អន្តរជាតិ
នយោបាយអន្តរជាតិ
×![]()
អង្គការយូណេស្កូ បានថ្កោលទោសការទម្លាក់គ្រាប់កម្ទេចបំផ្លិចបំផ្លាញសម្បត្តិបេតិកភណ្ឌ ប្រាសាទបុរាណនៅក្នុងទីក្រុង Sanaa ប្រទេសយេម៉ែននៅថ្ងៃសុក្រម្សិលមិញ។ គេសន្និដ្ឋានថា អ្នកដែលនៅពីក្រោយការបំផ្លិចបំផ្លាញសំណង់ទីក្រុងបុរាណនេះគឺក្រុមកងកម្លាំងអារ៉ាប៊ីសាអូឌីតដែលបានបន្តទម្លាក់គ្រាប់បែកប្រឆាំងក្រុមឧទ្ទាម Houthisដែលគាំទ្រដោយអ៊ីរ៉ង់។
រាយការណ៍ព័ត៌មានលម្អិតដោយ លោក រឿន ភារុន
សម្បតិ្តបេតិកភណ្ឌនៅកណ្តាលរដ្ឋធានី សាណា ប្រទេសយេម៉ែន រងការបំផ្លិចបំផ្លាញយ៉ាង ដំណំ។ អង្គការយូណេស្កូ បានចេញមុខថ្កោលទោសការបំផ្លិចបំផ្លាញប្រាសាទបុរាណ ដ៏មាន តម្លៃនៃមនុស្សជាតិនេះផងដែរកាលពីម្សិលមិញនេះ។ប្រាសាទបុរាណដែលរងការបំផ្លិច បំផ្លាញរាបដល់ដីនេះជាទីក្រុងដែលមានរចនាបទឥស្លាម ហើយគេចោទប្រកាន់ថា ក្រុមកង កម្លាំងទ័ពអាកាសអារ៉ាប់ដែលដឹកនាំដោយអារ៉ាប៊ីសាអូឌីតជាអ្នកនៅពីក្រោយការបំផ្លាញនេះ។ អាជ្ញាធរក៏បានបញ្ជាក់ផងដែរថា ក្រៅពីសំណង់ត្រូវបំផ្លិចបំផ្លាញមនុស្ស ៥នាក់ផ្សេងទៀត ក៏បានស្លាប់បាត់បង់ជីវិតផងដែរ។
អគ្គនាយកអង្គការយូណេស្កូលោកស្រី Irina Bokov ថ្លែងប្រាប់អ្នកសារព័ត៌មានថា លោកស្រីពិតជាសោកសង្រេងនិងរន្ធត់ចំពោះការស្លាប់បាត់បង់ជិវិតរបស់ពលរដ្ឋស្លូតត្រង់ និងការខ្ទេចខ្ទាំសំណង់បុរាណជាទ្រព្យមានតម្លៃមិនអាចកាត់ថ្លៃបានបន្សល់ទុកមករាប់ពាន់ឆ្នាំហើយនោះ។លោកស្រីបានស្នើឲ្យបណ្តាភាគីជម្លោះគោរពនិងថែរក្សាបេតិកភណ្ឌវប្បធម៌នេះ ទោះជាក្នុងកាលៈទេសៈណាក៏ដោយ ។
សូមបញ្ជាក់ផងដែរ ទីក្រុងបុរាណនេះមានអាយុកាលប្រហែល ២៥០០ឆ្នាំហើយ ដែលក្នុង តំបន់បេតិកភណ្ឌទាំងមូលមានវិហារឥស្លាមរហូតដល់ជាង១០០ ផ្ទះសង់តាមរចនាបទឥស្លាម ប្រហែលជាង៦ពាន់ផ្ទះដែលផ្ទះទាំងនេះភាគច្រើនត្រូវបានសាង់សង់ឡើងមុនសតវត្សទី១។
ក្រោយជម្លោះនៅយេម៉ែនផ្ទុះឡើង អារ៉ាប៊ីសាអូឌីតបានចេញមុខបញ្ជាឲ្យមានការវាយ ប្រហារតាមផ្លូវអាកាសដោយទម្លាក់គ្រាប់បែកប្រឆាំងក្រុមឧទ្ទាម Houthis ដែលគាំទ្រ រដ្ឋាភិបាលដោយអ៊ីរ៉ង់ផងដែរ។ ជាង ២ខែហើយដែលក្រុមនេះបន្តទម្លាក់គ្រាប់បែក នៅកណ្តាលទីក្រុងសាណា ដូច្នេះទើបបានជាគេចោទប្រកាន់អារ៉ាប៊ីសាអូឌីតជាអ្នកដែលនៅ ពីក្រោយការបំផ្លាញបេតិកភណ្ឌមនុស្សជាតិ។
ជុំវិញការចោទប្រកាន់នេះ ខាងរដ្ឋាភិបាលក្រុងរីយ៉ាដបានបដិសេធជាស្រេចហើយ ដោយ ទម្លាក់កំហុសលើក្រុមឧទ្ទាមវិញ។ ប៉ុន្តែបើតាមការឲ្យដឹងរបស់ប្រជាជនមូលដ្ឋាន កងកម្លាំង អារ៉ាប៊ីសាអូឌីតជាអ្នកធ្វើច្រើនជាងព្រោះក្រុមនេះបានបើកយុទ្ធនាការវាយប្រហារកម្ទេចមូលដ្ឋានក្រុមឧទ្ទាមនៅទីក្រុងសាណា។ ប្រជាជនទាំងនោះបានអះអាងថាពួកគេបានលឺសម្លេង និងឃើញកាំជ្រួចមីស៊ីលបាញ់ពីលើយន្តហោះបានហោះបុកកម្ទេចសំណង់បុរាណទាំងអស់នោះ។
ដោយឡែកការបំផ្លិចបំផ្លាញសំណង់បុរាណនេះកើតមានឡើងត្រឹមប៉ុន្មានថ្ងៃប៉ុណ្ណោះមុនពេលដែលបណ្តាក្រុមភាគីជម្លោះនយោបាយយេម៉ែន ជួបជុំគ្នាដើម្បីស្វែងរកសន្តិភាពនៅក្នុង ទីក្រុងហ្សឺណែវក្រោមការជ្រោមជ្រែងពីសំណាក់អង្គការសហប្រជាជាតិ។ គេសង្ឃឹមថា កិច្ចពិភាក្សានេះនឹងជួយត្រួសត្រាយផ្លូវដល់ភាគីដើម្បីបញ្ចប់ជម្លោះនយោបាយរាំរ៉ៃនេះ៕
© រក្សាសិទ្ធិដោយ thmeythmey.com
