អន្តរជាតិ
នយោបាយអន្តរជាតិ
×![]()
ប្រធានាធិបតីចិនលោក ស៊ី ជិនពីង កំពុងជួបពិភាក្សាជាមួយប្រមុខរដ្ឋាភិបាលមហាយក្សអាស៊ីខាងត្បូងឥណ្ឌា នារិន្ទ្រា ម៉ូឌី ដែលកំពុងស្ថិតក្នុងដំណើរទស្សនកិច្ចរយៈពេល៣ថ្ងៃនៅក្នុងប្រទេសចិន។ មេដឹកនាំទាំងពីរបានបង្ហាញពីបំណងក្នុងការកសាងទំនុកចិត្តនិងការជឿជាក់គ្នាដើម្បីជំរុញការសហការ និងពង្រឹងចំណងសេដ្ឋកិច្ចទ្វេភាគី បើទោះជាប្រទេសទាំងពីរនៅមានជម្លោះព្រំដែនដោះស្រាយមិនចេញក៏ដោយ។ ក្នុងជំនួបនេះ ចិននិងឥណ្ឌាប្តេជ្ញាថែរក្សាសន្តិសុខ សន្តិភាពនិងស្ថិរភាពពិភពលោក ថែមទៀតផង។
មានសំឡេង
ប្រមុខរដ្ឋាភិបាលឥណ្ឌាលោក នារិន្ទ្រា ម៉ូឌី បានអញ្ជើញទៅដល់ប្រទេសចិនកាលពីម្សិលមិញនេះ ដើម្បីជជែកពិភាក្សាជាមួយមេដឹកនាំចិនជុំវិញការរឹតបន្តឹងចំណងការទូត សេដ្ឋកិច្ច និងស្វែងរកដំណោះស្រាយបញ្ចប់ជម្លោះព្រំដែនរ៉ាំរ៉ៃផង។ លោក ម៉ូឌី បានជួបពិភាក្សាជាលក្ខណៈទេ្វភាគីជាមួយប្រធានាធិបតីចិន លោក ស៊ី ជីនពីង ដោយកិច្ចពិភាក្សាផ្តោតលើប្រធានបទជាច្រើន មានទាំងចំណងមិត្តភាពរវាងឥណ្ឌាចិន ការសហការគ្នារក្សាសន្តិសុខ និងស្ថិរភាពពិភពលោកថែមទៀតផង។
យ៉ាងណាមិញ មេដឹកនាំចិនឆ្លៀតលើកឡើងពីបញ្ហាប្រឈម ជាពិសេភាពខុសប្លែកគ្នារវាងចិននិងឥណ្ឌា ដែលភាពខុសប្លែកនេះជាឧបសគ្គក្នុងការពង្រីកការសហការគ្នារវាងមហាយក្សទាំងពីរ។ ប្រមុខរដ្ឋចិនលោក ស៊ី ជីពីង បានលើកឡើងពីសារសំខាន់ នៃទំនាក់ទំនងរវាងចិន និងឥណ្ឌាហើយភាគីទាំងពីរប្តេជ្ញាថានឹងបន្តកសាងទំនុកចិត្តគ្នាក្នុងនាមជាមិត្តជិតខាងល្អ និងធ្វើយ៉ាងណាលុបបំបាត់ចោលនូវការមិនទុកចិត្តគ្នាដែលធ្លាប់កើតមានកន្លងមករវាងមហាអំណាចទាំងពីរ។
មេដឹកនាំទាំងពីរប្រឹងប្រែងត្រួសត្រាយផ្លូវ និងកសាងការផ្សាភ្ជាប់រវាងចិននិងឥណ្ឌា ដែលវានឹងជំរុញអោយទំនាក់ទំនងសេដ្ឋកិច្ចពាណិជ្ជកម្មទ្វេភាគីកាន់តែល្អប្រសើរនៅពេលខាងមុខ។ ក្នុងជំនួបពិភាក្សា មេដឹកនាំរដ្ឋាទាំងពីរក៏លើកឡើងពីការពង្រឹងទំនាក់ទំនងវិស័យអាទិភាពមួយចំនួនរួមមានការកសាងផ្លូវរថភ្លើង ជំរុញការសង់សង់រោងចក្រឧស្សាហកម្ម វិស័យនគរូបនីយកម្មនិងការបំពាក់បំប៉នសមត្ថភាពជំនាញដល់ប្រជាជនទាំងពីរផងដែរ។ លោក ស៊ី ជីនពីង ក៏រំពឹងដែរថា នាពេលខាងមុខក្រុមហ៊ុនចិននឹងបង្កើនការវិនិយោគនៅឥណ្ឌាផងដែរ។
បើយោងតាមចំនួនប្រជាជន ឥណ្ឌាជាទីផ្សារដ៏ធំរបស់ចិន ខណៈពេលដែលចិនក៏ចាត់ទុកឥណ្ឌាជាទីផ្សារដ៏ធំមួយរបស់ខ្លួនដែរ។ បន្ថែមពីនេះ ក្នុងរយៈពេលខាងមុខ ប្រទេសទាំងពីរនឹងព្យាយាមលើកកម្ពស់ភាពជាដៃគូយុទ្ធសាស្ត្រទ្វេភាគីឲ្យកាន់តែស៊ីជម្រៅ។
សូមរំលឹកបន្តិចថា ឥណ្ឌានិងចិន មានជម្លោះព្រំដែនរួមគ្នាតាំងពីយូរមកហើយនៅតំបន់ Arunachal Pradesh និងតំបន់កាស្មៀ។ ជម្លោះព្រំដែននេះបានជំរុញអោយភាគីទាំងពីរប៉ះទង្គិចគ្នាដោយអាវុធនៅតាមបន្ទាត់ព្រំដែនជាច្រើនលើកនាពេលកន្លងមក។ បញ្ហានេះហើយដែលធ្វើឲ្យចំណងមិត្តភាពប្រទេសទាំងពីរល្អក់ករក និងខ្វះខាតការជឿទុកចិត្តគ្នាទៅវិញទៅមក។ ក្រោយពីជួបពិភាក្សាជាមួយប្រធានាធិបតីចិន នាយករដ្ឋមន្ត្រីឥណ្ឌានេះក៏ជួបពិភាក្សាជាមួយសមភាគីចិនលោក លី ខឹកឆៀងបន្ទាប់មកលោកនឹងបន្តទស្សនកិច្ចនៅតំបន់ឧស្សាហកម្មនៅសៀងហៃ៕
© រក្សាសិទ្ធិដោយ thmeythmey.com
