អន្តរជាតិ
ប្រអប់ខ្មៅទី២បញ្ជាក់ថាពីឡុតអម ពិតជាមានចេតនាបើកយន្តហោះ បុកភ្នំ ធ្វើអត្តឃាត ![](https://image.thmeythmey.com/pictures/2015/04/04/germanwings.jpg)
×![]()
កាលពីថ្ងៃព្រហស្បតិ៍ ប៉ូលិសបារាំងបានរកឃើញប្រអប់ខ្មៅទី២របស់យន្តហោះA320 ដែលធ្លាក់នៅតំបន់ភ្នំAlpes ភាគខាងត្បូងបារាំង កាលពីថ្ងៃ២៤មិនាសប្តាហ៍មុន។ យោងតាមទិន្នន័យប្រអប់ខ្មៅទី២នេះ សហពីឡុតអាល្លឺម៉ង់Andreas Lubitz ពិតជាបានធ្វើសកម្មភាពបើកទំលាក់យន្តហោះA320របស់ក្រុមហ៊ុន Germanwings អោយប៉ះទង្គិចភ្នំ ស្លាប់មនុស្សទាំង១៥០នាក់ក្នុងយន្តហោះមែន។
ប្រអប់ខ្មៅទី២របស់យន្តហោះA320 ថតទុកនូវទិន្នន័យផ្សេងៗ ដូចជាល្បឿន កំពស់ និងដំណើររបស់យន្តហោះ។ តាមរយៈប្រអប់ខ្មៅនេះ គេក៏អាចដឹងដែរថា ក្នុងរយៈពេលហោះហើេរ តើពីឡុតបានប្តូរល្បឿនយន្តហោះ រឺក៏ទុកអោយយន្តហោះបើកបរដោយស្វ័យប្រវត្ត។ ប្រអប់ខ្មៅទី២បានបង្ហាញថា ពេលដែលពីឡុតចំបងចេញពីកាប៊ីនបើកបរទៅក្រៅបាត់នោះ ពីឡុតអមAndreas Lubitzដែលនៅក្នុងកាប៊ីនបើកបរតែម្នាក់ឯង បានចុចប៊ូតុងបើកបរស្វ័យប្រវត្តិរបស់យន្តហោះ ដើម្បីអោយយន្តហោះ ហោះចុះទៅទង្គិចភ្នំ។ ពេលយន្តហោះកំពុង ទំលាក់ ខ្លួនចុះនោះ Lubitz ក៏បានដំឡើងល្បឿនយន្តហោះបន្ថែមផងដែរ។ កន្លងមក ក្រុមអង្កេតធ្លាប់ប្រាប់ថា ពេលយន្តហោះបានធ្លាក់ទៅទង្គិចភ្នំ យន្តហោះមានល្បឿនប្រមាណ ៧០០ គីឡូ ម៉ែត្រ ក្នុងមួយម៉ោង។
គួររំលឹកឡើងវិញថា នៅថ្ងៃអង្គារសប្តាហ៍មុន យន្តហោះA320របស់ក្រុមហ៊ុន Germanwings ផ្ទុកមនុស្ស១៥០នាក់ បានចេញដំណើរពីក្រុងបាសេឡូន ប្រទេសអេស្ប៉ាញ ឆ្ពោះទៅក្រុងអាល្លឺម៉ង់Düsseldorf។ ប៉ុន្តែ ពេលឆ្លងកាត់ប្រទេសបារាំង យន្តហោះបានធ្លាក់ ធ្វើអោយមនុស្សស្លាប់គ្មានសល់។ ក្រុមអង្កេតបានរកឃើញប្រអប់ខ្មៅយន្តហោះទី។ ការវិភាគសម្លេងថតទុកក្នុងប្រអប់ខ្មៅទី១នេះ បង្ហាញថា ក្នុងពេលបើកបរ ពីឡុតចំបងបានចេញពីកាប៊ីនបើកបរទៅក្រៅ តែគាត់មិនអាចចូលទៅក្នុងកាប៊ីនបានវិញ។ គាត់បានស្រែកសុំអោយពីឡុតអមLubitzដែលនៅតែម្នាក់ឯងក្នុងកាប៊ីន បើកទ្វាអោយគាត់ តែពីឡុតនោះមិនឆ្លើយតប។
ក្រុមអង្កេតគិតថា ពេលពីឡុតធំចេញក្រៅកាប៊ីននោះ Lubitzបានឆ្លៀតបើកទំលាក់យន្តហោះបុកភ្នំតែម្តង។ មុនរកឃើញប្រអប់ខ្មៅ ក្រុមអង្កេតបានរកឃើញថា ពីឡុតអមLubitzនេះមានបញ្ហាផ្លូវចិត្តធ្ងន់ធ្ងរ។ ដោយសារជំងឺផ្លូវចិត្តនេះ Lubitzមិនអាចបើកបរយន្តហោះក្នុងផ្លូវឆ្ងាយទេ។ ប្រហែលដូច្នេះហើយ ទើបគេកាន់តែតានតឹងក្នុងចិត្តខ្លាំង រហូតធ្វើអត្តឃាតបែបនេះ។ Lubitzធ្លាប់ប្រាប់អតីតសង្សារខ្លួនម្នាក់ថា ថ្ងៃណាមួយ នឹងធ្វើអោយគ្រប់គ្នាចងចាំឈ្មោះLubitzមិនងាយភ្លេច។ ក្រុមអង្កេតក៏បានស្រាវជ្រាវឃើញដែរថា ពីឡុតម្នាក់នេះធ្លាប់បានស្រាវជ្រាវព័ត៌មានផ្សេងៗ ស្តីពីការធ្វើអត្តឃាត។
ក្រោយហេតុការណ៍នេះកើតឡើង ក្រុមហ៊ុនអាកាសចរណ៍មួយចំនួនបានចាត់វិធានការតំរូវអោយមានពីឡុត២នាក់ជាប្រចាំក្នុងកាប៊ីនបើកបរ។ ទន្ទឹមនេះដែរ រដ្ឋាភិបាលអាល្លឹម៉ង់ចង់ផ្លាស់ប្តូរបែបបទធ្វើដំណើរមួយចំនួនរបស់អឺរ៉ុប។ យោងតាមរដ្ឋមន្ត្រីមហាផ្ទៃអាល្លឺម៉ង់ ក្រោយហេតុការណ៍ធ្លាក់យន្តហោះរបស់ក្រុមហ៊ុន Germanwingsនៅបារាំង ក្រុមអង្កេតបានពិនិត្យអត្តសញ្ញាណរបស់មនុស្សគ្រប់គ្នាក្នុងយន្តហោះ ដើម្បីរកមើលក្រែងមានជនសង្ស័យចង់ធ្វើភេរវកម្ម។
ក្រុមអង្កេតខ្លួនឯងក៏មិនច្បាស់ក្នុងចិត្តពីអត្តសញ្ញាណរបស់មនុស្សទាំងអស់គ្នាក្នុងយន្តហោះដែរ។ តាំងពីឆ្នាំ១៩៨៥មក ពលរដ្ឋអឺរ៉ុបត្រូវបានអនុញ្ញាតអោយធ្វើដំណើរដោយសេរីក្នុងបណ្តាប្រទេសសហភាពអឺរ៉ុប ដោយមិនចាំបាច់មានលិខិតឆ្លងដែន។ បើពួកគេត្រូវទិញសំបុត្រធ្វើដំណើរតាមរថភ្លើងទៀតនោះ ការឆែកឆេរអត្តសញ្ញាណពួកគេគឺធូររលុងតែម្តង។ ដើម្បីសុវត្ថិភាពសន្តិសុខ អាល្លឺម៉ង់ចង់ផ្លាស់ប្តូរនយោបាយទាំងនេះឡើងវិញ៕
© រក្សាសិទ្ធិដោយ thmeythmey.com