អន្តរជាតិ
អ្នកជំនួញចិនម្នាក់ចំណាយប្រាក់ ៨ ៨៨៨ ៨៨៨ ដុល្លារអូស្ត្រាលីទិញអគារមួយនៅមែលប៊ន
×
វិនិយោគិនជនជាតិចិនម្នាក់ បានសង្ឃឹមថាលោកនឹងទទួលបាននូវសំណាងមួយ ក្រោយពេលដែលលោកសម្រេចចិត្តចំណាយប្រាក់ចំនួន ៨ ៨៨៨ ៨៨៨ ដុល្លារអូស្ត្រាលី ប្រហែលនឹង ៦,៩៦ លានដុល្លារអាមេរិកដើម្បីទិញអគារការិយាល័យកម្ពស់បីជាន់មួយ នៅក្នុងទីក្រុងមែលប៊ន ប្រទេសអូស្ត្រាលី។ នេះបើយោងតាមទីភ្នាក់ងារព័ត៌មាន Xinhua ។
ប្រភពដដែលបានឲ្យដឹងទៀតថា បើតាមវប្បធម៌របស់ជនជាតិចិន លេខ ៨ ត្រូវបានគិតជាលេខដែលនាំមកនូវសំណាង ជាពិសេសគឺការហូរចូលនូវទ្រព្យសម្បត្តិ។
អគារដែលអ្នកជំនួញចិនទិញនោះ មានទីតាំងស្ថិតនៅផ្លូវលេខ ៤១៥-៤១៧ Collins Street នៅក្នុងទីក្រុងមែលប៊ន។ អគារនេះត្រូវគេប្រកាសដាក់លក់ក្នុងតម្លៃប្រមាណ ៥ លានដុល្លារអាមេរិក ប៉ុន្តែអ្នកជំនួញចិនម្នាក់បានដេញថ្លៃឈ្នះ ក្រុមហ៊ុន ៥០ ទៀត ដែលចាប់អារម្មណ៍ចង់ទិញអគារនេះ ជាមួយនឹងតម្លៃខ្ពស់ជាងការរំពឹងទុក។
ការដេញថ្លៃសម្រាប់អគារការិយាល័យនេះ គឺត្រូវចាប់ផ្តើមនៅតម្លៃ៣,១ លានដុល្លារអាមេរិក នៅពេលនោះវាបានទាក់ទាញការចាប់អារម្មណ៍ពីអ្នកដេញថ្លៃ ១២ រូប និង មនុស្សដែលរងចាំឃ្លាំមើលសកម្មភាព ២០០ នាក់ផ្សេងទៀត។ ប៉ុន្តែអ្នកជំនួញជនជាតិចិន ដែលមិនត្រូវបានគេបញ្ចេញឈ្មោះម្នាក់ បានឈ្នះការដេញថ្លៃទិញអគារនេះ ជាមួយនឹងតម្លៃដែលលោកគិតថានាំសំណាងមកឲ្យលោក គឺ ៨ ៨៨៨ ៨៨៨ ដុល្លារអូស្ត្រាលី។
ភ្នាក់ងារអចលនទ្រព្យលោក Josh Rutmanពីក្រុមហ៊ុន CBRE ប្រទេសអូស្ត្រាលីបានឱ្យដឹងថាដោយសារតែការធ្លាក់ចុះនៃតម្លៃប្រាក់ដុល្លារនិងអត្រាការប្រាក់នៅអូស្ត្រាលី ទើបអ្នកវិនិយោគក្រៅប្រទេស ត្រូវតែត្រៀមខ្លួនដើម្បីដេញថ្លៃឲ្យខ្ពស់ជាងតម្លៃដែលគេប្រកាសលក់។
លោក Rutmanបានបញ្ជាក់ថាមានកត្តាពីរដែលធ្វើឲ្យអគារនេះ លក់លើសពីតម្លៃដាក់លក់ ដល់ទៅជាង ២ លានដុល្លារនោះ គឺដោយសារតែកត្តាទីតាំងនិងប្រវត្តិសាស្ត្ររបស់អគារមួយ នេះ។តម្លៃហុងស៊ុយរបស់អគារមួយនេះ គឺមានន័យថាទីតាំងនៅក្នុងអគារនេះក្នុងមួយម៉ែត្រការ៉េ គឺមានតម្លៃ ៨០០០ដុល្លារជាតម្លៃដ៏ថ្លៃកម្របានជួបប្រទះ នៅក្នុងទីផ្សារអចលនទ្រព្យទីក្រុងមែលប៊ន៕
© រក្សាសិទ្ធិដោយ thmeythmey.com