យោងតាមទិន្នន័យរបស់អគ្គនាយកដ្ឋានកៅស៊ូ នៅថ្ងៃទី១២ ខែមិថុនា កម្ពុជាផលិតជ័រកៅស៊ូបានក្នុងរង្វង់ ១០៩ ៩៤៥ ៥តោន ក្នុងនោះបាននាំចេញ ១១០ ៧៧២តោន ដែលគិតជាទឹកប្រាក់ប្រមាណ ១៦៤ ៤៩០ ៦០០​ដុល្លារ។ តម្លៃបានពីការនាំចេញក្នុងរយៈពេល៥ខែនេះ កើនឡើង១២ភាគរយ ធៀបនឹងរយៈពេលដូចគ្នា ឆ្នាំ២០២៣។ 
 

ដោយឡែក ក្នុងខែឧសភា កម្ពុជាទទួលបានចំណូលជិត ៤០លានដុល្លារពីការនាំចេញជ័រកៅស៊ូ ២៥ ៣៤៤តោន។ បច្ចុប្បន្ន ជ័រកៅស៊ូមានតម្លៃជាមធ្យម ១ ៤៨៥ដុល្លារក្នុងមួយតោន កើនឡើង៦៩ដុល្លារ ធៀបនឹងឆ្នាំមុន។ 
 

កម្ពុជាមានផ្ទៃដីកៅស៊ូសរុប ៤០៧ ១៧២ហិកតា ក្នុងនោះផ្ទៃដីចៀរជ័រចំនួន ៣២០ ១៨៤ហិកតា ស្មើនឹង៧៩ភាគរយ និងផ្ទៃដីថែទាំចំនួន ៨៦ ៩៨៨ហិកតា ស្មើនឹង ២១ភាគរយ។ ផ្ទៃដីកៅស៊ូកសិឧស្សាហកម្មមាន ២២៦ ៨៤០ហិកតា ស្មើនឹង៥៦ភាគរយ និងផ្ទៃដីកៅស៊ូគ្រួសារមាន ១៨០ ៣៣២ហិកតា ស្មើនឹង ៤៤ភាគរយ៕