អន្តរជាតិ
នយោបាយអន្តរជាតិ
×![]()
រុស្ស៊ីរងការចោទប្រកាន់ថាជាអ្នកផ្គត់ផ្គង់សព្វាវុធដល់ក្រុមឧទ្ទាមដែលគាំទ្រអ៊ីរ៉ង់និងដែលបានដណ្តើមអំណាចនៅយេម៉ែន។ ការចោទប្រកាន់នេះកើតឡើងក្រោយរុស្ស៊ីស្នើអោយមានកិច្ចប្រជុំក្រុមប្រឹក្សាសន្តិសុខដើម្បីជំរុញអោយអារ៉ាប៊ីសាអូឌីតបញ្ឈប់ការទម្លាក់គ្រាប់នៅយេម៉ែនប្រឆាំងក្រុមឧទ្ទាម Houthisបន្តទៀតក្នុងន័យមនុស្សធម៌។ ការវាយប្រហារតាមផ្លូវអាកាសរយៈពេលប្រហែលជិត២សប្តាហ៍នេះបានសម្លាប់ប្រជាជនស៊ីវិលច្រើនជាងក្រុមឧទ្ទាម ហើយប្រជាជនស៊ីវិលជាច្រើននាក់កំពុងប្រឈមកង្វះខាតស្បៀងអាហារនិងជម្រក។ ប៉ុន្តែមកទល់ម្សិលមិញក្រុមឧទ្ទាមបានប្រកាសចរចាប្រសិនបើអារ៉ាប៊ីសាអូឌីតបញ្ឈប់ការវាយប្រហារនិងដកដៃចេញពីជម្លោះនយោបាយយេម៉ែន។
សូមស្តាប់ការបកស្រាយរបស់លោក សៅ ផលនិស្ស័យ ជុំវិញបញ្ហានេះ៖
មកទល់ថ្ងៃនេះជាថ្ងៃទី ១១ហើយដែលអារ៉ាប៊ីសាអូឌីត ដឹកនាំកងកម្លាំងសម្ព័ន្ធមិត្តទម្លាក់គ្រាប់បែកប្រឆាំងក្រុមឧទ្ទាមឥស្លាមនិកាយស៊ីអ៊ីតនៅយេម៉ែន។ ប្រទេសចំនួន ៤ដែលចូលរួមក្នុងការវាយប្រហារស្ថិតក្រោមការដឹកនាំរបស់អារ៉ាប៊ីសាអូឌីតនេះក្នុងនោះមាន អេហ្ស៊ីប ហ្សកដានី ម៉ារ៉ុក និងស៊ូដង់ផង។ មនុស្សជាច្រើននាក់ដែលភាគច្រើនជាជនស៊ីវិលត្រូវបានគេជឿជាក់ថាបានស្លាប់ក្នុងការវាយប្រហារនេះ។ បើយោងតាមស្ថាប័នសិទ្ធិមនុស្ស ចំនួនអ្នកស្លាប់ក្នុងការវាយប្រហាររវាងរដ្ឋអារ៉ាប់និង ក្រុមឧទ្ទាមដែលដណ្តើមអំណាច Houthisនោះកើតឡើងដល់ជាង ៥០០នាក់ និងរាប់ពាន់នាក់ផ្សេងទៀតរងបួសផងដែរ។ មនុស្សដេកស្លាប់រណូករណែលតាមផ្លូវគួរអោយអាសូរ ប្រជាជនភាគច្រើនកំពុងស្ថិតក្នុងភាពគ្រោះថ្នាក់ ដោយការប្រយុទ្ធគ្នាផង និងដោយសារកង្វះខាតឱសថប្រើប្រាស់និងស្បៀងអាហារចិញ្ចិមជីវិតផង។
បញ្ហាគួរអោយព្រួយបារម្ភបច្ចុប្បន្ននៅយេម៉ែនបច្ចុប្បន្ននោះ គឺមន្ទីរពេទ្យប្រឈមកង្វះខាតថ្នាំសង្កូវសម្រាប់ព្យាបាលអ្នករបួសក្នុងការប្រយុទ្ធគ្នានេះ ដែរនេះបញ្ជាក់ថាជនរងគ្រោះប្រឈមមុខនឹងការស្លាប់បាត់បង់ជីវិតដោយសារបញ្ហានេះ។ ចំណែកប្រជាជនក្រីក្រជាជនស៊ីវិលយេម៉ែននោះ ក៏កំពុងរងទុក្ខវេទនាដោយសារតែពួកគេខ្វះខាតស្បៀងអាហារ និងជំរកស្នាក់នៅដែលមានសុវត្ថិភាព។
១. រុស្ស៊ីស្នើសុំអោយបញ្ឈប់ការទម្លាក់គ្រាប់ក្នុងគោលការណ៍មនុស្សធម៌
ដោយសារបញ្ហានៅយេម៉ែនកាន់តែធ្ងន់ធ្ងរឡើង បេសកជនរុស្ស៊ីប្រចាំនៅក្រុមប្រឹក្សាសន្តិសុខបានស្នើអោយមានកិច្ចប្រជុំក្នុងក្រុមប្រឹក្សាសន្តិសុខលើបញ្ហាវិបត្តិយេម៉ែន ដោយរុស្ស៊ីស្នើអោយមានការដាក់សម្ពាធអោយអារ៉ាប៊ីសាអូឌីត អោយផ្អាកឬបញ្ឈប់ការវាយប្រហារផ្លូវអាកាសដើម្បីធានាថាប្រជាជនរួចផុតពីគ្រោះថ្នាក់និងទទួលបានជំនួយមនុស្សធម៌ពីក្រុមភ្នាក់ងារមនុស្សធម៌អន្តរជាតិ។ ទោះមានការដង្ហើយអោយក្រុមប្រឹក្សាសន្តិសុខដាក់សម្ពាធលើរដ្ឋអារ៉ាប់អោយឈប់ទម្លាក់គ្រាប់បែកក៏ដោយ ក្រុមប្រឹក្សាសន្តិសុខមិនទាន់ឯកភាពលើសេចក្តីព្រាងដំណោះស្រាយរបស់រុស្ស៊ីទេ ដោយសារក្រុមរដ្ឋឈូងសមុទ្រពែក្យបានស្នើអោយមានដំណោះស្រាយដោយឡែកដាក់ទណ្ឌកម្មនិងបិទការនាំចូលសព្វាវុធរបស់ក្រុម Houthis ផង។ យ៉ាងណាមិញ មិនមែនតែរុស្ស៊ីទេដែលមើលឃើញពីគ្រោះមហន្តរាយមនុស្សជាតិនៅក្នុងប្រទេសយេម៉ែន ព្រោះកាលពីម្សិលមិញភ្នាក់ងារកាកបាទក្រហមអន្តរជាតិក៏ស្នើសុំអោយមានការបញ្ឈប់ការប្រយុទ្ធ ២៤ម៉ោង ដើម្បីបើផ្លូវអោយមានការបញ្ជូនជំនួយមនុស្សធម៌មួយចំនួនទៅតំបន់រងគ្រោះខ្លាំង។ យ៉ាងណាក៏ដោយដំបូងខាងក្រុមសម្ព័ន្ធប្រទេសដែលវាយប្រហារក្រុមឧទ្ទាម Houthisថ្លែងថាជំនួយអាចអនុញ្ញាតអោយចូលបានក្នុងកាលៈទេសៈសមស្របប៉ុណ្ណោះ ប៉ុន្តែក្រោយមកក៏ឯកភាពអោយមានការបញ្ជូនស្បៀងនិងថ្នាំសង្កូវខ្លះតាមរយៈយន្តហោះពីរគ្រឿង។
២.រុស្ស៊ីរងការចោទប្រកាន់ថាបានផ្គត់ផ្គង់អាវុធដល់ក្រុមឧទ្ទាម
តាមពិតទៅរុស្ស៊ី ចិន និងអ៊ីរ៉ង់សុទ្ធតែមានជំហរប្រឆាំងការអន្តរាគមន៍យោធានៅក្នុងប្រទេសយេម៉ែនដឹកនាំដោយអារ៉ាប៊ីសាអូឌីត ប៉ុន្តែសហរដ្ឋអាមេរិកនិងសម្ព័ន្ធមិត្តខ្លួនគាំទ្រការអន្តរាគមន៍យោធា។ រដ្ឋអារ៉ាប់ និងអង្គការសហប្រជាជាតិចាត់ទុករដ្ឋាភិបាលយេម៉ែនដែលនិរទេសជារដ្ឋាភិបាលស្របច្បាប់ និងចាត់ទុកក្រុមឧទ្ទាមជាក្រុមប្រឆាំងរដ្ឋាភិបាលនិងបង្កគ្រោះថ្នាក់ដល់ប្រទេស។ កាលពីប៉ុន្មានថ្ងៃមុនក្រុមអ្នកគាំទ្ររដ្ឋាភិបាលប្រធានាធិបតីធ្លាក់ពីតំណែងAbedrabbo Mansour Hadi បានចោទប្រកាន់ក្រុងម៉ូស្គូថា រដ្ឋាភិបាលនេះបានឆ្លៀតប្រើប្រាស់យុទ្ធនាការជម្លៀសជនជាតិខ្លួននៅយេម៉ែនដើម្បីផ្គត់ផ្គង់អាវុធអោយក្រុមឧទ្ទាមប្រឆាំងរដ្ឋាភិបាល។ អាវុធយុទ្ធភ័ណ្ឌត្រូវបានរៀបចំទុកក្នុងយន្តហោះស៊ីវិលដឹកអ្នកដំណើរ ដើម្បីជួយផ្គត់ផ្គង់ដល់ក្រុមឧទ្ទាម។ យ៉ាងណាក៏ដោយ រុស្ស៊ីបានទាត់ចោលការចោទប្រកាន់នេះ ដោយបញ្ជាក់ថាខ្លួនមិនលូកដៃចូលក្នុងកិច្ចការផ្ទៃក្នុងយេម៉ែនឡើយ ប៉ុន្តែរុស្ស៊ីវាយប្រហាររដ្ឋមន្ត្រីការបរទេសយេម៉ែនវិញថា ការចោទប្រកាន់រុស្ស៊ីគ្មានមូលដ្ឋានច្បាស់លាស់ជាការបង្ករឿងនិងជាកង្វះខាតការទទួលខុសត្រូវមួយផងដែរ។ រុស្ស៊ី អ៊ីរ៉ង់និងចិន ជារឿយៗស្នើអោយអារ៉ាប៊ីសាអូឌីតបញ្ចប់ការលូកលាន់ករកូករកាយបញ្ហាយេម៉ែនដោយប្រើប្រាស់កម្លាំងទៀត ប៉ុន្តែជំរុញអោយមានការប្រើការពិភាក្សានិងវិធានការដោះស្រាយជម្លោះដោយសន្តិវីធីផ្សេងទៀត។
៣.អារ៉ាប៊ីសាអូឌីតស្នើសុំរដ្ឋាភិបាលប៉ាគីស្ថានអោយផ្តល់ការអន្តរាគមន៍យោធា
ខណៈពេលដែលមានការអំពាវនាវអោយបញ្ចប់ការវាយប្រហារតាមផ្លូវអាកាស រដ្ឋភិបាលក្រុងរីយ៉ាដ បានស្នើសុំចំៗទៅរដ្ឋាភិបាលក្រុងឥស្លាមបាតអោយជួយផ្តល់អន្តរាគមន៍យោធាគាំទ្រខ្លួននិងប្រឆាំងក្រុមឧទ្ទាម Houthisថែមទៀតផង។ ក្រុងរីយ៉ាដកំពុងប្រឹងទាញមហាអំណាចនុយក្លេអ៊ែរអាស៊ីខាងត្បូងប៉ាគីស្ថានអោយចូលប្រឡូកក្នុងសង្គ្រមអ៊ីរ៉ង់ និងអារ៉ាប៊ីសាអូឌីតនៅយេម៉ែនផង ។ គ្មានអ្វីចម្លែកទេដែលអារ៉ាប៊ីសាអូឌីតស្នើសុំជំនួយពីក្រុងឥស្លាមបាត ព្រោះភាគច្រើននៃប្រជាជនប៉ាគីស្ថានជាជនជាតិឥស្លាមប្រកាន់និកាយស៊ូនីដូចរដ្ឋអារ៉ាប់ផ្សេងទៀតដែរហើយប៉ាគីស្ថាននេះក៏ប្រឆាំងក្រុម Houthisដែលជាក្រុមប្រកាន់ស៊ីអ៊ីតផង។ បច្ចុប្បន្នប៉ាគីស្ថានកំពុងជជែកដេញដោលក្នុងរឿងអន្តរាគមន៍ក្រោយមានការស្នើពីនាយករដ្ឋមន្ត្រីNawaz Sharif ប៉ុន្តែការចូលរួមរបស់ប៉ាគីស្ថានវាមិនមែនជាជម្រើសល្អនោះឡើយក្នុងការបញ្ចប់ជម្លោះយេម៉ែន។
៤. អារ៉ាប៊ីសាអូឌីតនិងអ៊ីរ៉ង់ត្រូវដកដៃ ទុកអោយភាគីជម្លោះផ្តើមចរចាគ្នា
ជម្លោះប្រដាប់អាវុធយេម៉ែនលែងជាជម្លោះនយោបាយក្នុងប្រទេសធម្មតាទៀតហើយ ប៉ុន្តែវាជាសង្គ្រាមរវាងមហាអំណាចតំបន់ម្ខាងគាំទ្ររដ្ឋឥស្លាមនិកាយស៊ូនី (អារ៉ាប៊ីសារអូឌីត) ម្ខាងគាំទ្រដោយរដ្ឋឥស្លាមប្រកាន់និកាយស៊ីអ៊ីត (អ៊ីរ៉ង់)។ ការបញ្ចប់វិបត្តិនៅយេម៉ែនជារឿងស្មុគស្មាញប៉ុន្តែវាមិនលំបាកខ្លាំងឡើយ។ ឬសគល់នៃជម្លោះនយោបាយផ្តើមចេញពីការបែងចែកអំណាចក្នុងប្រទេសប៉ុណ្ណោះ ដូច្នេះដើម្បីអាចបញ្ចប់ជម្លោះបានមហាអំណាចនៅពីក្រោយភាគីជម្លោះគួរដកដៃចេញ អនុញ្ញាតអោយក្រុមឧទ្ទាម និងរដ្ឋាភិបាលលោក Hardiចរចាគ្នាលើការដឹកនាំនិងចែករម្លែកអំណាចឡើងវិញ។ ផ្ទុយទៅវិញមហាអំណាចពិភពលោក តំបន់ក្តី និងអង្គការអន្តរជាតិក្តីត្រូវដាក់សម្ពាធ និងជំរុញភាគជម្លោះអោយចូលតុចរចាជាងជាងប្រើកម្លាំងប្រឆាំងគ្នា។ សូមបញ្ជាក់ថា បច្ចុប្បន្ននេះ ក្រុមឧទ្ទាមបានបង្ហាញជំហរចង់ចរចាជាមួយរដ្ឋាភិបាល កាលណាបើអារ៉ាប៊ីសាអូឌីតឈប់ទម្លាក់គ្រាប់ប្រឆាំងខ្លួននោះ៕
© រក្សាសិទ្ធិដោយ thmeythmey.com
