អន្តរជាតិ
នយោបាយអន្តរជាតិ
×![]()
រដ្ឋាភិបាលជប៉ុនបានសម្រេចបន្តដាក់ទណ្ឌកម្មទៅលើកូរ៉េខាងជើងរយៈពេលពីរឆ្នាំបន្ថែមដើម្បីឆ្លើយតបទៅនឹងភាពព្រងើយកន្តើយរបស់រដ្ឋាភិបាលទីក្រុងព្យុងយ៉ាងចំពោះការទាមទាររបស់ជប៉ុនលើការស៊ើបអង្កេតជុំវិញករណីបទល្មើសនៃការចាប់ជម្រិតជនជាតិជប៉ុនកាលពីចន្លោះឆ្នាំ១៩៧០និង១៩៨០។
ម្សិលមិញនេះ រដ្ឋាភិបាលជប៉ុនបានសម្រេចបន្តដាក់ទណ្ឌកម្មសេដ្ឋកិច្ចជាឯកតោភាគីប្រឆាំងរដ្ឋាភិបាលទីក្រុងព្យុងយ៉ាងរយៈពេលពីរឆ្នាំបន្ថែម។ទណ្ឌកម្មនេះធ្វើឡើងក្រោយពីជប៉ុនបានស្នើរឲ្យរដ្ឋាភិបាលទីក្រុងព្យុងយ៉ាងធ្វើការស៊ើបអង្កេតលើបទល្មើសនៃការចាប់ជម្រិតជនជាតិជប៉ុន១៣នាក់កាលពីចន្លោះឆ្នាំ១៩៧០និង១៩៨០តែគ្មានការឆ្លើយតបណាមួយរបស់ក្រុងព្យុងយ៉ាងមកវិញឡើយ។
បើយោងតាមអ្នកនាំពាក្យរបស់រដ្ឋាភិបាលជប៉ុនលោក Yoshihide Suga រដ្ឋាភិបាលនឹងបន្តទណ្ឌកម្មសេដ្ឋកិច្ចដែលនឹងត្រូវផុតកំណត់នៅខែមេសាខាងមុខនេះទៅលើកូរ៉េខាងជើងរយៈពេលពីរឆ្នាំបន្ថែមទៀត។ក្នុងនោះដូចដែលបានអនុវត្តកន្លងមករដ្ឋាភិបាលជប៉ុនបានហាមឃាត់នាវាដឹកទំនិញគ្រប់ប្រភេទរបស់កូរ៉េខាងជើងមិនឲ្យឆ្លងកាត់កំពង់ផែរបស់ជប៉ុននោះទេ។
គួររម្លឹកផងដែរកាលឆ្នាំ២០០២កន្លងទៅនេះកូរ៉េខាងជើងធា្លប់បានសារភាពថាខ្លួនពិតបានចាប់ជំរិតជនជាតិជប៉ុន១៣នាក់កាលពីឆ្នាំ១៩៧០និង១៩៨០មែន។ហើយក្នុងចំណោម១៣នាក់នោះមាន៥នាក់ត្រូវបានបញ្ជូនត្រលប់ទៅកាន់ប្រទេសជប៉ុនវិញហើយនិង៨នាក់ផ្សេងទៀតគឺបានស្លាប់ហើយ។
យ៉ាងណាមិញសំណុំរឿងនេះមិនត្រូវបានរដ្ឋាភិបាលកូរ៉េខាងជើងដាក់ចេញចំណាត់ការណាមួយដើម្បីរកយុត្តិធម៌និងការពិតជូនជនរងគ្រោះនិងរដ្ឋាភិបាលជប៉ុននោះទេ។ដូច្នេះអ្វីដែលរដ្ឋាភិបាលជប៉ុនអាចធ្វើបាននោះគឺមានតែបន្តដាក់ទណ្ឌកម្មសេដ្ឋកិច្ចដើម្បីជាការដាក់សម្ពាធលើកូរ៉េខាងជើងបន្ថែមទៀតតែប៉ុណ្ណោះ៕
© រក្សាសិទ្ធិដោយ thmeythmey.com
