អន្តរជាតិ
នយោបាយអន្តរជាតិ
ក្រុមរដ្ឋអ៊ីស្លាមប្រកាសជាលើកទី១ ថាបានវាយប្រហារប៉ាគីស្ថាន ![](https://image.thmeythmey.com/pictures/2015/05/14/1452015163854isis.jpg)
×![]()
នៅថ្ងៃពុធម្សិលមិញ ក្រុមជីហាតរដ្ឋអ៊ីស្លាមបានប្រកាសជាលើកដំបូងថា បានធ្វើការវាយឆ្មក់នៅប៉ាគីស្ថាន ធ្វើអោយមនុស្សស្លាប់៤៣នាក់ និងរបួស៣០នាក់។ ជនរងគ្រោះមកពីសហគមន៍និកាយស្ហ៊ីអ៊ីត។ ការវាយឆ្មក់នេះសម្លាប់មនុស្សច្រើនបំផុត បើគិតចាប់ពីខែមករា ក្រោយមានភេរវកម្មសម្លាប់អ្នកកាន់និកាយស្ហ៊ីអ៊ីតជាង៦០នាក់ នៅក្រុងShikarpur។
ក្នុងការវាយឆ្មក់ម្សិលមិញ ជនប្រដាប់អាវុធយ៉ាងតិច៦នាក់ បានជិះម៉ូតូ បាញ់រះទៅលើរថយន្តក្រុងមួយ ដែលកំពុងដឹកអ្នកកាន់សាសនាអ៊ីស្លាមនិកាយស្ហ៊ីអ៊ីត ជាង៦០នាក់ នៅក្រុងការ៉ាឈី។ ដំបូង ជនប្រដាប់អាវុធបានបាញ់អ្នកបើកបរ។ ក្រោយពេលរថយន្តក្រុងឈប់ ពួកគេក៏ឡើងទៅលើរថយន្តនោះ ហើយបាញ់រះលើអ្នកដំណើរតែម្តង។ បុរសម្នាក់រួចផុតពីការស្លាប់ បានប្រឹងត្រដាបត្រដួសបើករថយន្តក្រុងនោះរហូតដល់មន្ទីរពេទ្យ។
មុនចុះផ្សាយប្រកាសជាផ្លូវការក្នុងវេបសាយ ថាក្រុមខ្លួនបានធ្វើការវាយប្រហារនេះ ក្រុមជីហាតរដ្ឋអ៊ីស្លាមបានបង្ហាញសារព័ត៌មានបារាំង AFPនូវខិតបណ្ណប្រឡាក់ឈាមមួយ បញ្ជាក់ពីស្នាដៃក្រុមខ្លួនក្នុងការវាយឆ្មក់រថយន្តក្រុងនោះ។ ការវាយឆ្មក់នៅប៉ាគីស្ថានដែលជាសម្បុកក្រុមតាលីបង់ បានសបញ្ជាក់ថា ក្រុមជីហាតដែលកំពុងវាតទីនៅអ៊ីរ៉ាក់ ស៊ីរី និងអុកឡុកប្រទេសអាហ្វ្រិកមួយចំនួននោះ ប្រហែលកំពុងតែឈានជើងចូលអាស៊ីសន្សឹមៗហើយ។
ទីតាំងនៃការវាយឆ្មក់ ម្សិលមិញ ដែលស្ថិតនៅតំបន់ការ៉ាឈី ភាគខាងត្បូងប៉ាគីស្ថាន ត្រូវបានក្រុមជីហាតប្រកាស កាលពីខែមករា អោយក្លាយជាខែត្រ Khorasan របស់រដ្ឋអ៊ីស្លាមកាលីហ្វា។ ខែត្រ Khorasanរបស់ក្រុមជីហាតគ្របដណ្តប់ប៉ាគីស្ថាន អាហ្វហ្កានីស្ថាន និងតំបន់មួយចំនួននៅឥណ្ឌា។ គេសង្ស័យដែរថា ក្រុមជីហាតកំពុងមានវត្តមាននៅអាហ្វហ្កានីស្ថានក្បែរនោះ។ កាលពីខែមករា មានភេរវកម្មមូយនៅក្រុងចាឡាឡាបាត ភាគខាងកើតអាហ្វហ្កានីស្ថាន សម្លាប់មនុស្សជាង៣០នាក់។ អាជ្ញាធរអាហ្វហ្កានីស្ថានសង្ស័យថា ជាស្នាដៃក្រុមជីហាត ប៉ុន្តែ ក្រុមជីហាតមិនដែលបានប្រកាសផ្លូវការថា បានបង្កភេវកម្មនេះទេ៕
© រក្សាសិទ្ធិដោយ thmeythmey.com