ជាតិ
សង្គមជាតិ
សង្គមស៊ីវិលស្នើឲ្យដកកងកម្លាំងប្រដាប់អាវុធ និងមន្ត្រីតុលាការចេញពីជួរដឹកនាំគណបក្ស
×![]()
ដោយ: ខន ចំប៉ា
សម្ព័ន្ធដើម្បីការបោះឆ្នោត ដែលហៅកាត់ថា (ERA) និងអង្គការសង្គមស៊ីវិលចំនួន១៥ផ្សេងទៀតបានចេញសេចក្តីថ្លែងការណ៍រួមគ្នាមួយ ដោយបានស្នើឲ្យដកកងកម្លាំងប្រដាប់អាវុធ និងមន្ត្រីតុលាការចេញពីជួរដឹកនាំគណបក្សនយោបាយ។ ក្រុម អង្គការសង្គមស៊ីវិល អះអាងថា ការបញ្ចូលមន្ត្រីតុលាការ និងកងកម្លាំងប្រដាប់អាវុធនេះ គឺជារំលោភលើរដ្ឋធម្មនុញ្ញ នីតិរដ្ឋ គោលការណ៍ប្រជាធិបតេយ្យ ពិសេសការបោះឆ្នោតដោយសេរី និងយុត្តិធម៌។
«ការបញ្ចូលមន្ត្រីតុលាការ និងកងកម្លាំងប្រដាប់អាវុធ គឺជារំលោភលើរដ្ឋធម្មនុញ្ញ នីតិរដ្ឋ គោលការណ៍ប្រជាធិបតេយ្យ ពិសេសការបោះឆ្នោតដោយសេរី និងយុត្តិធម៌»។ នេះជាការលើកឡើង នៅក្នុងសេចក្តីថ្លែងការណ៍រួមគ្នា របស់ម្ព័ន្ធដើម្បីការបោះឆ្នោត ERA និងអង្គការសង្គមស៊ីវិលចំនួន១៥ផ្សេងទៀត ដែលចេញផ្សាយនៅថ្ងៃទី ២៦ខែកុម្ភៈកន្លងទៅ។
សេចក្តីថ្លែងការណ៍នេះ ធ្វើឡើងបន្ទាប់ពីគណបក្សប្រជាជនកម្ពុជា បានដាក់បញ្ចូលមន្ត្រីតុលាការមួយចំនួន និងមន្ត្រីកងកម្លាំងប្រដាប់អាវុធប្រមាណ៨០នាក់ក្នុងជួរយោធា នគរបាល និងកងរាជអាវុធហត្ថ ទៅក្នុងសមាជិកនៃគណៈកម្មាធិការកណ្តាលនៃគណបក្សប្រជាជនកម្ពុជា កាលពីថ្ងៃទី១កុម្ភៈកន្លងទៅ។
ERA និងក្រុមអង្គការសង្គមស៊ីវិល ក៏បានធ្វើការថ្កោលទោសផងដែរ ចំពោះគណបក្សនយោបាយដែលបាន ឬនឹងបញ្ចូលមន្ត្រីតុលាការ និងមន្ត្រីនៃកងកម្លាំងប្រដាប់អាវុធទៅក្នុងជួរដឹកនាំគណបក្សនយោបាយរបស់ខ្លួន ដើម្បីចូលរួមសកម្មភាពគាំទ្រគណបក្សខ្លួន ឬប្រឆាំងគណបក្សផ្សេង និងស្នើឲ្យដកកងកម្លាំងប្រដាប់អាវុធ និងមន្ត្រីតុលាការចេញពីជួរដឹកនាំគណបក្សនយោបាយ ដើម្បីពង្រឹងការអនុវត្តច្បាប់គណបក្សនយោបាយ និងការបោះឆ្នោតសេរី និងយុត្តិធម៌។
លោក ធន សារ៉ាយ ប្រធានសមាគមន៍អាដហុក បានមានប្រសាសន៍ថា៖«ដើម្បីប្រយោជន៍ជាតិ នីតិរដ្ឋ យុត្តិធម៌ត្រឹមត្រូវ គណបក្សនយោបាយត្រូវដកមន្ត្រីតុលាការ កងយោធពលខេមរភូមិន្ទ និងនគរបាលជាតិទាំងនោះចេញ ពីជួរដឹកនាំគណបក្ស»។ លោក បន្តថា៖«មន្ត្រីតុលាការ និងកងកម្លាំងទាំងនោះ ត្រូវតែជាមន្ត្រីដែលមានតំណែងក្នុងវិជ្ជាជីវៈ មិនប្រកាន់គណបក្ស និងត្រូវតែជាមន្ត្រី និងកងកម្លាំងរបស់ជាតិ» ។
សូមបញ្ជាក់ថា ការទាមទារដាក់បញ្ចូល ឬដកចេញនូវមន្ត្រីតុលាការ និងកងកម្លាំងប្រដាប់អាវុធគ្រប់ប្រភេទអាចធ្វើសកម្មភាពនយោបាយនេះ ក៏នឹងត្រូវក្រុមការងារគណបក្សប្រជាជនកម្ពុជា និងក្រុមការងារគណបក្សសង្គ្រោះជាតិ លើកយកពិភាក្សាលើកចុងក្រោយនៅល្ងាចថ្ងៃទី២៨កុម្ភៈនេះ នៅរដ្ឋសភា។
លោក ស ខេង ប្រធានក្រុមតំណាងរាស្ត្រសម្លេងភាគច្រើន និងលោក សម រង្ស៊ី ប្រធានក្រុមតំណាងរាស្ត្រសម្លេងភាគតិច នឹងជួបគ្នាដើម្បីស្វែងរកច្រកចេញពីការខ្វែងគំនិតគ្នាចំនួន១៥ចំណុចដែលនៅសេសសល់៕
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
1 សប្តាហ៍
