ជាតិ
បទល្មើសគ្រឿងញៀនចំនួន១,៣៣៧ករណី ត្រូវបានអាជ្ញាធរបង្ក្រាបក្នុងឆ្នាំ២០១៤ លោក កែ កឹមយ៉ាន ប្រធាន អាជ្ញាធរជាតិប្រយុទ្ធប្រឆាំងគ្រឿងញៀន
× យោងតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន ក្នុងឆ្នាំ២០១៤កន្លងទៅ អាជ្ញាធរបង្ក្រាបបានបទល្មើសគ្រឿងញៀនសរុបចំនួន១,៣៣៧ករណី និងឃាត់ខ្លួនជនសង្ស័យបានចំនួន ៣,១៤២នាក់។
របាយការណ៍នេះ ត្រូវបានផ្សព្វផ្សាយនៅក្នុងសន្និបាតបូកសរុបលទ្ធផលការងារត្រួតពិនិត្យគ្រឿងញៀនឆ្នាំ២០១៤ និងលើកទិសដៅការងារឆ្នាំ២០១៥ របស់អាជ្ញាធរជាតិប្រយុទ្ធប្រឆាំងគ្រឿងញៀន កាល ពីចុងខែមីនាកន្លងទៅ នៅទីស្តីការក្រសួងមហាផ្ទៃ។
ទីភ្នាក់ងារសារព័ត៌មានកម្ពុជា បានដកស្រង់ប្រសាសន៍ របស់លោក កែ កឹមយ៉ាន ប្រធាន អាជ្ញាធរជាតិប្រយុទ្ធប្រឆាំងគ្រឿងញៀន ដែលបានថ្លែងនៅក្នុងពិធីនោះថា នៅតាមរាជធានី-ខេត្តមួយចំនួននៅមិនទាន់បានរៀបចំយន្តការប្រយុទ្ធប្រឆាំងគ្រឿងញៀនដល់ថ្នាក់ក្រោមជាតិនៅឡើយ ដែលជាហេតុធ្វើឲ្យសមត្ថកិច្ចនៅថ្នាក់ក្រោមជាតិមួយចំនួន មិនបានអនុត្តន៍ការត្រួតពិនិត្យគ្រឿងញៀនឲ្យអស់លទ្ធភាព ធ្វើឲ្យបទល្មើសជួញដូរគ្រឿងញៀន នៅតាមមូលដ្ឋាននៅតែបន្តកើតមានគួរកឲ្យព្រួយបារម្ភ។
តែយ៉ាងណាក៏ដោយ លោក កែ កឹមយ៉ាន ក៏បានថ្លែងកោតសរសើរថា សកម្មភាពប្រយុទ្ធប្រឆាំងគ្រឿងញៀនក្នុងឆ្នាំ២០១៤កន្លងមកទទួលបានលទ្ធផលល្អ ប៉ុន្តែក៏នៅមានបញ្ហាប្រឈម និងចំណុចខ្វះខាតមួយចំនួនទៀតដែលត្រូវធ្វើការត្រួតពិនិត្យ ដោះស្រាយ និងពង្រឹងយន្តការគ្រប់គ្រង ព្រមទាំងកែលំអបន្ថែមទៀត ដើម្បីរួមចំណែកថែរក្សាសន្តិសុខ និងសណ្តាប់ធ្នាប់ទាំងនៅក្នុងសង្គមកម្ពុជា និងនៅក្នុងពិភពលោក៕
© រក្សាសិទ្ធិដោយ thmeythmey.com