អន្តរជាតិ
នយោបាយអន្តរជាតិ
រុស្ស៊ីបញ្ជូនមីស៊ីលទៅស៊ីរី បើអ៊ីស្រាអែលហ៊ានលក់អាវុធអោយអ៊ុយក្រែន
×
រដ្ឋាភិបាលរុស្ស៊ីបានព្រមានអ៊ីស្រាអែលពីផលវិបាក ក្រោយពេលដែលអ៊ីស្រាអែលចង់លក់អាវុធទៅអោយរដ្ឋាភិបាលអ៊ុយក្រែន។ តាមពិតទៅអ៊ីស្រាអែលប៉ងលក់អាវុធអោយអ៊ុយក្រែន ដោយផ្គើនរុស្ស៊ីដែលបានដកការហាមឃាត់ការលក់អាវុធ និងត្រៀមបញ្ជូនប្រព័ន្ធមីស៊ីលS-300ទៅអោយសត្រូវខ្លួនរដ្ឋាភិបាលក្រុងតេអ៊ីរ៉ង់កាលពីសប្តាហ៍មុន។ អ៊ីស្រាអែលមិនសប្បាយចិត្តទាល់តែសោះនៅពេលដែលរុស្ស៊ីធ្វើបែបនេះ ព្រោះបើអ៊ីរ៉ង់បានប្រព័ន្ធការពារដែនអាកាសពីរុស្ស៊ី យន្តហោះអ៊ីស្រាអែលមិនសង្ឃឹមថាចូលដីអ៊ីរ៉់ងចុះឡើយ។
សូមស្តាប់ការបកស្រាយរបស់លោក សៅ ផលនិស្ស័យ៖
ក្រោយពីអន់ចិត្តរឿងរុស្ស៊ីចាប់ផ្តើមផ្គត់ផ្គង់សព្វាវុធទៅអោយរដ្ឋាភិបាលអ៊ីរ៉ង់ដែលជាសត្រូវខ្លួន អ៊ីស្រាអែលចេញមុខប្រកាសលក់សព្វាវុធទៅអោយក្រុងគៀវដែលកំពុងស្ថិតក្នុងជម្លោះជាមួយក្រុមឧទ្ទាមភាគខាងកើតគាំទ្ររុស្ស៊ី។ មិនមែនជារឿងចម្លែកទេដែលអ៊ីស្រាអែលចាំបាច់ធ្វើបែបនេះ ព្រោះអ៊ីស្រាអែលចង់ផ្គើនរុស្ស៊ីដែលហ៊ានដកការហាមឃាត់ការនាំសព្វាវុធទៅអោយអ៊ីរ៉ង់កាលពីសប្តាហ៍មុន។ អ៊ីស្រាអែលតឹងតែងអារម្មណ៍កាន់ខ្លាំងដោយសារការសម្រចចិត្តលោក ពូទីន ណាមួយទើបកើតទុក្ខមិនសុខចិត្តរឿងកិច្ចព្រមព្រៀងនុយក្លេអ៊ែររវាងមហាអំណាច៥បូកមួយជាមួយអ៊ីរ៉ងកាលពីថ្មីៗនេះផង។
ក្រោយរុស្ស៊ីប្រកាសដកការហាមឃាត់ការលក់អាវុធទៅអ៊ីរ៉ង់ នាយករដ្ឋមន្ត្រីអ៊ីស្រាអែលលោក បេន ចាមិន ណេតាន់យ៉ាហ៊ូ ប្រញាប់ប្រញាលទូរស័ព្ទទៅលោកពូទីន ដើម្បីបញ្ចុះបញ្ចូលលោក ពូទីន កុំអោយផ្តល់ប្រព័ន្ធការពារដែនអាកាសទៅកាន់អ៊ីរ៉ង់ ដោយលើកមូលហេតុថា វានឹងអាចគំរាមកំហែងសន្តិសុខអ៊ីស្រាអែល និងស្ថិរភាពតំបន់មជ្ឈិមបូព៌ាទាំងមូល។ អ៊ីស្រាអែលដាក់ការសង្ស័យថា ប្រព័ន្ធការពារអាកាសជួយអោយអ៊ីរ៉ង់ក្រអឺតក្រទោមកាន់តែខ្លាំងនៅមជ្ឈិមបូព៌ា ហើយអ្វីដែលអ៊ីស្រាអែលព្រួយបារម្ភខ្លាំងគឺ អ៊ីរ៉ង់អាចពង្រឹងឥទ្ធិពលយោធាខ្លួនព្រមទាំងផលិតអាវុធនុយក្លេអ៊ែរផង។
យ៉ាងណាក៏ដោយ ទោះជាអ៊ីស្រាអែលប្រឹងបញ្ចុះបញ្ចូលលោក ពូទីនប៉ុណ្ណាក៏ដោយ ក៏មិនមានអ្វីផ្លាស់ប្តូរដែរ គម្រោងបញ្ជូនអាវុធនឹងធ្វើឡើងចុងឆ្នាំនេះ។ លោកពូទីនព្យាយាមពន្យល់ ណេតាន់យ៉ាហ៊ូ ថាមីស៊ីលរុស្ស៊ីផ្តល់អោយអ៊ីរ៉ង់ នឹងមិនត្រូវប្រើប្រាស់ដើម្បីគំរាមកំហែងរដ្ឋណាមួយទេ តែវានឹងប្រើប្រាស់ក្នុងន័យការពារខ្លួនតែប៉ុណ្ណោះ។ដូច្នេះ អ៊ីស្រាអែលមិនគួរបារម្ភឡើយ។ រដ្ឋមន្ត្រីការបរទេសរុស្ស៊ីក៏ឆ្លៀតបញ្ជាក់ថា កិច្ចព្រមព្រៀងបឋមរវាងអ៊ីរ៉ង់និងមហាអំណាច ៦ជុំវិញកម្មវិធីនុយក្លេអ៊ែរ បញ្ជាក់ច្បាស់ថា រុស្ស៊ីលែងត្រូវការការហាមឃាត់ការនាំចេញអាវុធទៅកាន់អ៊ីរ៉ង់ទៀតហើយ ហើយអាវុធទាំងនេះក៏នឹងត្រូវយកទៅប្រើប្រាស់ក្នុងន័យស្វ័យការពារដែរ។
ប៉ុន្តែទោះជារុស្ស៊ីព្យាយាមបកស្រាយដូច្នេះក៏ដោយ អ៊ីស្រាអែលដឹងជាស្រេចថា បើកាលណាមីស៊ីល S-300ធ្លាក់ក្នុងដៃអ៊ីរ៉ង់ ទ័ពអាកាសអ៊ីស្រាអែលពិបាកចូលដីអ៊ីរ៉ង់ បើមានអន្តរាគមន៍យោធានាពេលខាងមុខ ករណីចូលបំផ្លាញកម្មវិធីនុយក្លេអ៊ែរអ៊ីរ៉ង់។ គួរបញ្ជាក់បន្តិចថា ប្រព័ន្ធការពារអាកាស S-300 ផលិតដោយរុស្ស៊ីនេះមានអំណាចខ្លាំងក្នុងការប្រឆាំងយន្តហោះចម្បាំង ហើយការបញ្ជូនអាវុធនេះទៅអោយអ៊ីរ៉ង់ធ្វើឡើងតាមកិច្ចព្រមព្រៀងទិញលក់សព្វាវុធដែលភាគីចុះរួមគ្នាកាលពីឆ្នាំ២០០៧កន្លងមកប៉ុណ្ណោះ។
ខណៈពេលដែលរដ្ឋាភិបាលក្រុងជេរ៉ូសាឡិម ត្រៀមនាំចេញសព្វាវុធសម្លាប់មនុស្សបាន ទៅកាន់ក្រុងគៀវ ក្រុងម៉ូស្គូព្រមានជាស្រេចទៅហើយពីផលអវិជ្ជមានដែលអាចនឹងកើតមានឡើងនាពេលខាងមុខ។ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានសង្កត់ធ្ងន់ថា ការសម្រេចចិត្តបញ្ជូនអាវុធយុទ្ធភ័ណ្ឌទៅកាន់ទីក្រុងគៀវនោះ ជាជម្រើសរបស់ក្រុងជេរ៉ូសាឡិមប៉ុណ្ណោះ ប៉ុន្តែលោកបានព្រលយពាក្យថា ទង្វើនេះនឹងធ្វើអោយបញ្ហាកាន់តែធ្ងន់ ជនស៊ីវិលស្លាប់កាន់ច្រើន ហើយគំរាមកំហែងដល់ដំណើរស្វែងរកសន្តិភាពនៅអ៊ុយក្រែនថែមទៀត។ រដ្ឋាភិបាលក្រេមឡាំងមិនចង់អោយមានការផ្គត់ផ្គង់សព្វាវុធទៅកាន់អ៊ុយក្រែនឡើយ ព្រោះគេដឹងស្រាប់ហើយថាសព្វាវុធថ្មីរបស់អ៊ីស្រាអែលអាចជួយរដ្ឋាភិបាលអ៊ុយក្រែនមានប្រៀបលើក្រុមឧទ្ទាមដែលគាំទ្រខ្លួននៅភាគខាងកើត។ ប៉ុន្តែវាប្រាកដណាស់ថា ការផ្គត់ផ្គង់សព្វាវុធក្នុងជម្លោះអ៊ុយក្រែនជាកំហុសឆ្គងមួយផងដែរ។ គួររំលឹកបន្តិចថា អ៊ុយក្រែនរត់ទៅទិញអាវុធពីអ៊ីស្រាអែល ក្រោយពេលអាមេរិកស្ទាក់ស្ទើរក្នុងយល់ព្រមផ្តល់អាវុធទៅអោយខ្លួនកាលពីថ្មីៗកន្លងទៅនេះ។ ថ្វីត្បិតតែអាមេរិកដើរតួនាទីសំខាន់ក្នុងជម្លោះនៅអ៊ុយក្រែនក៏ពិតមែន តែអាមេរិកមិនទាន់ហ៊ានបញ្ជូនសព្វាវុធសម្លាប់មនុស្សបានជាសាធារណៈទៅអោយអ៊ុយក្រែនដែរ ដ្បិតថាវាអាចនឹងជំរុញអោយជម្លោះរីកកាន់តែធំឡើង ណាមួយសម្ព័ន្ធមិត្តអាមេរិកអឺរ៉ុបក៏ព្រមានពីលទ្ធផលអវិជ្ជមាននៃការផ្តល់អាវុធទៅអ៊ុយក្រែនដែរ។
ត្រលប់មកវិញ បើសិនជាអ៊ីស្រាអែលមិនស្តាប់ហេតុផល រដ្ឋាភិបាលរុស្ស៊ី ដោយចចេសបន្តផ្តល់អាវុធដល់អ៊ុយក្រែន រដ្ឋាភិបាលលោក ពូទីន ក៏ប្រហែលជាសម្លឹងឃើញវិធីគំរាមអ៊ីស្រាអែលមួយទៀត។ វិធីសាស្ត្រនោះគឺលក់ប្រព័ន្ធការពារដែនការប្រភេទដដែលនេះទៅអោយរដ្ឋាភិបាលក្រុងដាម៉ាសវិញម្តង។ មិនមែនជារឿងសាមញ្ញប៉ុន្មានទេ បើសិនជារុស្ស៊ីហ៊ានលក់អាវុធប្រភេទនេះទៅអោយរដ្ឋាភិបាលលោក អាសាដ ព្រោះវានឹងជួយការពាររដ្ឋាភិបាលអាសាដពីការវាយប្រហារផ្លូវអាកាសណាមួយក្នុងពេលខាងមុខ។ គេហ៊ានសន្និដ្ឋានបែបនេះក៏ដោយសារ កាលពីថ្ងៃសុក្រ ប្រមុខរដ្ឋរុស្ស៊ីមិនបានឆ្លើយតបសំណួរដែលថា តើរុស្ស៊ីនឹងមិនផ្គត់ផ្គង់អាវុធដូចគ្នាទៅកាន់ស៊ីរីតាមការស្នើរបស់អ៊ីស្រាអែលដែលឬយ៉ាងណា។ នេះមានន័យថា ការផ្តល់អាវុធទៅស៊ីរី វានឹងក្លាយជាវិធីសាស្ត្រដើម្បីគំរាមក្រុងជេរ៉ូសាឡិម របស់លោក ពូទីន ដើម្បីធានាថា អ៊ីស្រាអែលនឹងមិនផ្តល់អាវុធទៅអ៊ុយក្រែនឡើយ៕
© រក្សាសិទ្ធិដោយ thmeythmey.com