អន្តរជាតិ
បុរសម្នាក់ចំណាយជាង៨ម៉ឺនដុល្លារដើម្បីចុះផ្សាយលិខិតសុំទោសមិត្តស្រីលើទំព័រកាសែត ![](https://image.thmeythmey.com/pictures/2015/04/06/apology-ad.jpg)
×![]()
បុរសជនជាតិចិនម្នាក់បានចំណាយប្រាក់យ៉ាងច្រើន ដើម្បីចុះផ្សាយលិខិតសុំអភ័យទោស ចំពោះមិត្តស្រីរបស់គាត់នៅក្នុងកាសែតដ៏ល្បីមួយក្នុងទីក្រុងប៉េកាំង ក្នុងបំណងចង់យកឈ្នះលើបេះដូងរបស់មិត្តស្រី នៅក្នុងខួបនៃការស្រលាញ់គ្នារបស់ពួកគេ។
បុរសម្នាក់នេះបានចំណាយប្រាក់សម្រាប់ការចុះផ្សព្វផ្សាយពាណិជ្ជកម្មដើម្បីសុំទោសមិត្តស្រីរបស់គាត់ចំនួន ៤ ទំព័រនៅក្នុងកាសែត Beijing Youth Daily ដែលជាកាសែតដ៏ល្បីមួយក្រុងប៉េកាំង ដែលបានចេញផ្សាយកាលថ្ងៃទី២ ខែមេសាកន្លងទៅនេះ។
នៅក្នុងទំព័រទីមួយគឺមានរូបថតរបស់បុរសម្នាក់នេះនិងមិត្តស្រីរបស់គាត់និងនៅលើទំព័រមួយទៀតគឺលិខិតសុំទោសមួយដែលបានសរសេរជាភាសាអង់គ្លេស។ ចំណែកឯពីរទំព័របន្ទាប់ទៀត គឺមានតែបោះពុម្ពជាពាក្យខ្លីមួយឃ្លាដែលសរសេរថា «ខ្ញុំទុកពីរទំព័រនេះឲ្យនៅទទេព្រោះខ្ញុំមិនដឹងត្រូវសរសេរអ្វីទៀតនោះទេ»។
តម្លៃនៃចុះផ្សាយលិខិតសុំទោសមិត្តស្រីរបស់បុរសម្នាក់នេះ នៅក្នុងកាសែតចំនួន ៤ ទំព័រខាងលើនោះ ត្រូវបានភ្នាក់ងារផ្សាយពាណិជ្ជកម្មបានទម្លាយឲ្យដឹងថា គឺវាមានតម្លៃចាប់ពី ជាង ៨ ម៉ឺនទៅ ៩,៦ ម៉ឺនដុល្លារ។បុរសម្នាក់នេះ ចង់ឈ្នះមិត្តស្រីរបស់គាត់បន្ទាប់ពីមានបញ្ហាឈ្លោះគ្នាកាលពីពេលថ្មីៗកន្លងទៅ ហើយការសុំទោសនេះគឺបានធ្វើឡើងក្នុងឱកាស គម្រប់ខួបបីខែនៃស្នេហារបស់ពួកគេ៕
© រក្សាសិទ្ធិដោយ thmeythmey.com