អន្តរជាតិ
នយោបាយអន្តរជាតិ
លោកប្រាយុទ្ធ ព្រមានថាក់ស៊ីនមិនឲ្យនិយាយអាក្រក់ពីថៃក្នុងសន្និសីទកំពូលនៅកូរ៉េខាងត្បូង
×![]()
អតីតនាយរដ្ឋមន្ត្រីថៃលោកថាក់ស៊ីនស៊ីនណាវ៉ាត្រានឹងបង្ហាញមុខសារជាថ្មីនៅក្នុងសន្និសីទអន្តរជាតិក្នុងក្រុងសេអ៊ូលប្រទេសកូរ៉េខាងត្បូង។ លោកអតីតនាយករដ្ឋមន្ត្រីថៃរូបនេះត្រូវបានគេអញ្ជើញឲ្យថ្លែងសុន្ទរកថាផងដែរប៉ុន្តែឧត្តមសេនីយ៍ប្រាយុទ្ធចាន់អូចា ដែលនឹងមានវត្តមាននៅទីនោះដែរនោះ បានផ្ញើរសារទៅលោក ថាក់ស៊ីន ហើយថា លោកមិនគួរនិយាយអាក្រក់ពីថៃឡើយ។
យោងតាមគណនីInstragramនិងការបញ្ជាក់បន្ថែមពីអតីតនាយករដ្ឋមន្ត្រីថៃលោកថាក់ស៊ីនស៊ីនណាវ៉ាត្រានៅថ្ងៃទី១៩ខែឧសភាខាងមុខនេះលោកនឹងអញ្ជើញចូលរួមនៅក្នុងសន្និសីទកំពូលអាស៊ីលើកទី៦នៅទីក្រុងសេអ៊ូល។វត្តមានអតីតនាយករដ្ឋមន្ត្រីរូបនេះត្រូវបានគេចាត់ទុកថាជាពេលដែលមានការប្រឈមមុខគ្នាយ៉ាងតឹងតែងជាមួយនាយករដ្ឋមន្ត្រីរដ្ឋប្រហារយោធាថៃប្រាយុទ្ធចាន់អូចាផងដែរ។
ជុំវិញបញ្ហានេះដែរលោកនាយករដ្ឋមន្ត្រី ប្រាយុទ្ធចាន់អូចាបានបញ្ជាក់ថាលោកមិនមានការព្រួយបារម្ភដោយសារសុន្ទរកថារបស់លោកថាក់ស៊ីនស៊ីនណាវ៉ាត្រានៅចំពោះមុខមេដឹកកំពូលរបស់អាស៊ីនោះឡើយ។លោកបន្ថែមទៀតថាលោកថាក់ស៊ីននឹងអាចទាក់ទាញការចាប់ពីសំណាក់មេដឹកនាំដែលចូលរួម។
លើសពីនេះទៅទៀតលោកប្រាយុទ្ធក៏បានសង្កត់ធ្ងន់៖« លោកថាក់ស៊ីន គួរតែដឹងពីអ្វីដែលត្រូវនិយាយមិនចាំបាច់ខ្ញុំណែនាំនោះទេហើយលោកមិនគួរនិយាយអ្វីដែលអាក្រក់ពីថៃឡើយ»។
យ៉ាងណាក៏ដោយគេរំពឹងទុកមុនថាលោកអតីតនាយករដ្ឋមន្ត្រីថាក់ស៊ីនទំនងជាមិនថ្លែងសុន្ទរកថានោះទេព្រោះលោកមិនចង់ធ្វើឲ្យប៉ះពាល់ដល់បញ្ហាផ្ទៃក្នុងថៃនិងពិសេសនោះដើម្បីបញ្ជៀសការប្រឈមមុខគ្នាកាន់តែខ្លាំងជាមួយនឹងលោកឧត្តមសេនីយ៍យោធាប្រាយុទ្ធចាន់អូចា។
គួររម្លឹកផងដែរលោកអតីតនាយរដ្ឋមន្ត្រីថាក់ស៊ីនស៊ីនណាវ៉ាត្រាត្រូវបានគេទម្លាក់ពីតំណែងក្នុងឆ្នាំ២០០៦ខណៈពេលដែលកំពុងប្រជុំនៅក្នុងអង្គការសហប្រជាតិក្រុងញូវយ៉ក។ក្នុងនោះលោកត្រូវបានគេចោទប្រកាន់ថាបានធ្វើឲសង្គមថៃបែកបាក់និងបានប្រព្រឹត្តអំពើពុកក្នុងពេលគ្រប់គ្រងអំណាចផងដែរ៕
© រក្សាសិទ្ធិដោយ thmeythmey.com
