សេដ្ឋកិច្ចអន្តរជាតិ
អន្តរជាតិ
បន្ទាប់ពីចិន អ្នកវិនិយោគបរទេសកាន់តែច្រើនចាប់អារម្មណ៍វៀតណាម ![](https://image.thmeythmey.com/pictures/2015/05/15/viet_eco.jpg)
×![]()
សារព័ត៌មានសេដ្ឋកិច្ចប្រចាំថ្ងៃអ៊ីតាលី Il Sole 24 Ore (អ៊ីសូលេប៊ីទ្រីគ័រ ទ្ររេ) បានចុះផ្សាយ កាលពីថ្ងៃអង្គារកន្លងទៅ ថាអ្នកវិនិយោគបរទេសកាន់តែច្រើន បានជ្រើសរើសយកប្រទេសវៀតណាម ជាទិសដៅនៃការរកស៊ីរបស់ពួកគេ។ យោងតាមសារព័ត៌មាននេះ ការវិនិយោគរបស់បរទេសនៅវៀតណាមបានកើនឡើងជាសាច់ប្រាក់ប្រមាណ២៤លានដុល្លារក្នុងឆ្នាំ២០១៤កន្លងទៅ។ សារព័ត៌មានអ៊ីតាលីបានជំរុញអោយសហគ្រាសអ៊ីតាលីទៅវិនិយោគនៅវៀតណាម។
សូមស្តាប់ការបកស្រាយរបស់ ព្រំសឿន សូលីណា
យោងតាមសារព័ត៌មានអ៊ីតាលី Il Sole 24 Ore ក្នុងចំណោមទុនវិនិយោគដែលបរទេសដាក់ដំណើរការរកស៊ីនៅអាស៊ី វៀតណាមបានទទួលចំណែក៩% ធ្វើអោយវៀតណាមក្លាយជាប្រទេសទី២ បន្ទាប់ពីចិន ជាប្រទេសដែលអ្នកវិនិយោគបរទេសបានជ្រើសរើសជាគោលដៅរកស៊ី។ គិតក្នុង៤ខែដើមឆ្នាំ២០១៥នេះ ការវិនិយោគរបស់បរទេសនៅវៀតណាមបានកើនឡើង៥%។
ផលិតផលសរុបក្នុងស្រុកបានកើនឡើង៦% ក្នុងឆ្នាំ២០១៤ ហើយអាចកើនបន្ថែមដល់៦,១% និង៦,២% សម្រាប់ឆ្នាំ២០១៥ និងឆ្នាំ២០១៦ខាងមុខ។ រដ្ឋាភិបាលវៀតណាមប្រហែលជាសប្បាយចិត្តមិនតិចទេ ចំពោះការចុះផ្សាយរបស់សារព័ត៌មានសេដ្ឋកិច្ចអ៊ីតាលី ដែលលើកតម្កើងនិងផ្សព្វផ្សាយប្រទេសវៀតណាម អោយសហគ្រាសនិងប្រជាជនអ៊ីតាលីបានដឹង។
សម្រាប់សារព៌ត៌មានអ៊ីតាលី ពេលនេះជាពេលវេលាដ៏ល្អ សម្រាប់សហគ្រាសអ៊ីតាលីដែលសំបូរបច្ចេកវិទ្យាខ្ពស់ ដើម្បីចុះទៅរកស៊ីនៅវៀតណាមហើយ។
ភាពជោគជ័យនៃឧស្សាហកម្មវៀតណាម បូកផ្សំនឹងថ្លៃឈ្នួលពលកម្មទាប សុទ្ធតែជាកត្តាដែលនាំអោយសហគ្រាសបរទេសចាប់អារម្មណ៍លើវៀតណាម។ បើទោះជាឡាវ ឥណ្ឌូណេស៊ី រឺក៏កម្ពុជា ជាប្រទេសប្រកួតប្រជែងសេដ្ឋកិច្ចជាមួយវៀតណាម ក្នុងតំបន់អាស៊ីក្តី ក៏សហគ្រាសបរទេសហាក់ដូចជាចាប់អារម្មណ៍លើវៀតណាមច្រើនជាង។
បើយោងតាមសារព័ត៌មានអ៊ីតាលី អ្នកវិនិយោគបរទេស៦០ភាគរយ បានប្រាប់ថា ពួកគេជ្រើសរើសយកវៀតណាម ព្រោះតែទីផ្សារក្នុងស្រុកវៀតណាមជួបកំណើនឆាប់រហ័ស។ លើសពីនេះទៀត ក៏ដោយសារតែវៀតណាមមានគោលបំណងក្លាយជាប្រទេសឧស្សាហកម្មក្នុងឆ្នាំ២០២០ផងដែរ។
វៀតណាមមានទិសដៅពង្រីកសេដ្ឋកិច្ចអោយកាន់តែរឹងមាំនៅអាស៊ី វៀតណាមជាប្រទេសមានច្បាប់តឹងតែង ដូច្នេះ វៀតណាមជាប្រទេសមួយដ៏កក់ក្តៅ ធ្វើអោយអ្នកវិនិយោគបរទេសមិនតិចទេ ចាប់អារម្មណ៍និងផ្តល់ទំនុកចិត្តខ្ពស់។ រដ្ឋាភិបាលកុម្មុយនិស្តឆ្លាតវៃ បានបោះបង់សេដ្ឋកិច្ចផែនការ និងបានយកគំរូតាមចិនដោយអនុវត្តន៍សេដ្ឋកិច្ចទីផ្សារសេរី។ ចិនជាមហាអំណាចនៅអាស៊ី មានកំណើនសេដ្ឋកិច្ចខ្ពស់ បើវៀតណាមចង់អោយខ្លួនលេចត្រដែតដូចចិន រឺប្រទេសធំៗនៅអាស៊ីដែរនោះ វាជាការត្រឹមត្រូវណាស់ ដែលវៀតណាមបើកចំហទីផ្សារទូលំទូលាយដល់អ្នកវិនិយោគបរទេស។ ម្យ៉ាងទៀត ទីផ្សារបើកចំហក៏អាចពង្រឹងចំណងមិត្តភាពរវាងវៀតណាមនិងបណ្តាប្រទេសជាដៃគូរកស៊ីទាំងនោះដែរ។ នេះក៏អាចជាប្រយោជន៍ដល់នយោបាយវៀតណាមនៅអាស៊ី និង ក្នុងឆាកអន្តរជាតិប្រឈមនឹងចិនជាសត្រូវទឹកដីរបស់ខ្លួនផងដែរ។ បច្ចុប្បន្ន សហគ្រាសវៀតណាមកំពុងតែចាប់ដៃជាមួយអាមេរិកដែលជាអតីតសត្រូវ ដើម្បីធ្វើការអភិវឌ្ឍថាមពលផ្សេង។
ចាប់ដៃអាមេរិកជាអតីតសត្រូវ អាចជួយវៀតណាមអោយប្រឈមនឹងមហាអំណាចចិន នេះសបង្ហាញថា មេដឹកនាំវៀតណាមពិតជាមានភាពវៃឆ្លាតមិនតិចទេ។
ខណៈវៀតណាមត្រេកអរនឹងកំណើនសេដ្ឋកិច្ច ត្រេកអរនឹងការចាប់អារម្មណ៍របស់អ្នកវិនិយោគបរទេស រដ្ឋាភិបាលក្រុងហាណូយក៏មិនអាចមើលរំលងប្រជាជនក្នុងស្រុកបានដែរ ព្រោះទីក្រុង វៀតណាមមួយចំនួនបានទាត់ចោលគំរោងវិនិយោគបរទេសមិនតិចដែរទេ ដោយសារគំរោងទាំងនោះអាចប៉ះពាល់បរិស្ថាន ហើយការអនុវត្តគំរោងទៀតសោត
ក៏អាចត្រូវការទំហំផ្ទៃដីធំធេងផងដែរ។ លើសពីនេះ មនុស្សគ្មានជំនាញក្នុងការងារ កាន់តែច្រើន ក៏អាចមកធ្វើការបម្រើគម្រោងមួយចំនួនបាន។ នេះជាបញ្ហាដែលអាចប៉ះពាល់ដល់គុណភាពផលិតផលសហគ្រាស ក៏ដូចជាប៉ះពាល់ដល់មុខមាត់វៀតណាមក្នុងឆាកអន្តរជាតិ៕
© រក្សាសិទ្ធិដោយ thmeythmey.com