អន្តរជាតិ
នយោបាយអន្តរជាតិ
រដ្ឋធម្មនុញ្ញថៃថ្មីទទួលស្គាល់នាយករដ្ឋមន្ត្រីអាចឡើងកាន់តំណែងដោយរដ្ឋប្រហារ
× គណៈកម្មាធិការព្រាងច្បាប់រដ្ឋធម្មនុញ្ញថៃ បានសម្រេចដាក់បញ្ចូលបទបញ្ញត្តិសំខាន់នៅក្នុងសេចក្តីព្រាងរដ្ឋធម្មនុញ្ញថ្មី ដែលក្នុងនោះរួមមាននាយករដ្ឋមន្ត្រី និងព្រឹទ្ធសភាអាចកើតចេញពីការតែងតាំង បានប្រសិនបើប្រទេសធ្លាក់ក្នុងវិបត្តិ។ ការបញ្ចូលបទបញ្ញត្តិនេះ ធ្វើឡើងតាមរយៈ នៃសំំណើររបស់លោកនាយករដ្ឋមន្ត្រីរដ្ឋប្រហារ ប្រាយុទ្ធ ចាន់អូចា។
កាលពីពេលថ្មីនេះ គណៈកម្មាធិការព្រាងច្បាប់រដ្ឋធម្មនុញ្ញថៃ បានសម្រេចដាក់បញ្ចូលបទបញ្ញត្តិថ្មិពីរទៅក្នុងសេចក្តីព្រាងរដ្ឋធម្មនុញ្ញថៃថ្មី ដោយបានកំណត់ថានាយករដ្ឋមន្ត្រី និង ព្រឹទ្ធសភាអាចកើតចេញពីការតែងតាំងបាន នៅពេលដែលប្រទេសធ្លាក់ចូលនៅក្នុងវិបត្តិ។
បើយោងតាមអ្នកនាំពាក្យរបស់គណៈកម្មាធិការព្រាងរដ្ឋធម្មនុញ្ញ លោក Lertrat Rattanawanit គណៈកម្មាធិការបានសម្រេចដាក់បញ្ចូលបញ្ញត្តិដ៏ចម្រោងចម្រាស់ស្តីពីការឡើងកាន់តំណែងរបស់នាយករដ្ឋមន្ត្រី ទៅក្នុងប្រការទី១៨២ នៃសេចក្តីព្រាងរដ្ឋធម្មនុញ្ញថ្មី។ ហើយប្រការនេះ គឺជាការបើកផ្លូវនិងការទទួលស្គាល់ដោយស្របច្បាប់ទៅលើនាយករដ្ឋមន្ត្រី ដែលឡើងកាន់អំណាចដោយការតែងតាំង ជាពិសេសនោះការកាន់តំណែងដោយរដ្ឋប្រហារ យោធាដូចដែលបានកើតឡើងកាលពីថ្ងៃទី២២ ខែឧសភា ជាឧទាហរណ៍។
លោកបានបន្ថែមទៀតថា គណៈកម្មាធិការក៏បានកែប្រែបទបញ្ញត្តិនៃការឡើងកាន់តំណែង របស់សមាជិកព្រឺទ្ធសភាទាំង ២០០នាក់ផងដែរ។ ក្នុងនោះសមាជិកត្រូងជ្រើសតាំងតាមរបៀប វារៈបី រួមមានសមាជិក ៧៧រូបត្រូវកើតចេញពីការបោះឆ្នោតពីខេត្តទាំង៧៧ សមាជិក ៦៥រូប ត្រូវកើតចេញបីការតែងតាំងអតីតមន្ត្រីជាន់ខ្ពស់ និង សមាជិករបស់អង្គការជំនាញ និង ៥៨រូប ផ្សេងទៀត ត្រូវជ្រើសតាំងពីអ្នកជំនាញដែលមានវិជ្ជាជីវៈលើវិស័យដូចជា អប់រំ សុខភាព និង ធនធានធម្មជាតិ។
យ៉ាងណាក៏ដោយ បទបញ្ញត្តិនេះ អាចដាក់អនុវត្តជាធរមានបានលុះត្រា មានការអនុម័ត ដែលមានសម្លេងគាំទ្រពីសមាជិកសភាយ៉ាងហោចណាស់ពីរភាគបីទើបបាន។ មួយវិញទៀត បទបញ្ញត្តិនេះ ក៏មានការជំទាស់ខ្លាំងពីគណបក្សនយោបាយថៃធំពីររបស់ថៃផងដែរ ក្នុងនោះ ពួកគេបានទាមទារអោយមានការធ្វើប្រជាមតិជាមុនសិន។
គួររម្លឹកផងដែរ ក្រោយពីមានរដ្ឋប្រហារថ្ងៃទី២២ ខែឧសភា កាលពីឆ្នាំ២០១៤ លោកនាយករដ្ឋ មន្ត្រីប្រាយុទ្ធ ចាន់ អូចា បានសន្យាថានឹងធ្វើការកែទម្រង់ និង នាំលទ្ធិប្រជាធិបតេយ្យត្រលប់ មកក្នុងបរិបទនយោបាយវិញ។ ជាមួយគ្នាដែរ ការកែប្រែរដ្ឋធម្មនុញ្ញ គឺជាគោលការណ៍មួយ សំខាន់នៅក្នុងដំណាក់ការនៃការកែទម្រង់ លោកឧត្តមសេនីយ៍យោធាត្រូវធ្វើមុនពេល នៃ ការបោះឆ្នោតនៅក្នុងឆ្នាំ ២០១៦ ខាងមុខផងដែរ៕
© រក្សាសិទ្ធិដោយ thmeythmey.com