ជាតិ
នយោបាយជាតិ
លោក មឿង សុន បានដាក់ជើងជាន់ដីខ្មែរវិញ ក្រោយពីរត់គេចខ្លួនទៅក្រៅប្រទេសជាង ៦ ឆ្នាំ
× ដូចការគ្រោងទុកប្រធានអង្គការមូលនិធិទ្រទ្រង់អរិយធម៌ខ្មែរ លោក មឿង សុន បានមកដល់ប្រទេសកម្ពុជាហើយ នៅម៉ោងជាង៩ព្រឹក ថ្ងៃទី១៨ ឧសភានេះ ។ ការវិលត្រឡប់មកស្រុកកំណើតវិញរបស់លោក មឿង សុន នាពេលនេះបានធ្វើឡើង ក្រោយពីព្រះមហាក្សត្រព្រះរាជទានលើកលែងទោសកាលពីថ្ងៃទី ០៥ ខែឧសភា កន្លងទៅ ។
បន្ទាប់ពីឃ្លាតឆ្ងាយពីមាតុភូមិកំណើតអស់រយៈពេលជាង ៦ ឆ្នាំ លោក មឿង សុន ប្រធានក្រុមប្រឹក្សាភិបាលមូលនិធិទ្រទ្រង់អរិយធម៌ខ្មែរ បានមកដល់ប្រទេសកម្ពុជាវិញហើយ នៅព្រឹកថ្ងៃចន្ទនេះ ។ ដំណើរមកដល់មាតុភូមិកំណើតរបស់លោក មឿង សុន បានទទួលការស្វាគមន៍ពីព្រះសង្ឃ និងមិត្តភក្តិរបស់លោកមួយចំនួនផងដែរ ។
លោក មឿង សុន បានរត់គេចខ្លួនទៅរស់នៅក្រៅប្រទេស បន្ទាប់ពីតុលាការ សម្រេចដាក់ទោសរូបលោកឲ្យជាប់ពន្ធនាគារ ពាក់ព័ន្ធនឹងការរិះគន់ការដាក់អំពូលភ្លើងលម្អប្រាសាទអង្គរវត្តរបស់អាជ្ញាធរអប្សរា កាលពីឆ្នាំ ២០០៩ ។ លោក មឿង សុន ជាអតីតសមាជិកជាន់ខ្ពស់គណបក្សសមរង្ស៊ី ធ្លាប់បានអះអាងប្រាប់សារព័ត៌មានថ្មីៗថា រូបលោកនឹងឈប់ធ្វើនយោបាយដើម្បីដណ្តើមអំណាចជាមួយគណបក្សប្រជាជនកម្ពុជាតទៅទៀតដូចលើកមុនឡើយ ។ លោកថា ការធ្វើនយោបាយធ្វើឲ្យលោកបាត់បង់មិត្តភក្តិជាច្រើន ហើយផ្ទុយទៅវិញ លោកបង្កើនចំនួនសត្រូវកាន់តែច្រើន។
ព្រះមហាក្សត្រ បានព្រះរាជទានលើកលែងទោសដល់ លោក មឿង សុន ប្រធានក្រុមប្រឹក្សាភិបាលមូលនិធិទ្រទ្រង់អរិយធម៌ខ្មែរកាលពីថ្ងៃទី៥ ខែ ឧសភា ឆ្នាំ ២០១៥ កន្លងទៅ។ ព្រះរាជក្រឹត្យរបស់ព្រះមហាក្សត្រ ព្រះបាទ សម្តេច នរោត្តម សីហមុនី បានសរសេរយ៉ាងនេះថា៖«ត្រូវបានលើកលែងទោសឲ្យទណ្ឌិតឈ្មោះ មឿង សុន ភេទប្រុស អាយុ ៦២ឆ្នាំ ដែលត្រូវបានតុលាការសម្រេចផ្តន្ទាទោសដាក់ពន្ធនាគារ តាមអំណាចសាលដីកាស្ថាពរលេខ ៨១ ចុះថ្ងៃទី ១១ មេសាឆ្នាំ២០១២ របស់តុលាការកំពូល និងលោកនាយករដ្ឋមន្ត្រី ហ៊ុន សែន ត្រូវទទួលបន្ទុកអនុវត្តឲ្យបានសម្រេចតាមព្រះរាជក្រឹត្យនេះ»៕ © រក្សាសិទ្ធិដោយ thmeythmey.com