន្តរជាតិ ដែលកម្ពុជាត្រូវពន្យល់ និងការពារ។ នៅក្នុងវេទិកាប្រចាំឆ្នាំ The Future of Asia 2024 ដែលត្រូវបានរៀបចំដោយសារព័ត៌មាន Nikkei Asia នៅថ្ងៃទី២៣ ខែឧសភា នៅក្នុងប្រទេសជប៉ុន លោក ស៊ុន ចាន់ថុល បានច្រានចោលការចោទប្រកាន់ដដែល ដែលថា កំពង់ផែរាមនៅក្នុងខេត្តព្រះសីហនុ ជាមូលដ្ឋានយោធាចិននៅកម្ពុជា។ លោកឧបនាយករដ្ឋមន្ត្រី ស៊ុន ចាន់ថុល បញ្ជាក់ថា កម្ពុជា ទទួលនាវារបស់ប្រទេសទាំងអស់ ក្រោមលក្ខខណ្ឌមនុស្សធម៌។
«នាវារបស់ប្រទេសណាក៏ដោយដែល ចង់ចូលសំចតនៅកំពង់ផែនោះ សម្រាប់សកម្មភាពមនុស្សធម៌ យើងស្វាគមន៍កងទ័ពជើងទឹកគ្រប់ប្រទេសទាំងអស់ទៅកាន់កំពង់ផែរាម»។ លោក ស៊ុន ចាន់ថុល បាន សង្កត់ធ្ងន់បែបនេះ ដោយបញ្ជាក់ជាថ្មីថា កម្ពុជាមិនអនុញ្ញាតឱ្យមានមូលដ្ឋានបរទេសនៅក្នុងប្រទេសខ្លួនឡើយ ដោយសាររដ្ឋធម្មនុញ្ញកម្ពុជា បានហាមឃាត់។
មាត្រា៥៣នៃរដ្ឋធម្មនុញ្ញរបស់កម្ពុជាចែងថា កម្ពុជាមិនអនុញ្ញាតឱ្យមានមូលដ្ឋានបរទេសនៅក្នុងប្រទេសនោះទេ លើកលែងតែក្នុង ក្របខ័ណ្ឌនៃសំណូមពររបស់អង្គការសហប្រជាជាតិ។
ពាក់ព័ន្ធនឹងកំពង់ផែរាមដដែល លោក ស៊ុន ចាន់ថុល បានបន្តថា បរទេសអាចចោទកម្ពុជាបាន លុះត្រាតែនៅថ្ងៃ ណាមួយ នាវាជប៉ុន ឬអាម៉េរិក ត្រូវបានកម្ពុជាបដិសេធមិនឱ្យចូលចតនៅកំពង់ផែរាម ក្រោមហេតុផលចិន។
តាមរយៈសេចក្តីថ្លែងការណ៍រួមរវាងកម្ពុជា និងកូរ៉េខាងត្បូងចេញនៅថ្ងៃទី១៦ ខែឧសភា កម្ពុជាបានបង្ហាញ ការស្វាគមន៍ចំពោះផែនការរបស់កងទ័ពជើងទឹកកូរ៉េខាងត្បូង ដែលចង់ចូលចតនៅកម្ពុជាក្នុងឆ្នាំនេះ។ នៅក្នុង ខែកុម្ភៈកន្លងមក នាវាជប៉ុន ក៏បានចូលចតនៅកំពង់ផែកម្ពុជាផងដែរ។
ពីវេទិការៀបចំឡើងនៅទីក្រុងតូក្យូ ប្រទេសជប៉ុន លោកឧបនាយករដ្ឋមន្ត្រីកម្ពុជា ក៏បានថ្លែងពាក់ព័ន្ធនឹងព្រែក ជីកហ្វូណនតេជោផងដែរ ដោយច្រានចោលក្តីបារម្ភនានា ដែលលោកអះអាងថាគ្មានមូលដ្ឋានត្រឹមត្រូវ។ លោក ស៊ុន ចាន់ថុល បានពន្យល់ថា ព្រែកជីកហ្វូណនតេជោ នឹងប្រើប្រាស់ទឹកទន្លេមេគង្គត្រឹមតែ ០,០៥ភាគរយប៉ុណ្ណោះ ហើយវានឹង មិនប៉ះពាល់ ធ្ងន់ធ្ងរ លើតំបន់កសិកម្មនៅផ្នែកខាងក្រោមព្រែកជីកឡើយ។
លោកឧបនាយករដ្ឋមន្ត្រី បានពន្យល់ថា ការកសាងព្រែកជីកដំបូងរបស់កម្ពុជាដែលភ្ជាប់ពីទន្លេទៅកាន់សមុទ្រនេះ មិនត្រឹមជួយកាត់បន្ថយទឹកជំនន់នៅកម្ពុជា និងវៀតណាមឡើយ ប៉ុន្តែវាថែមទាំងកាត់បន្ថយចម្ងាយ ផ្លូវដឹកជញ្ជូន របស់កម្ពុជាថែមទៀត៕
© រក្សាសិទ្ធិដោយ thmeythmey.com