ជាតិ
បទវិភាគ
មន្ត្រីរាជការដែលមិនមកធ្វើការនៅថ្ងៃបុណ្យចូលឆ្នាំចិនគួរត្រូវទទួលទណ្ឌកម្មរដ្ឋបាល!
×![]()
ដោយ: លីម តុលា
ភ្នំពេញ៖ ពិធីបុណ្យចូលឆ្នាំចិន និងវៀតណាមនឹងចាប់ផ្តើមសែនព្រេននៅថ្ងៃពុធទី១៨ខែកុម្ភះ នេះ រីឯថ្ងៃទី១នៃពិធីបុណ្យចូលឆ្នាំនឹងចាប់ផ្តើមនៅថ្ងៃព្រហស្បត៍ទី១៩ខែកុម្ភះស្អែកនេះ និងបន្តរហូតដល់ថ្ងៃទី២១ ។ អ្នកជំនួញ សិស្ស និស្សិត និងមន្ត្រីរាជការមួយចំនួនចាប់ផ្តើមជជែកគ្នាពីការឈប់សម្រាកនៅថ្ងៃបុណ្យប្រពៃណីចិន និងវៀតណាម។ ប្រសិនបើកូនសិស្ស និស្សិត និងមន្ត្រីរាជការមិនមករៀន ឬមិនមកធ្វើការ តើពួកគេគួរត្រូវទទួលទណ្ឌកម្មរដ្ឋបាលឬទេ?
ពីមួយឆ្នាំទៅមួយឆ្នាំ បើទោះបីជាច្បាប់រដ្ឋនៃព្រះរាជាណាចក្រកម្ពុជាមិនតម្រូវអោយមន្ត្រីនៃស្ថាប័នរដ្ឋទាំងអស់ឈប់សម្រាកនៅថ្ងៃពិធីបុណ្យចូលឆ្នាំចិន និងវៀតណាមក៏ដោយក្តី ក៏គេសង្កេតឃើញជាទូទៅថា មន្ត្រីនៃស្ថាប័នរដ្ឋនៃប្រទេសកម្ពុជាមួយចំនួនមិនមកធ្វើការដែរដោយសារតែពួកគេនៅជាប់រវល់អបអរសាទរពិធីបុណ្យចូលឆ្នាំចិន និងវៀតណាម។
សាលារៀនឯកជនមួយចំនួនបិទទ្វារក្រោមលេស និងហេតុផលផ្សេងៗ សាលារៀនរដ្ឋបន្តបើកទ្វារតែគ្មានកូនសិស្សគ្រប់គ្រាន់ ក្រុមហ៊ុនខ្លះសម្រេចចិត្តបិទទ្វារជាស្ថាពរដើម្បីអបអរសាទរពិធីបុណ្យចូលឆ្នាំចិន និងវៀតណាម ស្ថាប័នរដ្ឋនៅបន្តបើទ្វារ តែមន្ត្រីខ្លះមកធ្វើការដោយគ្រាន់តែចុះវត្តមាន និងមន្ត្រីខ្លះទៀតមិនមកតែម្តង។ ប្រសិនបើមន្ត្រីរាជការដែលស៊ីប្រាក់ខែរបស់រដ្ឋមិនមកធ្វើការនៅថ្ងៃបុណ្យចូលឆ្នាំចិន និងវៀតណាម ដែលមិនមែនជាថ្ងៃឈប់សម្រាកផ្លូវការរបស់រដ្ឋនោះ គួរទទួលទណ្ឌកម្មរដ្ឋបាលឬទេ?
សម្រាប់អ្នកធ្វើការនៅក្នុងវិស័យឯកជន គ្មានច្បាប់ណាមួយចងមិនអោយពួកគេគេបិទទ្វារនោះទេ។ ពួកគេអាចឈប់សម្រាក ឬបិទទ្វារក្រុមហ៊ុនរបស់ពួកគេបានតាមពេលវេលាដែលពួកគេចង់ដោយមិនចាំបាច់និយាយពីរឿងចូលឆ្នាំចិន និងវៀតណាមផង។ ប៉ុន្តែ សម្រាប់មន្ត្រីរាជការរបស់រដ្ឋដែលទទួលប្រាក់ខែដោយសារការបង់ពន្ធពីប្រជាពលរដ្ឋ គ្មានសិទ្ធិឈប់សម្រាកនៅថ្ងៃបុណ្យចូលឆ្នាំឡើយ។ រាល់អវត្តមានដែលគ្មានច្បាប់ ឬគ្មានហេតុផលសមរម្យនៅថ្ងៃបុណ្យចូលឆ្នាំចិន និងវៀតណាម គឺជាសកម្មភាពខុសច្បាប់នៃព្រះរាជាណាចក្រកម្ពុជា។
ពិធីបុណ្យចូលឆ្នាំចិន និងវៀតណាម គឺជាបុណ្យប្រពៃណីរបស់ជនជាតិវៀតណាម និងជនជាតិចិន។ ដូច្នេះ ជនជាតិខ្មែរ កើតនៅលើទឹកដីខ្មែរ ត្រូវតែបន្តធ្វើការជូនរដ្ឋ និងជូនពលរដ្ឋខ្មែដូចថ្ងៃធម្មតា។ ទម្លាប់ឈប់សម្រាកមិនផ្លូវការនៅថ្ងៃបុណ្យប្រពៃណីចូលឆ្នាំចិន និងវៀតណាមដែលអាចក្លាយទៅជាប្រពៃណីកែមិនបានឡើងវិញនោះ ធ្វើអោយប្រទេសកម្ពុជាបាត់បង់ផលប្រយោជន៍ពីរយ៉ាង។ ទីមួយ គឺការបាត់បង់ប្រសិទ្ធិភាព និងផលិតភាពការងាររបស់រដ្ឋ។ ឈប់សម្រាកពី៣ទៅ៤ថ្ងៃ ការងារជាច្រើននៅគរលើគ្នា និងទីពីរ គឺជាការបាត់បង់រូបភាពកិត្តិយសជាតិខ្មែរ មានន័យថា ឥទ្ធិពលវប្បធម៌ និងមនោគមន៍វិជ្ជានៃប្រទេសចិន និងវៀតណាមកំពុងគ្របដណ្តប់មកលើរដ្ឋបាលនៃប្រទេសកម្ពុជាដោយប្រយោល។
ជាថ្មីម្តងទៀត គ្មានឡើយការហាមឃាត់សិទ្ធិសេរីភាពនៃការអបអរសាទរពិធីបុណ្យប្រពៃណីចិន និងវៀតណាម ឬពិធីបុណ្យនៃប្រទេសដទៃៗទៀត ពីព្រោះនេះវាគឺជាសិទ្ធិរបស់ពលរដ្ឋម្នាក់ៗឬជាសិទ្ធិរបស់បុគ្គលម្នាក់។ ជាការពិត បុគ្គលម្នាក់ៗមានសិទ្ធិគ្រប់យ៉ាងមែន។ ប៉ុន្តែសិទ្ធិបុគ្គលដែលមាននោះ មិនត្រូវរំខាន ឬធ្វើអោយខូចប្រយោជន៍របស់ជាតិខែ្មរឡើយ។
បុគ្គលដែលទទួលប្រាក់ខែពីរដ្ឋ ត្រូវធ្វើការបម្រើរដ្ឋ។ ប្រសិនបើថ្ងៃបុណ្យចូលឆ្នាំចិន និងវៀតណាម មិនមែនជាថ្ងៃឈប់សម្រាប់ផ្លូវការរបស់រដ្ឋខ្មែរទេនោះ មន្ត្រីទាំងអស់ ទាំងថ្នាក់លើ និងថ្នាក់ក្រោមត្រូវតែមកធ្វើការធម្មតាដូចថ្ងៃសព្វដង។
សរុបសេចក្តីមកវិញ មន្ត្រីរាជការដែលខកខានមិនបានមកធ្វើការនៅថ្ងៃឈប់សម្រាកមិនផ្លូវការ នៅថ្ងៃបុណ្យចូលឆ្នាំចិន និងវៀតណាម ដោយគ្មានច្បាប់ ឬគ្មានមូលហេតុសមរម្យត្រឹមត្រូវផ្សេងទៀត គួរត្រូវទទួលទណ្ឌកម្មរដ្ឋបាល(ស្តីបន្ទោសធម្មតា ព្រមាន ឬដាក់ទណ្ឌកម្មរដ្ឋបាល)៕
© រក្សាសិទ្ធិដោយ thmeythmey.com
