ជាតិ
នយោបាយជាតិ
លោក សម រង្ស៊ី - កឹម សុខា ខ្វះភាពជាអ្នកដឹកនាំត្រង់យកប្រពន្ធនិងកូនតាមខ្លួន
× ស្ទើរតែមិនលុះពេលឡើយ ដែលលោក សម រង្ស៊ី ប្រធានគណបក្សសង្គ្រោះជាតិ តែងតែយកប្រពន្ធរបស់ខ្លួនឲ្យចូលរួមក្នុងកិច្ចប្រជុំនានា ដោយហោចទៅសូម្បីតែចូលគាល់ព្រះមហាក្សត្រក៏មានវត្តមានភរិយារបស់លោក សម រង្ស៊ី ដែរ។ រីឯលោក កឹម សុខា អនុប្រធានគណបក្សវិញផ្ទុយពីលោក សម រង្ស៊ី មិនយកប្រពន្ធតាមខ្លួនឡើយ តែយកកូនតាមខ្លួនជំនួសវិញ។ ទង្វើរបស់មេដឹកនាំកំពូលបក្សប្រឆាំងទាំងពីរនេះ ត្រូវលោក អ៊ូ វីរៈ ចាត់ទុកថា ជាទង្វើដែលបង្ហាញពីកង្វះភាពជាអ្នកដឹកនាំ។
ការយកប្រពន្ធតាមខ្លួនរបស់លោក សម រង្ស៊ី និងការយកកូនតាមខ្លួនរបស់លោក កឹម សុខា គឺជាសកម្មភាព ដែលលោក អ៊ូ វីរៈ រិះគន់ថា លោកមេបក្សប្រឆាំងទាំងពីរខ្វះភាពជាអ្នកដឹកនាំ។ ក្នុងនាមជាអ្នកវិភាគស្ថានការណ៍នយោបាយកម្ពុជាមួយរូបផងនោះ លោក អ៊ូ វីរៈ បានមើលឃើញទង្វើលោក សម រង្ស៊ី កន្លងមកថា មេបក្សប្រឆាំងរូបនេះ តែងតែយកប្រពន្ធគឺលោកស្រី ជូឡុង ស៊ូម៉ារ៉ា តាមខ្លួនស្ទើរគ្រប់ជំនួបជាមួយថ្នាក់ដឹកនាំដទៃ និងស្ទើរគ្រប់កិច្ចប្រជុំនៅក្នុងបក្ស ព្រមទាំងពេលជួបពលរដ្ឋផងដែរ ។ បន្ថែមពីលើនេះ លោក អ៊ូ វីរៈ បានអះអាងថា ទង្វើរបស់លោក សម រង្ស៊ី បែបនេះ នឹងធ្វើឲ្យបាត់បង់ភាពស្និតស្នាលនៅក្នុងក្រុម ឬក្នុងបក្ស។
អ្នកវិភាគរូបនេះ បញ្ជាក់យ៉ាងនេះថា៖ «លោក សម រង្ស៊ី គាត់ខ្វះភាពជាអ្នកដឹកនាំត្រង់យកប្រពន្ធតាមខ្លួនពេក ។ លោក សម រង្ស៊ី បើគាត់មានភាពជាអ្នកដឹកនាំ គួរតែដឹងថា ប្រពន្ធគាត់ធ្វើឲ្យការល្អូកល្អិនជាក្រុមបាត់បង់ ព្រោះថា កាលណាមានប្រពន្ធជិតខ្លួនហើយជាធម្មជាតិមនុស្ស គឺនៅពេលគាត់មានរឿងអ្វីមួយ ប្រាប់ប្រពន្ធ ជួបបញ្ហាអ្វី រអ៊ូប្រាប់ប្រពន្ធ ជាពិសេសពីបញ្ហាក្នុងការងារជាដើម។ ខ្ញុំថា ធ្វើបែបនេះយូរៗទៅ គាត់បាត់បង់ភាពអ្នកដឹកនាំនៅក្នុងក្រុម និងបាត់ភាពជិតស្និត» ។
ទន្ទឹមនឹងលើកពីកង្វះភាពជាអ្នកដឹកនាំរបស់លោក សម រង្ស៊ី ត្រង់ចំណុចនេះ លោក អ៊ូ វីរៈ ដែលធ្លាប់តែរិះគន់លោក សម រង្ស៊ី នោះ ក៏បន្តនិយាយពីចំណុចខ្សោយរបស់លោកមេបក្សប្រឆាំងរូបនេះ មួយចំនួនទៀតផងដែរ។ តែមុននឹងអធិប្បាយដល់ចំណុចខ្សោយបន្ថែម លោក អ៊ូ វីរៈ ក៏សរសើរលោក សម រង្ស៊ី ខ្លះដែរអំពីភាពជាអ្នកដឹកនាំរបស់លោក កាលពីជាង ២០ ឆ្នាំមុន។ លោកថា នៅពេលនោះ លោក សម រង្ស៊ី ជាមេដឹកនាំដែលល្អ មានចំណេះដឹងខ្ពស់ មានឆន្ទៈ និងមានទស្សនៈវិស័យច្បាស់លាស់ ដែលសាកសម ជាអ្នកដឹកនាំប្រទេស។ តែពេលវេលារំលងពីមួយឆ្នាំទៅមួយឆ្នាំដោយសារមានការគំរាមកំហែងផងនោះលោក សម រង្ស៊ី កាន់តែខ្សោយទៅ។
លោក អ៊ូ វីរៈ អះអាងថា ការជួបស្ថានការណ៍បែបនេះ ធ្វើឲ្យលោក សម រង្ស៊ី មានចំណុចខ្សោយមិនទុកចិត្តលើអ្នកដទៃឡើយ។ «លោក សម រង្ស៊ី ជាមនុស្ស រឹងមាំ។ ខ្ញុំចាំថា កាលពី ២០ ឆ្នាំមុនគាត់ជាមេដឹកល្អ គាត់មានទស្សនៈវិស័យ មានឆន្ទៈច្បាស់លាស់ ហើយគាត់ដឹងថា ត្រូវរៀបចំប្រទេសកម្ពុជាយ៉ាងម៉េចពេលនោះ ។ គាត់ខំប្រឹងប្រែងខ្លាំងណាស់ដើម្បីជាតិ ។ តែខ្ញុំសោកស្តាយអ្វីដែលកើតឡើងសម្រាប់គាត់ជាង ២០ ឆ្នាំមកនេះ គឺគាត់តែងតែរងគ្រោះច្រើនមានដូចជា ការគំរាមកំហែងសម្លាប់ដល់អាយុជីវិតការគំរាមចាប់ដាក់គុក ការលាបព័ណ៌ គេជេរប្រមាថផ្សេងៗ ក៏ធ្វើឲ្យគាត់ខ្លាចសង្គម ឈប់ទុកចិត្តលើអ្នកដទៃ ដែលធ្វើឲ្យគាត់រួញៗទៅ ហើយវាជាការបរាជ័យសម្រាប់ទឹកចិត្តគាត់ ។
កត្តានេះមិនអាចឲ្យគាត់រីកចម្រើនបានទេ គាត់ធ្វើអ្វីតែម្នាក់ឯង មិនទុកចិត្តលើអ្នកផ្សេង មិនសូវសហការជាមួយអ្នកដទៃ។ លោក សម រង្ស៊ី តែងតែអត់ហ៊ានទាញមនុស្សពីខាងក្រៅឲ្យចូលជាមួយខ្លួនទេ ខ្លាចលោក ហ៊ុន សែន ដាក់មនុស្សបង្កប់។ ដូច្នេះជាផ្លូវចិត្តលោក ហ៊ុន សែន បានជោគជ័យលើលោក សម រង្ស៊ី បាត់ទៅហើយ។ តាមពិត លោក សម រង្ស៊ី ជាអ្នកចេះដឹង ហើយឆ្លាតទៀត តែគាត់បាត់បង់ភាពជាអ្នកដឹកនាំ និងមានចំណុចខ្សោយ ដោយសារគាត់រងគ្រោះច្រើនពេក» ។ នេះជាការវិភាគរបស់លោក អ៊ូ វីរៈ ។
ក្រោយពីវិភាគទៅលើចំណុចអវិជ្ជមានរបស់លោក លោក សម រង្ស៊ី លោក អ៊ូ វីរៈ ក៏មិនភ្លេចនិយាយពីចំណុចអវិជ្ជមានរបស់លោក កឹម សុខា ដែលខ្វះភាពជាអ្នកដឹកនាំផងដែរ។ លោកថា លោក កឹម សុខា ខ្វះភាពជាអ្នកដឹកនាំត្រង់យកកូនស្រីតាមខ្លួនច្រើនពេក។ « លោក កឹម សុខា មិនអាចឲ្យកូន ( កញ្ញា កឹម មនោវិទ្យា) ចូលក្នុងក្រុមបានទេ ពីព្រោះវានឹងធ្វើឲ្យបាត់បង់ការសហការគ្នាជាក្រុម ។ ហើយបើសិនជាបើកូននោះ មានសមត្ថភាព លោក កឹម សុខា គួរឲ្យកូននោះ ជាអ្នកជួយពីក្រោយ ឬធ្វើជំនួយការវិញល្អជាង មិនបាច់ចេញមុខជាមួយគាត់ទេ» ។ នេះជាការបញ្ជាក់របស់លោក អ៊ូ វីរៈ ។ លើសពីនេះទៀត លោកថាលោកអនុប្រធានបក្សប្រឆាំងរូបនេះ ក៏មានចំណុចខ្សោយមួយទៀត គឺការឆាប់ជឿអ្នកដទៃ។ លោក អ៊ូ វីរៈ សង្កត់ធ្ងន់យ៉ាងនេះថា៖«លោក កឹម សុខា ពេលខ្លះគាត់ឆាប់ជឿងគេណាស់ ដែលធ្វើឲ្យគាត់ជួបបញ្ហា ចំពោះការសម្រេចចិត្តលឿនរបស់គាត់។ ហើយនេះជាចំណុចខ្សោយ ក្នុងនាមខ្លួនជាមេដឹកនាំបក្ស» ។
តែយ៉ាងណាលោក អ៊ូ វីរៈ មិនមែននិយាយពីចំណុចអវិជ្ជមានរបស់លោក កឹម សុខា តែមួយមុខនោះទេ ក៏ប៉ុន្តែលោក ក៏និយាយពីចំណុចល្អផងដែរ។ « លោក កឹម សុខា គាត់ជាមនុស្សឆ្លាតមួយ តែមិនមែនឆ្លាតដូចលោក សម រង្ស៊ី ដែលកើតពីការរៀនសូត្រខ្ពង់ខ្ពស់នោះទេ។ គាត់រៀនបានតិចតួចទេតែគាត់ឆាប់ចាប់បានលឿនណាស់ជាពិសេសគាត់អនុវត្តជាក់ស្តែងតែម្តង។ ចំណុចនេះ គួរសរសើរគាត់ » ។ នេះជាអ្វីដែលោក អ៊ូ វីរៈ សរសើរលោក កឹម សុខា ដែលជាអតីតប្រធានរបស់លោក កាលលោក កឹម សុខា នៅធ្វើជាប្រធានមជ្ឈមណ្ឌលសិទ្ធិមនុស្សកម្ពុជា ៕
(សូមរងចាំអានអត្ថបទលើកក្រោយ ដែលនឹងនិយាយពីចំណុចខ្សោយ និងចំណុចខ្លាំងរបស់លោក ហ៊ុន សែន និងព្រះអង្គម្ចាស់ នរោត្តម រណឬទ្ធិ) ។
© រក្សាសិទ្ធិដោយ thmeythmey.com