អន្តរជាតិ
នយោបាយអន្តរជាតិ
×![]()
ថ្ងៃ១មេសាម្សិលមិញនេះ ប៉ាឡេស្ទីន បានក្លាយជាសមាជិកពេញសិទ្ធិនៃតុលាការព្រហ្មទណ្ឌ អន្តរជាតិក្រោយពីរង់ចាំអស់រយៈពេលច្រើនខែក្រោយចុះហត្ថលេខាលើលក្ខន្តិកៈក្រុងរ៉ូមស្តីពីតុលាការព្រហ្មទណ្ឌអន្តរជាតិ។ ការក្លាយខ្លួនជាសមាជិកនៃតុលាការព្រហ្មទណ្ឌអន្តរជាតិ ផ្តល់ ក្តីសង្ឃឹមដល់ប្រជាជន និងរដ្ឋាភិបាលប៉ាឡេស្ទីន ក្នុងការនាំយកអ៊ីស្រាអែល មកកាត់ ទោស ដោយប្រព្រឹត្តបទឧក្រិដ្ឋប្រឆាំងមនុស្សជាតិនៅកាហ្សា។
មានសំឡេង
លក្ខន្តិកៈក្រុងរ៉ូម ស្តីពីតុលាការព្រហ្មទណ្ឌអន្តរជាតិ បានចូលជាធរមាន សម្រាប់ប៉ាឡេស្ទីន កាលពីម្សិលមិញនេះ ដែលនេះមានន័យថាប៉ាឡេស្ទីន ក្លាយជាសមាជិកផ្លូវការនៃតុលាការដែលមានស្នាក់ការនៅក្រុងឡាអេមួយនេះហើយ។ ការក្លាយជាសមាជិកនៃតុលាការព្រហ្មទណ្ឌអន្តរជាតិត្រូវបាន គេហៅថាជាជំហានដ៏សំខាន់មួយសម្រាប់ប៉ាឡេស្ទីន ក្នុងការស្វែងរកយុត្តិធម៌ជូនប្រជាជន នៅក្នុងតំបន់កាហ្សា។ ការសម្រេចជ្រើសរើសការចូលរួមជាមួយតុលាការក្រុងឡាអេនេះ កើតឡើងក្រោយមានសង្គ្រាមអ៊ីស្រាអែលប្រឆាំងប្រជាជនកាហ្សា និងការបរាជ័យក្នុងការស្វែងរកសន្តិភាពរវាងអ៊ីស្រាអែលនិងប៉ាឡេស្ទីន។
ម្សិលមិញនេះអ្នកនាំពាក្យតុលាការព្រហ្មទណ្ឌអន្តរជាតិFadi El Abdallahបានលើកឡើងថា ប៉ាឡេស្ទីន បានក្លាយជាសមាជិកនៃតុលាការព្រហ្មទណ្ឌអន្តរជាតិពេញសិទ្ធិ ហើយប៉ាឡេស្ទីនមានសិទ្ធិ និងកាតព្វកិច្ចដូចសមាជិកទូទៅដែរ។ បើតាមមន្ត្រីម្នាក់នេះ យុត្តាធិការរបស់តុលាការឧក្រិដ្ឋកម្មនេះ នឹងគ្របដណ្តប់រាល់សំណុំរឿងដែលកើតមានឡើងនៅក្នុងទឹកដីប៉ាឡេស្ទីន ដោយសារប៉ាឡេស្ទីនប្រកាសទទួលយកយុត្តាធិការរបស់តុលាការរួចរាល់ហើយ។ ហើយយុត្តាធិការតុលាការ មានអនុភាពប្រតិសកម្ម ដោយតុលាការនឹងមានអំណាចពិចារណាលើការស៊ើបអង្កេត និងកាត់ទោសឧក្រិដ្ឋជន ដែលប្រព្រឹត្តបទឧក្រិដ្ឋប្រឆាំងមនុស្សជាតិដែលកើតឡើងតាំងពីថ្ងៃ ១៣ខែ កក្កដាឆ្នាំមុនផង។
គួររម្លឹកថា បទឧក្រិដ្ឋកើតឡើងតាំងខែកក្កដាឆ្នាំ ២០១៤នោះ គឺសំដៅលើសង្គ្រាមអាកាសរបស់រដ្ឋាភិបាលអ៊ីស្រាអែល នៅក្នុងតំបន់កាហ្សា។ អ៊ីស្រាអែលបានបើកការវាយប្រហារយ៉ាងព្រៃផ្សៃនៅតំបន់កាហ្សា ដោយអះអាងថា ដើម្បីប្រឆាំងក្រុមហាម៉ាសដែលបានបាញ់ផ្លោងគ្រាប់រ៉ុកកែត ប្រឆាំងនឹងកងកម្លាំងរបស់ខ្លួននោះ។ ការវាយប្រហាររបស់កងកម្លាំងអ៊ីស្រាអែលកាលនោះ បានសម្លាប់ប្រជាជនស៊ីវិលនៅតំបន់កាហ្សារាប់ពាន់នាក់ និងបំផ្លាញផ្ទះសម្បែងប្រជាជនអស់រាប់រយខ្នងផង។
យ៉ាងណាក៏ដោយ ជុំវិញការនាំយកអ៊ីស្រាអែលមកកាត់ទោសតាមផ្លូវច្បាប់នោះ នៅតែជារឿងចម្រូងចម្រាស និងស្រពិចស្រពិលនៅឡើយ។ កន្លងមកប្រមុខរដ្ឋាភិបាលអ៊ីស្រាអែល លោក បិនចាមិន ណេតាន់យ៉ាហ៊ូ បានប្រកាសថា មិនអោយកងទ័ពអ៊ីស្រាអែល ណាម្នាក់ត្រូវគេយកទៅកាត់ទោសនោះឡើយ។ នេះមានន័យថាអ៊ីស្រាអែល នឹងធ្វើគ្រប់យ៉ាងដើម្បីការពារកងទ័ពខ្លួន ក្នុងសំណុំរឿងសង្គ្រាមកាហ្សា។
យ៉ាងណាមិញ ការនាំយកឧក្រិដ្ឋជនណាមួយមកកាត់ទោស តាមតុលាការព្រហ្មទណ្ឌនេះមិនមែនជារឿងងាយស្រួលឡើយ ព្រោះបើឧក្រិដ្ឋជនមានខ្នងបង្អែក កុំសង្ឃឹមថា តុលាការអាចមានយុត្តាធិការកាត់ក្តីអោយសោះ។ ប៉ុន្តែក្នុងសំណុំរឿងឧក្រិដ្ឋកម្មប្រឆាំងមនុស្សជាតិ បង្កដោយអ៊ីស្រាអែលប្រែប្រួល ដោយសារភាពល្អក់ករកនៃទំនាក់ទំនងអ៊ីស្រាអែល និងសហរដ្ឋអាមេរិក ក្នុងរយៈពេលកន្លងមក ដែលមានន័យថាអាមេរិកអាចនឹងព្រលែងអោយតុលាការចាត់ការអ៊ីស្រាអែលក៏ថាបាន៕
© រក្សាសិទ្ធិដោយ thmeythmey.com
