អន្តរជាតិ
នយោបាយអន្តរជាតិ
កោះ Palau ហៅអ្នកនេសាទវៀតណាមខុសច្បាប់ចោរសមុទ្រនិងដុតកម្ទេចទូកចោល ![](https://image.thmeythmey.com/pictures/2015/06/13/6544026-3x2-700x467.jpg)
×![]()
ប្រទេសកោះ Palau នៅកណ្តាលសមុទ្រប៉ាស៊ីហ្វីកបានកម្ទេចចោលទូកនេសាទរបស់វៀតណាមប្រហែល៤គ្រឿងនៅថ្ងៃសុក្រម្សិលមិញ ខណៈទូកនេសាទទាំងនោះត្រៀមនេសាទត្រីខុសច្បាប់។ ប្រធានាធិបតី Palau បានសង្កត់ធ្ងន់ថា ការកម្ទេចចោលទូកនេសាទនេះជាសារប្រាប់រដ្ឋាភិបាលវៀតណាមថា Palau មិនលើកលែងដាច់ខាតចំពោះក្រុមចោរសមុទ្រដែលហ៊ានលួចធនធានរបស់ខ្លួន។
លោក មុំ ពិទូរ្យ លម្អិតព័ត៌មាននេះ
វិធានការក្តៅរបស់រដ្ឋាភិបាល Palau គឺកម្ទេចចោលទូកនេសាទវៀតណាមដែលហ៊ានឆ្លងដែនចូលក្នុងសមុទ្ររបស់ខ្លួនដើម្បីនេសាទត្រីនៅព្រឹកថ្ងៃសុក្រម្សិលមិញនេះ។ រឿងចម្រូងចម្រាសនេះកើតមានឡើង ដោយសារភាគីវៀតណាមប៉ុនប៉ងលួចនេសាទត្រីខុសច្បាប់ និងនេសាទយកធនធានមានតម្លៃក្នុងសមុទ្រផង។ បើតាមការឲ្យដឹងរបស់អាជ្ញាធរ Palau ទូកនេសាទទាំងអស់ដែលត្រូវដុតកម្ទេចចោលគឺសរុបបួនគ្រឿង។
ការមិនអត់អោនចំពោះការលួចនេសាទខុសច្បាប់នេះ ជាសាររបស់រដ្ឋាភិបាលចង់ផ្ញើរទៅកាន់រដ្ឋាភិបាលក្រុងហាណូយចំពោះការបន្តព្រងើយកន្តើយនឹងសកម្មភាពខុសច្បាប់នេះ។ ប្រធានាធិបតី Palau លោក Tommy RemengesauJr បានបញ្ជាក់យ៉ាងច្បាស់ហើយថា រដ្ឋាភិបាលរបស់លោកចង់ផ្ញើរសារសំខាន់មួយទៅកាន់ភាគីវៀតណាម ថាលោកនឹងមិនអត់អោនដល់ក្រុមចោរសមុទ្រដែលថ្លើមធំហ៊ានចូលលួចនេសាទយកធនធានមានតម្លៃនៅក្នុងសមុទ្ររបស់ខ្លួនឡើយ។
យោងតាមរដ្ឋាភិបាលប្រទេសនេះ ចាប់តាំងពីឆ្នាំមុនមក អាជ្ញាធរបានចាប់ឃាត់ទូកនេសាទខុសច្បាប់ប្រហែល ១៥គ្រឿង ដែលប៉ងមកនេសាទត្រីឆ្លាម នេសាទមឹក ត្រីច្រើនប្រភេទទៀត និងឈ្លើងសមុទ្រជាដើម។ កន្លងមក អាជ្ញាធរមិនបានដុតកម្ទេចទូកនេសាទដូចលើកនេះទេ ប៉ុន្តែរដ្ឋាភិបាលបានថ្លែងថាវិធានការមុនៗគ្មានប្រសិទ្ធភាពក្នុងការកម្ចាត់ក្រុមនេសាទខុសច្បាប់ឡើយ។ សូមបញ្ជាក់ថា ប្រទេស Palau ត្រូវបានគេបញ្ចូលឈ្មោះជាប្រទេសដែលស្ថិតនៅក្នុងលេខរៀងទី៣៥ដែលសម្បូរហូរហៀរដោយធនធានសមុទ្រ និងជីវចម្រុះផងដដែរ។
កន្លងមកប្រទេសជាច្រើនដែលសម្បូរធនធានសមុទ្របានចាត់វិធានការតឹងតែងដើម្បីបង្ក្រាបក្រុមចោរសមុទ្រនិងក្រុមនេសាទខុសច្បាប់ ប៉ុន្តែដែនសមុទ្រនៅចន្លោះពីជប៉ុនទៅ កោះ Palau នៅមិនទាន់មានការត្រួតពិនិត្យនិងបង្ក្រាបការនេសាទខុសច្បាប់បានត្រឹមត្រូវនៅឡើយទេ ដោយសារបញ្ហាភូមិសាស្ត្រស្មុគស្មាញ។
ប្រទេសកោះដ៏តូចមួយនេះ មានប្រជាជនសរុបប្រហែលជា ២ម៉ឺននាក់ប៉ុណ្ណោះ ហើយប្រទេសនេះដែរត្រូវបានពិភពលោកស្ងើចសរសើរព្រោះតែខិតខំប្រឹងប្រែងថែរក្សាប្រព័ន្ធអេកូឡូស៊ី និងជីវចម្រុះសមុទ្រជាច្រើន៕
© រក្សាសិទ្ធិដោយ thmeythmey.com