អន្តរជាតិ
នយោបាយអន្តរជាតិ
×![]()
ក្រោយទស្សនកិច្ចនៅអាមេរិក នាយករដ្ឋមន្ត្រីជប៉ុនចាប់ផ្តើមបន្តគោលបំណងរបស់ខ្លួនដើម្បីពង្រឹងវិស័យយោធា។ គណរដ្ឋមន្ត្រីលោក ស៊ីហ្សូ អាបេ នៅថ្ងៃព្រហស្បតិ៍នេះសម្រចសេចក្តីព្រាងច្បាប់សំដៅផ្តាស់ប្តូរគោលនយោបាយសន្តិសុខរបស់ខ្លួនបច្ចុប្បន្នដើម្បី បើកផ្លូវអោយកងទ័ពជប៉ុនអន្តរាគមន៍ក្នុងជម្លោះប្រដាប់អាវុធក្រៅបរទេស។ កាលពីខែកក្កដាឆ្នាំមុន គណរដ្ឋមន្ត្រីលោក អាបេ នេះក៏បានចេញដំណោះស្រាយមួយបកស្រាយឡើងវិញមាត្រានៃរដ្ឋធម្មនុញ្ញសន្តិភាពដែលកម្រិតអំណាចយោធាជប៉ុនតាំងពីចប់សង្គ្រាមលោកលើកទី២មកនោះ។ បើទោះជាការបង្កើនឥទ្ធិពលយោធាជប៉ុនជាគោលនយោបាយរបស់រដ្ឋាភិបាលជាតិនិយមបច្ចុប្បន្នដើម្បីការពារសន្តិសុខ និងឆ្លើយតបឥទ្ធិពលចិនក៏ដោយ ប្រជាជនជប៉ុនបានសម្តែងការព្រួយបារម្ភពីទង្វើររបស់រដ្ឋាភិបាលខ្លួនទៅវិញ។ ថ្ងៃនេះប្រជាជនជប៉ុនច្រើនរយនាក់ចេញមុខបាតុកម្មប្រឆាំងលោកអាបេ។
សូមស្តាប់ការបកស្រាយរបស់លោក សៅ ផលនិស្ស័យ៖
បច្ចុប្បន្ន នាយករដ្ឋមន្ត្រីជប៉ុន ស៊ីនហ្សូ អាបេ និងគណរដ្ឋមន្ត្រីគ្រោងសម្រេចទទួលយកសេចក្តីព្រាងច្បាប់ដែលបើកផ្លូវអោយមានផ្លាស់ប្តូរគោលនយោបាយសន្តិសុខជប៉ុន ដើម្បបង្កើនឥទ្ធិពលយោធាអោយកាន់តែឆាប់តាមដែលអាចធ្វើបាន។ លោក អាបេ ព្យាយាមបន្តស្វះស្វែងដើម្បីសម្រេចបំណងកែប្រែគោលនយោបាយការពារជាតិរបស់ជប៉ុន ក្រោយពេលដែលលោកទៅទស្សនកិច្ចនៅអាមេរិក និងក្រោយសម្រេចបានផែនការសហប្រតិបត្តិការសន្តិសុខថ្មីរវាងជប៉ុននិងអាមេរិកផងកាលពីខែមុន។ កាលនោះ លោក អាបេ បានថ្លែងសុន្ទរកថាក្នុងសភាអាមេរិក ដោយលោក ប្តេជ្ញាថា ជប៉ុនត្រូវចូលរួមក្នុងការទទួលខុសត្រូវផ្នែកសន្តិសុខ រក្សាសន្តិភាព និងស្ថិរភាពក្នុងតំបន់ទាំងមូលក្នុងនាមជាមហាអំណាចមួយ។ នេះបញ្ជាក់ថា ជប៉ុនត្រៀមខ្លួនរួចស្រេចហើយក្នុងការពង្រីកឥទ្ធិពល និងបង្កើនអំណាចយោធានាពេលខាងមុខ។
តាមការកំណត់នៅថ្ងៃនេះរដ្ឋាភិបាលលោក អាបេ គ្រោងនឹងប្រជុំសម្រេចអនុញ្ញាតអោយបាននូវសេចក្តីព្រាងច្បាប់សម្រាប់ត្រួសត្រាយផ្លូវអោយរដ្ឋាភិបាលបញ្ចូនកងទ័ពទៅក្រៅប្រទេសដើម្បីអន្តរាគមន៍ក្នុងបញ្ហាសន្តិសុខ។ នេះជាជំហានថ្មីមួយទៀតរបស់ ប្រមុខរដ្ឋាភិបាលដែលជាអ្នកនយោបាយជាតិនិយមខ្លាំងរបស់ជប៉ុនបច្ចុប្បន្ន។ ប៉ុន្តែទោះជាលោក អាបេ ជានិច្ច ជាកាលព្យាយាមបកស្រាយពីគោលបំណងរបស់លោកក៏ដោយចុះ ប្រជាជនជប៉ុននៅតែប្រឆាំង និងនៅតែមិនទុកចិត្តលោក អាបេ ហើយគេមិនប្រាកដឡើយថា ទង្វើនេះនាំមកនូវសន្តិភាពពិតប្រាកដដល់តំបន់និងជប៉ុនឬអត់នោះឡើយ។
១. ប្រជាជនជប៉ុនភាគច្រើនប្រឆាំងនិងមិនយល់ពីបំណងលោក អាបេ
គ្រាន់តែលឺថា លោកអាបេ បើកកិច្ចប្រជុំក្នុងគណរដ្ឋមន្ត្រីសម្រេចសេចក្តីព្រាងច្បាប់សន្តិសុខថ្មីនេះភ្លាម ប្រជាជនជប៉ុនបានចេញមុខបាតុកម្មភ្លាម។ ថ្ងៃនេះមនុស្សប្រហែល ៥០០នាក់ប្រមូលផ្តុំគ្នានៅមុខការិយាល័យនាយករដ្ឋមន្ត្រី ដើម្បីប្រឆាំងបំណងលោក អាបេ។ បើតាមសម្តីអ្នកចូលរួមពួកគេបារម្ភពីមហិច្ឆតាលោកអាបេ ក្នុងការពង្រីកអំណាចយោធាជប៉ុនក្នុងការអន្តរាគមន៍ជម្លោះខាងក្រៅ ព្រោះវានឹងបំពានរដ្ឋធម្មនុញ្ញសន្តិភាពដែលបង្កើតក្រោយបញ្ចប់សង្គ្រាមលោកលើកទី។ មិនមានអ្វីដែលត្រូវឆ្ងល់ឡើយ លោកអាបេ កំពុងរកឱកាសកែរដ្ឋធម្មនុញ្ញ ព្រោះកាលពីឆ្នាំមុនលោក អាបេ បានដឹកនាំសមាជិករដ្ឋាភិបាលអនុម័តដំណោះស្រាយមួយដើម្បីបង្ហាញពីការបកស្រាយឡើងវិញមាត្រា ៩ នៃរដ្ឋធម្មនុញ្ញបន្សល់ពីសម័យសង្គ្រាមលោកទី។ លោកអាបេប្តេជ្ញាកែមាត្រា៩ នេះ ព្រោះវាចងដៃជប៉ុនមិនឲ្យធ្វើអ្វីបាន ក្រៅពីមានអំណាចស្វ័យការពារខ្លួន។
ជុំវិញការកែប្រែគោលនយោបាយសន្តិសុខ យោងតាមការរបាយការណ៍ស្ទង់មតិក្នុងចំណោមប្រជាជនជប៉ុន ប្រជាជនប្រហែល ៥០ភាគរយប្រឆាំងបំណងលោក អាបេ ដែលចង់ពង្រីកឥទ្ធិពលយោធា។ មនុស្សប្រហែល ៤៩ភាគរយទៀតស្ទាក់ស្ទើ និងមិនយល់ពីបំណងសុំកែប្រែគោលនយោបាយការពារជាតិនិងមាត្រានៃរដ្ឋធម្មនុញ្ញឡើយ។
តាមពិតទៅ គោលបំណងនាយករដ្ឋមន្ត្រីជប៉ុននេះកំពុងក្លាយជាចម្ងល់សម្រាប់ប្រជាជនជប៉ុនផ្ទាល់ និងបង្កក្តីបារម្ភដល់ប្រទេសជិតខាងមានកូរ៉េខាងត្បូង និងចិនផងដែរ។ គេភ័យខ្លាច ក៏ដោយសារគេមិនទុកចិត្តថាតើជប៉ុននឹងធ្វើអ្វីទៀតក្រោយពេលដែលប្រទេសនេះមានអំណាចយោធាខ្លាំងក្លា។ ប្រទេសជិតខាងទាំងនោះ រួមទាំងប្រជាជនជប៉ុនខ្លួនឯងផង ភ័យខ្លាចថាប្រវត្តិសាស្ត្រនឹងកើតជាថ្មីឡើងវិញ ដោយជប៉ុននឹងចាប់ប្រើប្រាស់គោលនយោបាយវាតទីនិយមក្តោបក្តាប់ពិភពលោកទៀត។
សម្រាប់លោក អាបេ អន្ទះសារចង់កែប្រែនយោបាយការនិងសមត្ថភាពយោធាកងទ័ពជប៉ុន ក៏ដោយសារមានជម្លោះដែនទឹកសមុទ្រចិនខាងកើតជាមួយក្រុងប៉េកាំង ហើយម្យ៉ាងចិនក៏បន្តរីកធំធាត់ឡើងទាំងយោធានិងសេដ្ឋកិច្ចទៀត។ ហើយលោក អាបេ ជឿជាក់ថា មានអំណាចសេដ្ឋកិច្ចខ្លាំងមិនអាចជួយអោយជប៉ុននៅរក្សាឥទ្ធិពលរបស់ខ្លួនបាននោះឡើយ ដរាបណាគ្មានសមត្ថភាពយោធាខ្លាំង។
២. អាមេរិកគាំទ្រលោកអាបេបង្កើនអំណាចយោធាប្រឆាំងចិន តែខ្លាចកូរ៉េខាងត្បូងអន់ចិត្ត
ក្នុងដំណើរទស្សនកិច្ចទៅអាមេរិកកន្លងមក គំនិតផ្លាស់ប្តូរអំណាចយោធាជប៉ុនរបស់លោក អាបេ បានទទួលការស្វាគមន៍ពីក្រុងវ៉ាស៊ីនតោន ក្នុងនាមជា សម្ព័ន្ធមិត្តរបស់ជប៉ុន។ តាំងពីយូរមកហើយអាមេរិកនេះឯងជាអ្នកចាំការពារជប៉ុនមិនអោយសត្រូវណាមួយវាយប្រហារឡើយ។ កាលមុន អាមេរិក ក៏មិនចង់អោយជប៉ុនមានអំណាចយោធាខ្លាំងដែរ ក្រែងជប៉ុនបង្កបញ្ហាដល់អាមេរិកទៅថ្ងៃក្រោយ។ ប៉ុន្តែបរិបទនយោបាយពិភពលោកផ្លាស់ប្តូរ អាមេរិកម្នាក់ឯង ត្រូវដោះស្រាយបញ្ហាសន្តិសុខតំបន់ច្រើនរាប់មិនអស់ ហើយត្រូវទប់ទល់មហាយក្សចិនទៀត។ ចិនឯនោះរីកលូតលាស់រហ័ស គ្រោងនឹងក្តោបកា្តប់អាស៊ីទាំងមូលទៅហើយ។ បើអាមេរិក បណ្តែតបណ្តោយ មិនយូរមិនឆាប់វាប្រាកដណាស់ថា អាស៊ីធ្លាក់ក្រោមឥទ្ធិពលផ្តាច់មុខរបស់ចិនមិនអាចប្រកែកបានឡើយ។ ត្រឹមនេះ អាមេរិកមិនអាចបន្តអោយផ្នែកយោធាជប៉ុននៅអន់ខ្សោយឡើយ អាមេរិកត្រូវជួយជប៉ុនពង្រីកអំណាចយោធាទុកទប់ទល់ជាមួយចិន និងទុកគ្រាន់សំឡុតកូរ៉េខាងជើងផង។ យ៉ាងណាក៏ដោយ បើទោះជាអាមេរិកគាំទ្រជប៉ុនក្នុងការពង្រីកឥទ្ធិពលយោធាក៏ពិតមែន អាមេរិកប្រុងប្រយ័ត្នខ្លាំងណាស់ដែរ មិនធ្វើអោយសម្ព័ន្ធមិត្តកូរ៉េខាងត្បូងថ្នាំងថ្នាក់ឡើយ។ បើអាមេរិកចេញមុខចេញមាត់ខ្លាំងពេកគាំទ្រជប៉ុនរឿងអំណាចយោធា វានឹងធ្វើអោយប៉ះពាល់ចំណងការទូតកូរ៉េខាងត្បូងអាមេរិក។ យោធាជប៉ុនកាន់តែខ្លាំង មិនមែនធ្វើឲ្យកូរ៉េខាងត្បូងសប្បាយចិត្តឯណា តែកូរ៉េខាងត្បូងរឹតតែខ្លាចទៅវិញ។ ក្រុងសេអ៊ូលធ្លាប់រងទុក្ខវេទនាដោយសារយោធាជប៉ុនកន្លងមក មិនទាន់ភ្លេចនៅឡើយទេ។ ហើយមេដឹកនាំជប៉ុននេះក៏មិនដែរអោនក្បាលសុំទោសជនជាតិកូរ៉េដែរ៕
© រក្សាសិទ្ធិដោយ thmeythmey.com
