អន្តរជាតិ
នយោបាយអន្តរជាតិ
អាមេរិករៀបគម្រោងពង្រាយអាវុធធុនធ្ងន់និងទ័ពទៅអឺរ៉ុបខាងកើត ![](https://image.thmeythmey.com/pictures/2015/06/14/1803057.jpg)
×![]()
ក្រុងវ៉ាស៊ីនតោនមានគម្រោងពង្រាយសព្វាវុធធុនធ្ងន់និងទ័ពជាង៥ពាន់នាក់ផងនៅបញ្ឈរជើងនៅតំបន់បាល់ទិក និងអឺរ៉ុបខាងកើត។ ជុំវិញការពង្រាយសព្វាវុធដូចត្រៀមធ្វើសង្គ្រាមនេះ បើយោងតាមសារព័ត៌មានអាមេរិក The New York Times អាមេរិកចង់ការពារសម្ព័ន្ធមិត្តរបស់ខ្លួន ចៀសផុតពីការគំរាមកំហែងរបស់ក្រុងម៉ូស្គូ។ ប៉ុន្តែបើសិនមានការពង្រាយសព្វាវុធមែន ការប្រឈមមុខគ្នារវាងមហាអំណាចទាំងពីរកាន់តែកើនឡើងខ្លាំងមិនខាន។
លោក មុំ ពិទូរ្យ លម្អិតព័ត៌មាននេះ
រដ្ឋបាលលោក បារ៉ាក់ អូបាម៉ា ពិចារណាបញ្ជូនសព្វាវុធគ្រប់ធុននិងកងទ័ពថ្មើជើងទៅកាន់បណ្តារដ្ឋអឺរ៉ុបខាងកើតនិងបាល់ទិកនៅពេលខាងមុខនេះ។ បើតាមការដកស្រង់សម្តីមន្ត្រីជាន់ខ្ពស់ក្រុងវ៉ាស៊ីនតោនក្នុងសារព័ត៌មាន The New York Times អាវុធយុទ្ធភ័ណ្ឌដែលគេពិចារណាបញ្ជូនទៅអឺរ៉ុបខាងកើតនោះរួមមានរថក្រោះ កាំភ្លើងធំ និងសព្វាវុធជាច្រើនផ្សេងទៀត រួមជាមួយកងទ័ពថ្មើជើងប្រហែល៥ពាន់ផ្សេងទៀត ។
បើមានការសម្រេចជាផ្លូវការចំពោះការសាងកម្លាំងយោធានៅតំបន់អឺរ៉ុបខាងកើតនិងបាល់ទិកមែននោះ កងទ័ពនិងសព្វាវុធធុនធ្ងន់ច្រើនសន្ធឹកសន្ធាប់នោះនឹងត្រូវបញ្ឈរជើងនៅបណ្តាប្រទេសមួយចំនួនក្នុងនោះមាន ឡាត់វី លីទុយនី អេស្តូនី ប៉ូឡូញ ប៊ុលការី រ៉ូម៉ានី និងហុងគ្រីថែមទៀតផងដែរ។ ប្រទេសទាំងអស់ខាងលើត្រូវពិចារណាជាមុនថានឹងអនុញ្ញាតឲ្យសហរដ្ឋអាមេរិកប្រើប្រាស់ដែនដីរបស់ខ្លួនដើម្បីដាក់មូលដ្ឋានទ័ពឬក៏អត់ ព្រោះពួកគេនៅភ័យព្រួយ មិនដឹងថា រុស្ស៊ីនឹងប្រតិកម្មបែបណាបើបញ្ហានេះកើតឡើងមែននោះ។
កាលពីថ្មីៗនេះដែរ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានព្រមានជាមុនហើយ ពីការបន្តតំឡើងសាច់ដុំយោធារបស់បក្សសម្ព័ន្ធណាតូដើម្បីសំឡុតគំរាមរុស្ស៊ី។ លោកបានផ្ញើរសារប្រាប់ក្រុងវ៉ាស៊ីនតោនឲ្យប្រុងប្រយ័ត្នព្រោះរុស្ស៊ីមិនបានកសាងកម្លាំងទ័ពនៅក្រៅប្រទេសឡើយ ប៉ុន្តែរុស្ស៊ីរក្សាសិទ្ធិស្វ័យការពារឆ្លើយតបវិញរាល់ការគំរាមកំហែងបង្កឡើងដោយការពង្រីកអំណាចយោធារបស់ក្រុមរដ្ឋសមាជិកណាតូ។
តាមពិតទៅ សហរដ្ឋអាមេរិកមានចេតនាពង្រាយសព្វាវុធទៅអឺរ៉ុប ដោយចង់បញ្ជាក់ពីការទទួលខុសត្រូវ ធានាពីសន្តិសុខរបស់បណ្តារដ្ឋសម្ព័ន្ធមិត្តរបស់ខ្លួននៅអឺរ៉ុបជាសមាជិកបក្សសម្ព័ន្ធយោធាណាតូឲ្យរួចផុតពីការគំរាមកំហែងពីរខាងក្រៅ។ ប៉ុន្តែបើសិនជាមានការពង្រាយសព្វាយវុធធុនធ្ងន់និងបញ្ជូនកងទ័ពរាប់ពាន់នាក់ទៅកាន់តំបន់អឺរ៉ុបមែន វានឹងក្លាយជាសកម្មភាពមួយមិនធ្លាប់មានពីមុនក្រោយបញ្ចប់សង្គ្រាមត្រជាក់ ហើយវាក៏អាចនឹងក្លាយជាគ្រោះថ្នាក់មួយសម្រាប់អឺរ៉ុបផងដែរ។ ការបញ្ឈរជើងកងទ័ព តំឡើងសព្វាវុធធុនធ្ងន់នៅតាមព្រំដែនក្បែរៗរុស្ស៊ី វានឹងធ្វើឲ្យការប្រឈមមុខដាក់គ្នាកាន់តែខ្លាំងផ្នែកសព្វាវុធ ហើយវាអាចឈានដល់ការប៉ះទង្គិចគ្នាផងដែរបើគ្មានការគ្រប់គ្រងស្ថានការណ៍ឲ្យបានប្រសើរទេនោះ។
ចាប់តាំងពីមានការរួបរួមរគ្នារវាងឧបទ្វីប Crimea ជាមួយសហព័ន្ធរុស្ស៊ីមក សហរដ្ឋអាមេរិក និងបណ្តាសមាជិកណាតូ ចាប់ផ្តើមផ្តោតលើការកសាងកម្លាំងទ័ពតាមព្រំដែនរុស្ស៊ី។ សមយុទ្ធតូចធំ តាមផ្លូវទឹក ផ្លូវគោក និងផ្លូវអាកាសត្រូវរៀបចំឡើងជាប្រចាំមិនឆ្ងាយប៉ុន្មានពីព្រំដែនប្រទេសរុស្ស៊ីឡើយ។ ចំណែករុស្ស៊ីក៏មិននៅស្ងៀមដែរ ហើយប្រទេសនេះបានបន្តធ្វើសមយុទ្ធតបវិញដូចគ្នាតាមបណ្តោយព្រំដែនរបស់ខ្លួន៕
© រក្សាសិទ្ធិដោយ thmeythmey.com