អន្តរជាតិ
នយោបាយអន្តរជាតិ
ក្រុងសេអ៊ូលគ្រោងអនុញ្ញាតឲ្យក្បួនស្ត្រីស្នើបញ្ចប់សង្គ្រាមកូរ៉េចូលទឹកដីខ្លួន
× មន្ត្រីរដ្ឋាភិបាលកូរ៉េខាងត្បូងបានបញ្ជាក់ថា កូរ៉េខាងត្បូងនឹងអនុញ្ញាតឱ្យបណ្តាញស្ត្រីអន្តរជាតិដែលធ្វើបាតុកម្មទាមទារបញ្ចប់សង្គ្រាមកូរ៉េទាំងពីរ អាចឆ្លងចូលទឹកដីខ្លួនបាន។គម្រោងក្បួនដង្ហែរនេះផ្តើមចេញមកពីប្រទេសកូរ៉េខាងជើងដោយឆ្លងកាត់តំបន់គ្មានយោធាដែលពុះចែកកូរ៉េជាពីរ។
ក្រុមបណ្តាញស្ត្រីអន្តរជាតិ(WomenCrossDMZ)ដែលដឹកនាំដោយលោកស្រីGloria Steinem។ ការដង្ហែក្បួននេះនឹងចាប់ផ្តើមនៅថ្ងៃទី២៤ ខែឧសភាខាមុខ ដែលផ្តើមចេញមកពីប្រទេសកូរ៉េខាងជើងរដ្ឋធានីព្យុងយ៉ាងឆ្ពោះទៅកាន់គ្មានយោធា ដែលខណ្ឌចែកកូរ៉េទាំងពីរ។ សកម្មភាពគឺធ្វើឡើងក្នុងគោលបំណង អំពាវនាវឱ្យមានការបញ្ចប់សង្គ្រាមរវាងកូរ៉េទាំងពីរ ។
មន្ត្រីម្នាក់មិនបានបង្ហាញអត្តសញ្ញាណបានបង្ហើបថាបច្ចុប្បន្ននេះនៅសល់នីតិវិធីមួយចំនួនទៀតដែលអ្នកដឹកនាំចលនានេះមិនទាន់បំពេញចប់សព្វគ្រប់ ប៉ុន្តែរដ្ឋាភិបាលនឹងផ្ដល់ភ្លើងពណ៌បៃតងចំពោះការដង្ហែរក្បួនឆ្លងកាត់កូរ៉េខាងត្បូង។
សូមបញ្ជាក់ថា ទោះជាសង្គ្រាមកូរ៉េបញ្ចប់ទៅតាំងពីឆ្នាំ ១៩៥៣ ក៏ពិតមែន តែកូរ៉េខាងជើង និងកូរ៉េខាងត្បូងនៅតែបន្តប្រឈមមុខដាក់គ្នាផ្នែកយោធា អាចឈានដល់ផ្ទុះសង្គ្រាមជាមួយគ្នាផង។ នេះក៏ដោយសារភាគីទាំងពីរសម្រេចបានត្រឹមបទឈប់បាញ់មួយប៉ុណ្ណោះ មិនមែនជាសន្ធិសញ្ញាសន្តិភាពអ្វីឡើយ។
លើសពីនេះមន្ត្រីរដ្ឋាភិបាលកូរ៉េខាងត្បូងបានបញ្ជាក់ផងដែរថា ក្រុងសេអ៊ូលមិនទាន់បានប្រកាសជាសាធារណៈនៅឡើយទេថាខ្លួនអនុញ្ញាតអោយក្បួនដង្ហែរនេះឆ្លងតាមទឹកដីរបស់ខ្លួន ព្រោះកូរ៉េខាងត្បូងបន្តពិភាក្សាជាមួយស្ថាប័នទទួលបន្ទុកកិច្ចការព្រំប្រទល់ រវាងកូរ៉េខាងជើងនិងខាងត្បូងរបស់អង្គការសហប្រជាជាតិ នាតំបន់Panmunjom ដែលជាកន្លែងប្រឈមមុខគ្នារវាងកងទ័ពកូរ៉េខាងជើងនិងកូរ៉េខាងត្បូង។
គួរបញ្ជាក់ថា គេប្រហែលជានឹងលើកទឹកចិត្ត ចលនាស្ដ្រីអន្តរជាតិទាំងនេះ ឲ្យឆ្លងកាត់តំបន់ឧស្សាហកម្មKaesongនៅជាប់ព្រំដែនប្រទេសទាំងពីរ៕
ប្រែសម្រួលដោយ រ៉េន សុភក្តិ
© រក្សាសិទ្ធិដោយ thmeythmey.com