មកុដមាសរក្សាទុកនៅកន្លែងមានសុវត្ថិភាពស្របតាមគោលការណ៍នៃការអភិរក្ស

ជាតិ

មកុដមាសរក្សាទុកនៅកន្លែងមានសុវត្ថិភាពស្របតាមគោលការណ៍នៃការអភិរក្ស

28, Apr 2015 , 10:57 am

រូបភាព

ដោយ: រួបរួម

អាជ្ញាធរជាតិអប្សរានៅថ្ងៃទី២៨ខែមេសាបានអះអាងថាមកុដមាសដែលរកឃើញពីការធ្វើកំណាយស្រាវជ្រាវនៅប្រាសាទតាព្រហ្មត្រូវបានរក្សាទុកត្រឹមត្រូវពោលគឺមិនមានការឃុបឃិតលួចលក់ដូចការចោទប្រកាន់នោះឡើយ។

កាលពីខែមីនាឆ្នាំ២០១២ស្ថាប័នឥណ្ឌាArchaeological Survey of India (ASI) ដែលកំពុងធ្វើការអភិរក្សជុសជុលប្រាសាទតាព្រហ្មក្រោមកិច្ចសហការជាមួយអាជ្ញាធរជាតិអប្សរាបានធ្វើកំណាយស្រាវជ្រាវប្រទះឃើញកមុដឬភ្នួងសក់ធ្វើពីមាស។វត្ថុសិល្បៈនេះត្រូវបានអ្នកបុរាណវិទ្យាចាត់ទុកថាមានតម្លៃដ៏កម្រជួបប្រទះក្នុងប្រវត្តិនៃសិល្បៈខ្មែរ។

«ភ្លាមៗនោះស្ថាប័នឥណ្ឌានិងអាជ្ញាធរជាតិអប្សរាក៏បានធ្វើការសិក្សានិងលាងសម្អាតតាមបច្ចេកទេសរបស់អ្នកអភិរក្សវត្ថុបុរាណក្រោមការដឹកនាំនិងចាត់ចែងផ្ទាល់របស់ឯកឧត្តមអគ្គនាយកអាជ្ញាធរជាតិអប្សរា»។នេះជាការបញ្ជាក់របស់ស្ថាប័នអភិរក្សតំបន់អង្គរ។

រយៈពេលចុងក្រោយអ្នកប្រើប្រាស់បណ្តាញសង្គមហ្វេសប៊ុកមួយចំនួនបានចោទប្រកាន់ថាអាជ្ញាធរអប្សរានិងក្រុមASI របស់ឥណ្ឌាបានឃុបឃិតគ្នាលាក់បាំងនិងលួចលក់របស់ដ៏មានតម្លៃមិនកាត់ថ្លៃបាននេះ។ឆ្លើយតបនឹងការចោទប្រកាន់អាជ្ញាធរអប្សរាបានរំលឹកថាខ្លួនបានប្រកាសប្រាប់សារធារណជនដោយឥតលាក់បាំងក្រោយការប្រទះឃើញវត្ថុដ៏មានតម្លៃនេះ។

ស្ថាប័នដែលដឹកនាំដោយលោកប៊ុនណារិទ្ធបានបន្ថែមថា៖ «មិនតែប៉ុណ្ណោះក្នុងឱកាសព្រះរាជពិធីបុណ្យអុំទូកកាលពីឆ្នាំ២០១២អាជ្ញាធរជាតិអប្សរាក៏បានរៀបចំតាំងពិព័ណ៌មួយនៅវាលព្រះមេរុរាជធានីភ្នំពេញហើយរូបភាពរបស់មកុដឬភ្នួងសក់នេះក៏បានដាក់តាំងបង្ហាញថ្វាយព្រះមហាក្សត្របានទតថ្នាក់ដឹកនាំរាជរដ្ឋាភិបាលព្រមទាំងសាធារណជនទូទៅបានទស្សនាដោយមិនមានការលាក់បាំងអ្វីឡើយ»។

ដោយមិនបានបញ្ជាក់ពីទីតាំងច្បាស់លាស់អាជ្ញាធរជាតិអប្សរាបានអះអាងថា៖ «បច្ចុប្បន្ននេះវត្ថុដ៏មានតម្លៃនេះត្រូវបានរក្សាទុកនៅកន្លែងមានសុវត្ថិភាពស្របតាមតាមគោលការណ៍នៃការអភិរក្សវត្ថុបុរាណដែលជាមរតករបស់មនុស្សជាតិទាំងមូល។ដោយមិនមានការលក់ដូរដូចការចោទប្រកាន់ឬការលើកឡើងរបស់មតិមួយចំនួន នោះឡើយ»។

អាជ្ញាធរជាតិអប្សរាបានអំពាវនាវឲ្យបញ្ឈប់នូវការផ្សព្វផ្សាយព័ត៌មានមិនពិតដែលនាំឲ្យប៉ះពាល់ដល់កិត្តិយសរបស់ស្ថាប័នជាតិនិងអន្តរជាតិដែលកំពុងបំពេញការងារអភិរក្សជួសជុលប្រាសាទក្នុងតំបន់អង្គរ៕