បុណ្យហាជ្ជ (Hajj) ជាកាតព្វកិច្ចទី៥ ក្នុងចំណោមកាតព្វកិច្ចទាំង៥ ដែលព្រះអល់ឡោះ​នៃសាសនាឥស្លាម បានដាក់បញ្ជាមកលើជនមូស្លីមគ្រប់រូប ដែលមានចែងក្នុងគម្ពីរអាល់គួរអាន និងតាមរយៈព្យាការីមូហាំម៉ាត់ ដែលជាអ្នកនាំសារ។ កាតព្វកិច្ចទាំង៥រួមមាន ទី១ ជឿ និងទទួលស្គាល់ថា​ព្រះអល់ឡោះជាម្ចាស់ និងមូហាំម៉ាត់ ជាអ្នកនាំសាររបស់ទ្រង់ (Shahadah) ទី២ ការប្រណិប័តន៍ថ្វាយបង្គំមួយថ្ងៃមួយយប់៥ដង ទី៣ ការផ្តល់វិភាគទាន ទី៤ ការតមអាហារក្នុងខែរ៉ាម៉ាឌន និងទី៥ ការធ្វើបុណ្យហាជ្ជ នេះឯង។ យ៉ាងណា បុណ្យហាជ្ជ គឺដាក់លើជនមូស្លីមណា​ ដែលមានលទ្ធភាព​គ្រប់គ្រាន់តែប៉ុណ្ណោះ។

 

ការធ្វើបុណ្យហាជ្ជ គឺធ្វើឡើងនៅទីក្រុងម៉ិកកា (Mecca) និងទីក្រុងម៉ាឌីណះ (Medina) ប្រទេសអារ៉ាប៊ីសាអូឌីត ដែលមានរយៈពេលប្រមាណ៤០ថ្ងៃ ឬតិចជាងនេះ។ ភាគច្រើន សាសនិកឥស្លាមកម្ពុជា ​ទៅបំពេញកាតព្វកិច្ចហាជ្ជ ​តាមរយៈក្រុមហ៊ុនឯកជន  និងមួយភាគតូចប៉ុណ្ណោះ ​ទៅតាមរយៈការឧបត្ថម្ភ ពីព្រះមហាក្សត្រ​អារ៉ាប៊ីសាអូឌីត។ សម្រាប់ឆ្នាំ២០២៤នេះ សាសនិកឥស្លាម​៩១១រូប​​ ដែលទៅធ្វើបុណ្យហាជ្ជ ក្នុងនោះ២០រូប ទទួលបានការឧបត្ថម្ភពីព្រះចៅ សាល់ ម៉ាន់ ពិនអាប់ឌុលអាហ្សី អាល់ស៊ូអ៊ូឌ ព្រះមហាក្សត្រនៃព្រះរាជាណាចក្រអារ៉ាប៊ីសាអូឌីត។  យ៉ាងណា ចំនួនអ្នកទៅធ្វើបុណ្យហាជ្ជនៅឆ្នាំនេះ មានការថយចុះបន្ដិច ខណៈឆ្នាំ២០២៣ មានជាង១,១០០នាក់។
 

ទេសរដ្ឋមន្រ្តីទទួលបន្ទុកបេសកកម្មពិសេស លោក អូស្មាន ហាស្សាន់ បានជូនដំណើរ​សាសនិកឥស្លាមកម្ពុជាទៅធ្វើបុណ្យហាជ្ជ ដែលជាជើងដំបូងនាយប់ថ្ងៃទី២៧ ឧសភា សរុប៤៣រូប តាមរយៈក្រុមហ៊ុន Mubarak។ បើតាមលោកទេសរដ្ឋមន្រ្តី នៅឆ្នាំនេះ​សាសនិកឥស្លាមម្នាក់​ត្រូវចំណាយថវិកា៦,៥០០ដុល្លារអាមេរិក ដែលតម្លៃនេះធូរថ្លៃជាងឆ្នាំមុន (៧,៥០០ដុល្លារ)។ សរុបការចំណាយរបស់មូស្លីមកម្ពុជានៅឆ្នាំនេះ មានចំនួនជាង ៥,៥លានដុល្លារអាមេរិក។

 

នៅឯអាកាសយានដ្ឋានអន្តរជាតិភ្នំពេញវិញ ជារៀងរាល់ឆ្នាំនារដូវនះ វត្តមានសាសនិកឥស្លាមរាប់រយនាក់ បានចូលរួមជូនដំណើរដល់សាច់ញាតិ និងក្រុមគ្រួសារពួកគេទៅបំពេញកាតព្វកិច្ចហាជ្ជមួយនេះ។ ពួកគេយល់ថា ការចូលរួមជូនដំណើរនេះ នឹងផ្តល់ផលបុណ្យដល់ពួកគេខ្លះ និងបួងសួងសុំពីអល់ឡោះ ឱ្យពួកគេបានទៅចូលរួមបុណ្យហាជ្ជនេះផង នាពេលអនាគត៕