ជាតិ
ក.អ.ក ថ្កោលទោសក្រុមរដ្ឋអ៊ីស្លាម ចំពោះការសម្លាប់ចំណាប់ខ្មាំងជនជាតិជប៉ុន
× ក្លឹបអ្នកកាសែតកម្ពុជា(ក.អ.ក)នៅថ្ងៃទី២ខែកុម្ភៈនេះ បានចេញសេចក្តីថ្លែងការណ៍ថ្កោលទោសចំពោះក្រុមជីហាតរដ្ឋអ៊ីស្លាមដែលសម្លាប់ចំណាប់ខ្មាំងជប៉ុនម្នាក់ទៀត និងបានបង្ហោះវីដេអូកាត់កចំណាប់ខ្មាំងតាមប្រព័ណ្ធអ៊ីនធឺណេតផងដែរ។
ចំណាប់ខ្មាំងជនជាតិជប៉ុន២នាក់ ត្រូវបានក្រុមអង្គការរដ្ឋអ៊ីស្លាម កាត់ក្បាលជាបន្តបន្ទាប់ ក្នុងរយៈពេលមួយសប្តាហ៍។ កាលពីថ្ងៃសៅរ៍ទី២៤ខែមករាកន្លងទៅ ក្រុមនេះ បានបង្ហោះវីដេអូ ពីការកាត់ក្បាលចំណាប់ខ្មាំងជប៉ុនម្នាក់ គឺលោក Shoichi Yukawa ហើយនៅថ្ងៃសៅរ៍សប្តាហ៍មុន ក្រុមអង្គការរដ្ឋអ៊ីស្លាមនេះ បានបង្ហោះវីដេអូកាត់ក្បាលចំណាប់ខ្មាំងដែលជាអ្នកកាសែតជប៉ុន គឺលោក Kenji Gotoម្នាក់ទៀតជាថ្មី។
ក.អ.ក បានចាត់ទុកឃាតកម្មលើអ្នកកាសែតនេះ ជាអំពោះក៏សាហាវព្រៃផ្សៃ យង់ឃ្នង ប្រឆាំងមនុស្សជាតិ និងរំលោភយ៉ាងធ្ងន់ធ្ងរលើសេរីភាពសារព័ត៌មាន ព្រមទាំងសិទ្ធិមនុស្សដែលមិនអាចអត់ឱនឲ្យបានឡើយ។ ក.អ.ក ប្រកាសថ្កោលទោសយ៉ាងដាច់អហង្ការចំពោះអំពោះព្រៃផ្សៃ អមនុស្សថម៌នេះ ហើយអំពាវនាវដល់សហគមន៍អន្តរជាតិ និងមនុស្សជាតិលើសកលលោក រួមគ្នាថ្កោលទោស និងចាត់វិធានការតាមគ្រប់រូបភាព ដើម្បីប្រឆាំងក្រុមភេរវជនរដ្ឋអ៊ីស្លាមនេះ។
បន្ថែមពីនេះ ក.អ.ក ក៏សូមរំលែកទុក្ខយ៉ាងក្រៀមក្រំជាមួយក្រុមគ្រួសារសព រួមទាំងប្រជាជនជប៉ុនទាំងមូលផងដែរ៕
© រក្សាសិទ្ធិដោយ thmeythmey.com