ក្រសួងសុខាភិបាល សង្កេតឃើញថា យុវជនកម្ពុជា មួយចំនួន កំពុងលង់ខ្លួនប្រើប្រាស់ផលិតផលថ្នាំជក់ និងបារីអេឡិចត្រូនិក នៅតាមរបងសាលារៀន តាមហាងកាហ្វេ និងតាមទីសាធារណៈមួយចំនួន។ ទន្ទឹមនឹងនេះ ការផ្សព្វផ្សាយលក់ និងចែកចាយផលិតផលគ្រោះថ្នាក់ទាំងនេះ ក៏សម្ញែងឡើងយ៉ាងគគ្រឹកគគ្រេង ពិសេសតាមប្រព័ន្ធអនឡាញ។ ការប្រើប្រាស់ផលិតផលថ្នាំជក់ និងបារីអេឡិចត្រូនិក នៅក្នុងចំណោមយុវជន បង្កក្តីបារម្ភថា ពួកគេ កំពុងប្រឈមមុខនឹងជំងឺមិនឆ្លង ដែលមានដូចជាជំងឺមហារីក ជំងឺសរសៃឈាម និងបេះដូង និងជំងឺសួតជាដើម។
លោក ឈាង រ៉ា រដ្ឋមន្រ្តីក្រសួងសុខាភិបាល និងជាប្រធានគណៈកម្មាធិការត្រួតពិនិត្យផលិតផលថ្នាំជក់ មានប្រសាសន៍ថា ផលិតផលថ្នាំជក់ ជាកត្តាហានិភ័យនៃជំងឺមិនឆ្លងដូចជា ជំងឺមហារីក ជំងឺសរសៃឈាម និងបេះដូង និងជំងឺសួត ដែលបានសម្លាប់មនុស្សប្រមាណ ៨លាននាក់ ក្នុងមួយឆ្នាំនៅទូទាំងពិភពលោក និងបង្កផលប៉ះពាល់ដល់សេដ្ឋកិច្ច បរិស្ថាន និងសង្គម។ រដ្ឋមន្ត្រីក្រសួងសុខាភិបាល ថ្លែងបែបនេះ នៅថ្ងៃទី៥ មិថុនានេះ ក្នុងទិវាពិភពលោកគ្មានថ្នាំជក់ ឆ្នាំ២០២៤ ដែលកម្ពុជាប្រារព្ធឡើង ក្រោមប្រធានបទ «ការពារកុមារពីផលិតផលថ្នាំជក់»។
បើតាមការចុះផ្សាយរបស់ក្រសួងសុខាភិបាល ទិវាប្រារព្ធឡើង ដោយផ្តោតសំខាន់លើការលាតត្រដាងនូវយុទ្ធសាស្ត្ររបស់ឧស្សាហកម្មថ្នាំជក់ក្នុងការទាក់ទាញកុមារ និងយុវជនប្រើប្រាស់ផលិតផលថ្នាំជក់ និងយកចិត្តទុកដាក់បន្ថែមទៀតការពារកុមារ និងយុវជនពីផលិតផលថ្នាំជក់ និងបារីអេឡិចត្រូនិក។
នៅក្នុងឱកាសនេះដែរ លោក ឈាង រ៉ា បានមានប្រសាសន៍បន្ថែមទៀតថា ឧស្សាហកម្មថ្នាំជក់បានកែប្រែទម្រង់ ថ្មីៗ របស់ផលិតផលថ្នាំជក់ដូចជាបង្កើត បារីអេឡិចត្រូនិក ផលិតផលអេចឈ៍ ធី ភី(HTPs) និងស៊ីស្សា(SISHA)ជាដើម ដែលមានច្រើនរូបរាង ច្រើនទំហំ និងមានជាង ១៥ ០០០រសជាតិ ដើម្បីទាក់ទាញកុមារ និងយុវជន។
លោក ឈាង រ៉ា រដ្ឋមន្ត្រីក្រសួងសុខាភិបាល នៅក្នុងពិធីអបអរទិវាពិភពលោកគ្មានថ្នាំជក់ ឆ្នាំ២០២៤ ដែលរៀបចំនៅថ្ងៃទី៥ ខែមិថុនា ឆ្នាំ២០២៤។ រូបភាព៖ ទំព័រហ្វេសប៊ុ
បើទោះបីជារាជរដ្ឋាភិបាលកម្ពុជា ក៏ដូចជាក្រសួងស្ថាប័នពាក់ព័ន្ធ បានខិតខំទប់ស្កាត់ អប់រំ ផ្សព្វផ្សាយ និងបានដាក់ចេញនូវច្បាប់ស្តីពីការត្រួតពិនិត្យផលិតផលថ្នាំជក់ និងលិខិតបទដ្ឋានគតិយុត្តិនានា ដើម្បីត្រួតពិនិត្យផលិតផលថ្នាំជក់ ក៏ដោយរដ្ឋមន្ត្រីក្រសួងសុខាភិបាល ក៏សង្កេតឃើញថា ផលិតផលថ្នាំជក់ដ៏សម្បូរបែបនេះ កំពុងត្រូវបានប្រើប្រាស់ដោយក្រុមយុវជនកម្ពុជា។
លោក ឈាង រ៉ា លើកឡើងដូច្នេះ៖ «ទោះយ៉ាងណា រយៈពេលកន្លងមកនេះ គេសង្កេតឃើញមានការប្រើប្រាស់បារីអេឡិចត្រូនិចក្នុងចំណោមយុវជន និងមានការផ្សព្វផ្សាយ និងលក់បារីអេឡិចត្រូនិចតាមរូបភាពផ្សេងៗ ដូចជាប្រព័ន្ធអនឡាញ តាមរបងសាលារៀន ឬទីកន្លែងណាត់ជួបមួយចំនួនទៀត ដោយប្រើប្រាស់ខ្លឹមសារបំភាន់ថា បារីអេឡិចត្រូនិកជាឧបករណ៍សម្រាប់ផ្តាច់បារី និងជាផលិតផលដែលមានសុវត្ថិភាពជាងបារីធម្មតាជាដើម»។
ចំពោះមុខស្ថានភាពនេះលោករដ្ឋមន្ត្រី បានអំពាវនាវ ឱ្យគណៈកម្មាធិការត្រួតពិនិត្យផលិតផលថ្នាំជក់ និងស្ថាប័នពាក់ព័ន្ធទាំងអស់ រួមគ្នាទប់ស្កាត់ការផ្សាយពាណិជ្ជកម្ម ការផ្សព្វផ្សាយលក់ និងចែកចាយផលិតផលថ្នាំជក់ និងបារីអេឡិចត្រូនិក ក៏ដូចជាហាមឃាត់ការជក់ ឬបង្ហុយផ្សែងផលិតផលថ្នាំជក់នៅកន្លែងសាធារណៈ ដើម្បីការពារកុមារ និងយុវជនពីផលិតផលថ្នាំជក់ និងបារីអេឡិចត្រូនិក។
ទន្ទឹមនឹងនេះ លោក ឈាង រ៉ា ក៏អំពាវនាវដល់យុវជន កុំសាកល្បងប្រើប្រាស់ផលិតផលថ្នាំជក់ ឬបារីអេឡិចត្រូនិកនេះ ខណៈក្រសួងសុខាភិបាល បានខិតខំបង្កើតសេវាផ្តល់ប្រឹក្សា លះបង់ទម្លាប់ជក់បារី នៅតាមមណ្ឌលសុខភាព ដើម្បីបង្ការជំងឺមិនឆ្លងនៅទូទាំងប្រទេស៕