បទយកការណ៍ / បទសម្ភាសន៍
លោក អ៊ូ វីរៈ៖ គណបក្សប្រជាជនកម្ពុជាមានអនុប្រធាន២ អាចទៅរួច ព្រោះ... លោក អ៊ូ វីរៈ
× ភ្នំពេញ៖ ប្រតិកម្មប្រឆាំងការរំលោភព្រំដែនពីសំណាក់ប្រទេសវៀតណាមផង ការប្រកាសរៀបចំមហាសន្និបាតគណកម្មាធិការកណ្តាលដើម្បីជ្រើសរើសថ្នាក់ដឹកនាំបក្ស និងលោកនាយករដ្ឋមន្ត្រីបានចាប់ផ្តើមធ្វើបាឋកថាស្តីពីនយោបាយឈ្នះឈ្នះរបស់លោក។ មេដឹកនាំគណបក្សប្រជាជនកម្ពុជាកំពុងមានការងារច្រើនត្រូវធ្វើ។ អ្នកស្រាវជ្រាវ និងជាអ្នកតាមដានស្ថានការណ៍នយោបាយនៅកម្ពុជា លោក អ៊ូ វីរៈ បានផ្តល់បទសម្ភាសន៍ដល់លោក លាង ដឺលុច និពន្ធនាយកសារព័ត៌មានថ្មីៗ ដើម្បីអត្ថាធិប្បាយលើបញ្ហាទាំងនេះ។
លោក លាង ដឺលុច៖ លោកនាយករដ្ឋមន្ត្រី ហ៊ុន សែន កំពុងតែមានការងារច្រើនបន្ថែមទៀតក្នុងពេលបច្ចុប្បន្ន។ លើសពីដំណែងជានាយករដ្ឋមន្ត្រី លោកនឹងក្លាយជាប្រធានគណបក្សប្រជាជនកម្ពុជា ដែលត្រូវការទទួលខុសត្រូវកាន់តែខ្លាំងថែមទៀត។ លើសពីនេះ លោកក៏អាចធ្វើបាឋកថាប្រាប់និស្សិតនៅតាមមហាវិទ្យាល័យ អំពីគោលនយោបាយឈ្នះឈ្នះ ដែលបញ្ចប់មូលដ្ឋានទ័ពខ្មែរក្រហមទាំងស្រុង ជាបន្តបន្ទាប់ ដូចលោកបានចាប់ផ្តើមជាមួយសាកលវិទ្យាល័យន័រតុននៅថ្ងៃចន្ទនេះ។ តើលោកមើលឃើញយ៉ាងណាពីទិដ្ឋភាពទាំងនេះ? លោក អ៊ូ វីរៈ៖ រឿងធ្វើបាឋកថានិយាយអំពីនយោបាយឈ្នះឈ្នះនេះ វាជារឿងដែលត្រូវធ្វើយូរហើយ។ អ្នកនយោបាយនៅស្រុកគេ ក៏គេដើរពន្យល់អំពីការវិវត្តនយោបាយរបស់ប្រទេសជាតិអ៊ីចឹងដែរ។ ប៉ុន្តែអាចថា នៅពេលនេះ នៅពេលដែលសម្តេចធ្វើជាប្រធានគណបក្ស ប្រហែលអាចងាយស្រួលរៀបចំការធ្វើបាឋកថាជាង ក៏អាចថាបាន។
លោក លាង ដឺលុច៖ តើការធ្វើបាឋកថានេះ មានន័យត្រឹមតែជាការរំឮកប្រាប់និស្សិតបច្ចុប្បន្នដែលភាគច្រើន ចាប់កំណើតក្នុងទស្សវត្សរ៍១៩៩០ ដើម្បីឲ្យពួកគេបានដឹងអំពីស្នាដៃរបស់លោកនាយករដ្ឋមន្ត្រីបានបង្រួបបង្រួមទឹកដី តាមរយៈការបញ្ចប់ខ្មែរក្រហម ឬយ៉ាងណា?
លោក អ៊ូ វីរៈ៖ លោកនាយករដ្ឋមន្ត្រីត្រូវព្យាយាមនិយាយអំពីកេរដំណែលរបស់គាត់។ គាត់បានផ្តួលរំលំរបបខ្មែរក្រហមនៅឆ្នាំ១៩៧៩ គាត់គឺជាអ្នករៀបចំគោលនយោបាយឈ្នះឈ្នះ បញ្ចប់មូលដ្ឋានទ័ពចុងក្រោយរបស់ខ្មែរក្រហមក្នុងឆ្នាំ១៩៩៨ ហើយចុងក្រោយនេះគាត់បានចូលរួមបង្កើតវប្បធម៌សន្ទនាជាមួយគណបក្សប្រឆាំងទៀត។ ទាំងអស់នេះ គាត់ត្រូវបង្ហាញដើម្បីទាក់ទាញយុវជន។
លោក លាង ដឺលុច៖ បានន័យថា ព្រួញមួយបាញ់បានសត្វពីរ។ លោកនាយករដ្ឋមន្ត្រីកំពុង ទាក់ទាញចំណាប់អារម្មណ៍ពីយុវជនសម្រាប់គណបក្សផង ហើយគាត់ក៏បានបង្ហាញពីស្នាដៃរបស់គាត់ដែរ?
លោក អ៊ូ វីរៈ៖ បាទ។
លោក លាង ដឺលុច៖ និយាយអំពីថ្នាក់ដឹកនាំគណបក្សប្រជាជនកម្ពុជាវិញម្តង។ សម្រាប់លោក អ៊ូ វីរៈ តើវាអាចទៅរួចទេ ដែលគណបក្សប្រជាជនកម្ពុជា នឹងមានអនុប្រធាន២រូប?
លោក អ៊ូ វីរៈ៖ គ្មានអ្វីដែលមិនអាចទៅរួចនោះទេ។ ហើយវានឹងក្លាយជាសញ្ញាល្អមួយទៀតផង។ វាអាចជាសារមួយរបស់គណបក្សដែលចង់ផ្ញើទៅអ្នកគាំទ្ររបស់ខ្លួនថា វាមិនមានអ្វីប្រែប្រួលក្រោយមរណភាពរបស់លោក ជា ស៊ីម នោះទេ។ ផ្ទុយទៅវិញ គឺមានតែភាពល្អូកល្អិន។ ម្យ៉ាងទៀត យើងក៏កត់សម្គាល់អំពីការផ្តល់គោរមងារ ដល់លោក ស ខេង និងលោក សាយ ឈុំ នៅពេលនេះដែរ។ បើនិយាយអំពីលទ្ធភាពដែលគណបក្សនេះ អាចមានអនុប្រធាន២រូបនោះ ដោយក្នុងនោះមានរូបលោក សាយ ឈុំ ដែរ ដូច្នេះគេត្រូវសួរអំពីបេក្ខភាពអគ្គលេខាធិការបក្សបន្តទៀត។
លោក លាង ដឺលុច៖ ក្នុងករណីនេះ បើតាមលោកយល់ តើអ្នកណាអាចជាអគ្គលេខាធិការគណបក្សប្រជាជនកម្ពុជា?
លោក អ៊ូ វីរៈ៖ គណបក្សនេះគោរពលេខរៀងរចនាសម្ព័ន្ធណាស់។ ប៉ុន្តែយោបល់ខ្ញុំ គណបក្សនេះគួរតែរកឲ្យបានបេក្ខភាពក្មេង ដែលមានសមត្ថភាព ហើយដែលអាចធ្វើការជាមួយក្រុមឥស្សរជនចាស់។
លោក លាង ដឺលុច៖ ចុងក្រោយខ្ញុំចង់ជម្រាបសួរលោកអំពីប្រតិកម្មរបស់រដ្ឋាភិបាលកម្ពុជា ក្នុងសំណុំរឿងអាជ្ញាធរវៀតណាមជីកស្រះទឹកលើទឹកដីកម្ពុជា។ លោកយល់យ៉ាងណាដែរ?
លោក អ៊ូ វីរៈ៖ បញ្ហានេះខ្ញុំពិបាកស្មានណាស់។ ប៉ុន្តែខ្ញុំថា វាចាំបាច់ក្នុងការបង្ហាញប្រតិកម្ម។ ខ្ញុំមិនយល់ថា ហេតុអ្វីបានជាវៀតណាមមកជីកស្រះនៅទីនោះ? ម្យ៉ាងទៀត រដ្ឋាភិបាលកម្ពុជាហាក់នៅលាក់លៀម អំពីការប្រើប្រាស់ផែនទីកំណត់ព្រំដែនជាមួយវៀតណាម។ ខ្ញុំថារឿងនេះនៅស្មុគស្មាញ៕
© រក្សាសិទ្ធិដោយ thmeythmey.com