អន្តរជាតិ
នយោបាយអន្តរជាតិ
អាស៊ានស្ងាត់មាត់ជុំវិញបញ្ហាជនភៀសខ្លួនមីយ៉ាន់ម៉ារ៉ូហ៊ីងយ៉ា ![](https://image.thmeythmey.com/pictures/2015/05/14/rohingyo.jpg)
×![]()
បច្ចុប្បន្ននេះ តំបន់អាស៊ានក៏កំពុងប្រឈមមុខបញ្ហាកើនឡើងនៃចំនួនជនភៀសខ្លួនដូចនៅ អឺរ៉ុបដែរ។ ជនភៀសខ្លួនបច្ចុប្បន្នមានច្រើនមកពីប្រទេសមីយ៉ាន់ម៉ា ដែលគេស្គាល់ថាជាជនជាតិ ភាគតិចឥស្លាមរ៉ូហ៊ីងយ៉ា ដែលរងទុក្ខបុកម្នេញដោយអាជ្ញាធរក្រុងណៃពីដ៏។ បើសិនបន្តព្រងើយ កន្តើយសោកនាដកម្មមនុស្សជាតិនឹងកើតមានឡើងដូចគ្នា។ ប៉ុន្តែបញ្ហានេះចាំបាច់ត្រូវមាន ការរួបរួមគ្នាដោះស្រាយទើបមានប្រសិទ្ធភាព។
រាយការណ៍ព័ត៌មានលម្អិតដោយ រឿន ភារុន
ជនភៀសខ្លួនបានក្លាយជាបញ្ហាប្រឈមសម្រាប់ពិភពលោកទាំងមូល ទាំងនៅអាស៊ី អឺរ៉ុប និងអាហ្វ្រិក។ បច្ចុប្បន្ននេះ បញ្ហាជនភៀសខ្លួនបានធ្វើឲ្យប្រទេសមួយចំនួនក្រពុលមុខ ដ្បិតគេមិនអាចដោះស្រាយបញ្ហាបានជោគជ័យ។ ជនភៀសខ្លួនដែលភាគច្រើនរត់គេច ពីគ្រោះថ្នាក់សង្គ្រាមស៊ីវិល ការធ្វើទុក្ខបុកម្នេញ បន្តប្រឈមមុខគ្រោះថ្នាក់ដល់អាយុជីវិត ដោយការផ្សងព្រេងតាមទូក និងក្លាយជាទំនិញជួញដូររបស់ជនទុច្ចរិត។
បញ្ហានេះមិនមែនជារឿងងាយដោះស្រាយឡើយ វាប្រហែលជាចាំបាច់អាស៊ានទាំងមូល សហការគ្នាដោះស្រាយ។ ប៉ុន្តែ បញ្ហានៅត្រង់ថា អាស៊ានអាចដោះស្រាយបានដែរឬទេ បើជនភៀសខ្លួនភាគច្រើនមកពីមីយ៉ាន់ម៉ា ដោយពួកគេរត់គេពីគ្រោះថ្នាក់ ព្រោះរដ្ឋាភិបាល មីយ៉ាន់ម៉ាជាសមាជិកអាស៊ានមួយនោះកំពុងអនុវត្តគោលនយោបាយព្រៃផ្សៃប្រឆាំងពួកគេ។
ជុំវិញបញ្ហានេះដែរ លោក Syed Hamid Albar អតីតរដ្ឋមន្ត្រីការបទេសម៉ាឡេស៊ី បានព្រមានហើយថា បើសិនអាស៊ាន និងភាគីពាក់ព័ន្ធនៅព្រងើយកន្តើយ គ្រោះមហន្តរាយមនុស្សជាតិនឹង កើតឡើងជាក់ជាមិនខាន។ ចំណែកអតីតសមាជិកសភាម៉ាឡេស៊ីក៏បានសង្កត់ធ្ងន់ផងដែរថា បញ្ហានេះមិនអាចដោះស្រាយចេញឡើយ សូម្បីតែកិច្ចប្រជុំប៉ុន្មានថ្ងៃមុននៅទីក្រុង ឡាំងកាវី មេដឹកនាំអាស៊ានមិនអាចលើកយកបញ្ហានេះមកជជែកគ្នាបានដែរ ដ្បិតវាអាចបំពាន គោលការណ៍មិនជ្រៀតជ្រែកកិច្ចការផ្ទៃក្នុងរដ្ឋសមាជិក។ មីយ៉ាន់ម៉ាក៏មិនចង់លឺរឿងនេះដែរ។
កាលពីថ្មីៗនេះដែរ ប្រជាជនមួយចំនួននៅតំបន់អាស៊ាន មានថៃ ឥណ្ឌូនេស៊ី និងម៉ាឡេស៊ី បានបង្ហាញក្តីបារម្ភរបស់ខ្លួន ចំពោះការកើនឡើងនៃជនភៀសខ្លួនចូលទឹកដីខ្លួន និងការជួញ ដូរមនុស្សកើតមានឡើងនៅតាមទូក។ ថៃចាប់ផ្តើមបង្ក្រាបបទល្មើស ហើយអាជ្ញាធរម៉ាឡេស៊ី និងឥណ្ឌូនេស៊ីចេញមុខដោះស្រាយបញ្ហានេះ ដោយសារជនភៀសខ្លួនតាមទូកទាំងនោះ ប្រឈមគ្រោះថ្នាក់។ការបន្តកើនឡើងនៃជនភៀសខ្លួននេះជាបន្ទុកធំសម្រាប់ប្រទេសទាំងនេះ ប៉ុន្តែគេមិនទាន់ឃើញមានចំណាត់ការអ្វីទៀតផ្សេងទេដើម្បីទប់ស្កាត់ការកើនឡើងនៃជនភៀសខ្លួន។
ជនភៀសខ្លួនភាគច្រើនដែលផ្សងព្រេងតាមទូកមានជនជាតិភាគតិចរ៉ូហ៊ីងយ៉ាមកពីប្រទេស មីយ៉ាន់ម៉ា និងប្រជាជនបង់ក្លាដែសផង។ ប្រជាជនទាំងនេះប្តូរជីវិតដោយផ្សងព្រេងតាមទូក ដ្បិតចង់គេចឲ្យផុតពីគ្រោះថ្នាក់ ភាពក្រីក្រ និងការធ្វើទុក្ខបុកម្នេញពីសំណាក់រដ្ឋាភិបាល ពួកគេ។ ជនជាតិភាគតិចឥស្លាមរ៉ូហ៊ីងយ៉ា ដែលមានចំនួនច្រើនក្នុងចំណោមជនភៀសខ្លួន បានព្យាយាមរត់គេចចេញពីប្រទេសដោយសារអាជ្ញាធរមីយ៉ាន់ម៉ាធ្វើទុក្ខបុកម្នេញ អនុវត្តគោលនយោបាយរើសអើងប្រឆាំងជនជាតិភាគតិចនិងចាត់ទុកពួកគេជាសត្វធាតុ។
ជនជាតិគ្មានសញ្ជាតិឡើយ ហើយមីយ៉ាន់ម៉ាមិនដែលទទួលស្គាល់ពួកគេជាជនជាតិមីយ៉ាន់ម៉ា ឡើយ។ បើសិនមីយ៉ាន់ម៉ានៅតែបន្តធ្វើបែបនេះ បញ្ហាជនភៀសខ្លួននឹងមិនអាចដោះស្រាយ បានឡើយ។ ហើយអាស៊ានជាតួអង្គសំខាន់នោះ ត្រូវចាត់វិធានការឲ្យមានប្រសិទ្ធភាព ដើម្បីដោះស្រាយបញ្ហានេះ ទប់ស្កាត់កុំឲ្យគ្រោះមហន្តរាយ និងសោកនាដកម្មកើតមានឡើង បន្តទៀត៕
© រក្សាសិទ្ធិដោយ thmeythmey.com