ជាតិ
សង្គមជាតិ
ត្រឹមឆ្នាំ ២០១៧ ៖ ក្រសួងសង្គមកិច្ចកាត់បន្ថយកុមារតាមមណ្ឌលនៅត្រឹម ៣ ពាន់នាក់
×
ភ្នំពេញ៖ គិតចាប់ពីឆ្នាំ ២០១៥ ដល់២០១៧ ខាងមុខនេះ ក្រសួងសង្គមកិច្ចនឹងកាត់បន្ថយកុមារ តាមមណ្ឌលកុមារកំព្រាទូទាំងប្រទេសមកត្រឹមតែ ៣០ភាគរយពោលគឺប្រហាក់ប្រហែល ៣ ពាន់នាក់ ខណៈដែលចំនួនកុមារកំព្រាទាំងអស់នៅតាមមណ្ឌលបច្ចុប្បន្នមានជាង ១ ម៉ឺននាក់ ។នេះបើតាម ប្រសាសន៍របស់រដ្ឋមន្ត្រីក្រសូងសង្គមកិច្ចលោក វង សូត ។
របាយការណ៍ស្រាវជ្រាវរបស់អង្គការកុមារយូនីសែហ្វ បង្ហាញថា ចំនួនកុមារដែលកំពុងស្នាក់នៅក្នុងមណ្ឌលកុមារកំព្រារបស់រដ្ឋ និងឯកជនទូទាំងប្រទេសមានជាង ១ម៉ឺននាក់។
រដ្ឋមន្ត្រីក្រសួងសង្គមកិច្ច លោក វង សូត និយាយថា ក្រសួងនឹងកាត់បន្ថយចំនួននេះ មកត្រឹម ៣០ ភាគរយ ស្មើនឹងជាង ៣ពាន់នាក់ប៉ុណ្ណោះត្រឹមឆ្នាំ ២០១៧ ។
នៅក្នុងពិធីសម្ពោធយុទ្ធនាការមណ្ឌលកុមារកំព្រាធ្វើឲ្យកុមារបែកចេញពីគ្រួសារ នៅថ្ងៃទី២៥ កុម្ភៈនេះ លោក វង សូត មានប្រសាសន៍ថា ការកាត់បន្ថយនេះ ដើម្បីឲ្យប្រជាជនខ្មែរផ្លាស់ប្តូ ទំលាប់ពឹងផ្អែកចិញ្ចឹមជីវិតលើតែមណ្ឌលកុមារកំព្រា។
ក្រសួងសង្គមកិច្ច និងអង្គការពាក់ព័ន្ធនានាចាប់ផ្តើមយុទ្ធនាការខាងលើ ចាប់ពីខែកុម្ភៈឆ្នាំ២០១៥នេះទៅដោយអនុវត្តន៍ជាលើកដំបូងនៅក្នុងរាជធានីភ្នំពេញ និងខេត្តសៀមរាប។
យុទ្ធនាការដែលមានបំណងផ្សព្វផ្សាយដល់ប្រជាជនកម្ពុជា បញ្ឈប់ការបញ្ជូនកូនទៅមណ្ឌល កុមារកំព្រានេះ ត្រូវបានរដ្ឋមន្ត្រីសង្គមកិច្ច ចាត់ទុកថា ជាវិធានការល្អប្រសើរ ដើម្បីអាចឲ្យ កុមារស្នាក់នៅជាមួយក្រុមគ្រួសាររបស់ពួកគេ។
លោកមានប្រសាសន៍ថា៖«គ្រួសារ ជាកន្លែងដ៏ល្អបំផុត សម្រាប់ភាពកក់ក្តៅដល់កូនៗធំលូតលាស់ឡើងក្រោមការថែរក្សាដោយក្តីស្រឡាញ់ ពីឪពុកម្តាយ ដូច្នេះហើយទោះជាមណ្ឌលបានអនុវត្តយ៉ាងខ្ជាប់ខ្ជួន តាមបទដ្ឋាន និងគោលនយោបាយនៃការថែទាំជំនួសយ៉ាងណាក៏ដោយក៏ពុំមានស្ថានភាពដូចការរស់នៅជុំជាមួយក្រុមគ្រួសារនោះឡើយ»។
បើតាមលោករដ្ឋមន្ត្រីក្រសួងសង្គមកិច្ច ក៏នឹងផ្ទេរមុខងារគ្រប់គ្រងមណ្ឌលទៅឲ្យរដ្ឋបាលថ្នាក់ក្រោមជាតិ ដែលជាផ្នែកមួយនៃការគ្រប់គ្រងករណី និងការបង្រួបបង្រួមគ្រួសារនៅក្នុងឆ្នាំ ២០១៥ ផងដែរ។
គួរបញ្ជាក់ថា របាយការណ៍«គោលបំណងដ៏ល្អបំផុត»របស់ UNICEF និងរដ្ឋាភិបាលដែលបាន បោះពុម្ពផ្សាយនៅឆ្នាំ ២០១២ បានបង្ហាញថា កុមារភាគច្រើនដែលស្នាក់នៅក្នុងមណ្ឌលកុមារ កំព្រា មិនមែនជាកុមារកំព្រានោះទេ៕
© រក្សាសិទ្ធិដោយ thmeythmey.com