អន្តរជាតិ
រុស្ស៊ីបន្តទាមទារឲ្យផ្អាកការវាយប្រហារក្រុមហ៊ូស៊ីនៅយេម៉ែន ![](https://image.thmeythmey.com/pictures/2015/04/05/542015151252yemen.jpg)
×![]()
សន្តិសុខយេម៉ែនកាន់តែធ្លាក់ដុនដាបខ្លាំង ធ្វើអោយរុស្ស៊ីបង្ខំចិត្តដាក់គំរោងសេចក្តីសម្រេចមួយ ទៅអង្គការសហប្រជាជាតិ សុំអោយផ្អាកយុទ្ធនាការផ្លូវអាកាសកំចាត់ក្រុមហ៊ូស៊ីនៅយេម៉ែន ដែលអារ៉ាប៊ីសាអូឌីតនិងបណ្តាប្រទេសអារ៉ាប់បានធ្វើឡើងតាំងពីថ្ងៃ២៦មិនាមក។
រុស្ស៊ីបានទាមទារអោយក្រុមប្រឹក្សាសន្តិសុខអង្គការសហប្រជាជាតិរៀបចំកិច្ចប្រជុំបន្ទាន់មួយ ស្តីពីយេម៉ែន។ ក្រុងម៉ូស្គូសុំអោយផ្អាកការវាយប្រហារតាមយន្តហោះកំទេច ក្រុមហ៊ូស៊ីនិកាយស៊ីអ៊ីត នៅយេម៉ែន ជាបណ្តោះអាសន្ន ដើម្បីរៀបចំជម្លៀសពលរដ្ឋបរទេស។ ចំណែកអង្គការកាកបាទក្រហមវិញក៏បានសុំអោយផ្អាកការវាយប្រហារនេះដែរ ដើម្បីព្យាបាលប្រជាជនស៊ីវិលក្នុងស្រុក។
យោងតាមផ្នែកសុខាភិបាលយេម៉ែន គិតតាំងពីក្រុមហ៊ូស៊ីចូលទៅក្រុងកំពង់ផែអាដេន ភាគខាងត្បូងប្រទេស នៅថ្ងៃ២៥មិនាមក ការប្រយុទ្ធគ្នាបានសម្លាប់មនុស្ស១៨៥នាក់ និងបង្ករបួសជិត១២៨២នាក់ ភាគច្រើនជាជនស៊ីវិល។ តួលេខនេះមិនគិតពីជនរងគ្រោះជាក្រុមឧទ្ទាមទេ។សមាជិកអង្គការមនុស្សធម៌ជាជនជាតិយេម៉ែនខ្លះ ក៏បានស្លាប់ក្នុងការវាយប្រហារដែរ។ យោងតាមតួលេខចុងក្រោយរបស់អង្គការសហប្រជាជាតិ ចេញផ្សាយកាលពីថ្ងៃព្រហស្បតិ៍វិញ មានមនុស្សជាង៥០០នាក់បានស្លាប់ និង១៧០០នាក់រងរបួស។ តំណាងសុខាភិបាលយេម៉ែនបានអំពាវនាវអោយអង្គការអន្តរជាតិ និងបណ្តាប្រទេសអារ៉ាប់នៅឈូងសមុទ្រពែរស៍ ដែលបានចូលរួមយុទ្ធនាការប្រឆាំងក្រុមហ៊ូស៊ី អោយពួកគេផ្តល់ជំនួយផ្នែកព្យាបាលបន្ទាន់ដល់មន្ទីរពេទ្យនៅក្រុងអាដេន ព្រោះមន្ទីរពេទ្យទាំងនោះអស់ថ្នាំពេទ្យក្នុងស្តុកដើម្បីជួយជនរងគ្រោះហើយ។
ប្រឈមនឹងភាពដុនដាបសន្តិសុខ ម្សិលមិញ កងទ័ពជើងទឹកបារាំងបានជម្លៀសមនុស្ស៤៤នាក់ ក្នុងនោះមានពលរដ្ឋបារាំង៣៦នាក់។ មុននេះ ហ្ស៊កដានី អេហ្ស៊ីប និងអង្គការសហប្រជាជាតិក៏បានជម្លៀសពលរដ្ឋនិងបុគ្គលិកបំរើការខ្លួនដែរ។ ម្សិលមិញ ក្រុមនិកាយស៊ុននីតរាប់រយនាក់បានចូលទៅដណ្តើមក្រុង Moukalla ភាគខាងត្បូង ពីក្រុមអាល់កៃដា។ ក្រុមអាល់កៃដាបានកាន់កាប់ក្រុងនេះ តាំងពីថ្ងៃសុក្រ និងបានដោះលែងអ្នកទោសពីគុក៣០០នាក់។ នៅក្រុង Dhaleh វិញ ក្រុមឧទ្ទាមក៏បានបើកទ្វាគុករំដោះអ្នកទោសជាង៥០០នាក់ដែរ៕
© រក្សាសិទ្ធិដោយ thmeythmey.com