ជាតិ
សង្គមជាតិ
គ្រូពេទ្យនៅភូមិរកា ត្រូវជាប់ចោទពីបទឃាតកម្មដោយមានទារុណកម្ម អំពើឃោរឃៅ
× លោក យ៉ែម ជ្រិន ដែលគេសង្ស័យថាជាអ្នកធ្វើឲ្យមានការចម្លងជំងឺអេដស៍ដល់អ្នក ភូមិជាង១០០នាក់នោះ ត្រូវបានព្រះរាជអាជ្ញានៃសាលាដំបូងខេត្តបាត់ដំបង ចោទប្រកាន់ ជាផ្លូវការហើយ។
នៅរសៀលថ្ងៃទី២២ ខែធ្នូនេះ ព្រះរាជអាជ្ញា លោក នួន សាន បានប្រាប់សារព័ត៌មានថ្មីៗ តាមទូរសព្ទថា លោក យ៉ែម ជ្រិន ត្រូវបានជាប់ពីបទឃាតកម្ម អំពើឃោរឃៅ (មាត្រា ២០៥) នៃក្រមព្រហ្មទណ្ឌ ការប្រព្រឹត្តចម្លងមេរោគដេស៍ទៅអ្នកដទៃ (មាត្រា១៨ និងមាត្រា៥០)នៃច្បាប់ស្តីពី ការបង្ការ និងការប្រយុទ្ធទប់ស្កាត់ការរីករាលដាលមេរោគអេដស៍/ជំងឺអេដស៍ និង បទធ្វើអាជីវកម្មពេទ្យដោយគ្មានការអនុញ្ញាត។
លោកព្រះរាជអាជ្ញាបានប្រាប់ថា៖«នេះគឺជាការចោទប្រកាន់បឋមដើម្បីបើកផ្លូវឲ្យចៅក្រមស៊ើបសួរធ្វើការបន្ថែម ទៅតាមនីតិវិធី»។
លោក យ៉ែម ជ្រិន ត្រូវបានបញ្ជូនទៅឃុំខ្លួនបណ្តោះអាសន្ននៅក្នុងពន្ធនាគារខេត្តបាត់ដំបង។
ប្រសិនបើតុលាការរកកំហុសដូចបទចោទប្រកាន់ លោកនឹងត្រូវប្រឈមមុខជាប់ក្នុងពន្ធនាគារ អស់មួយជីវិត។
លោក យ៉ែម ជ្រិន ជាគ្រូពេទ្យឯកជននៅភូមិរកា ដែលសង្ស័យថា ជាអ្នកប្រើប្រាស់ម្ជុលចាក់ថ្នាំរួមគ្នាបង្កឲ្យឆ្លងមេរោគអេដស៍ដល់ពលរដ្ឋភូមិរកា ឃុំរកា ស្រុកសង្កែនោះ ត្រូវបានសមត្ថកិច្ចឃាត់ខ្លួនកាលពីថ្ងៃទី១៧ ខែធ្នូ ឆ្នាំ២០១៤ ៕
© រក្សាសិទ្ធិដោយ thmeythmey.com