អន្តរជាតិ
នយោបាយអន្តរជាតិ
×![]()
ដោយ: ថ្មីៗ
ក្រុងព្យុងយ៉ាង សម្រេចជោគជ័យក្នុងការបាញ់កាជ្រួចប្រភេទថ្មីដែលប្រើប្រាស់សម្រាប់ប្រឆាំងនាវារយៈចម្ងាយខ្លីកាលពីម្សិលមិញនៅភាគខាងកើតប្រទេស។ អាវុធដែលត្រូវគេបាញ់សាកល្បងនោះគឺប្រភេទKN-01 ដែលជាអាវុធទំនើបមួយ ហើយបើតាមការឲ្យដឹងពីមនុស្សជំនិតមេដឹកនាំកំពូលកូរ៉េខាងជើង របបដឹកនាំនេះនឹងព្យាយាមបង្កើនសមត្ថភាពកងទ័ពជើងទឹកនិងបង្កើនបច្ចេកវិទ្យាយោធាឲ្យដល់លំដាប់ស្តង់ដាអន្តរជាតិ។
កូរ៉េខាងជើងចាប់ផ្តើមក្រឡុកតំបន់ជាថ្មីដោយបាញ់សាកល្បងអាវុធទំនើបថ្មីរបស់ខ្លួននៅសមុទ្រដែលស្ថិតនៅភាគខាងកើតប្រទេស។ អាវុធរយៈចម្ងាយខ្លីថ្មីត្រូវបានក្រុមទាហានជើងទឹកកូរ៉េខាងជើងកាលពីម្សិលមិញ ដោយអាវុធនេះមានម៉ាក KN-01 ដែលជាអាវុធប្រឆាំងនាវា។ ការសម្រេចបានអាវុធថ្មីទៀតនេះកំពុងតែក្លាយជារឿងគួរឲ្យចាប់អារម្មណ៍មួយ ហើយប្រទេសជិតខាងជើងពិសេសកូរ៉េខាងត្បូងចាត់ទុកជាការគំរាមកំហែងផង។
តាមពិតទៅការបាញ់សាកល្បងម្សិលមិញរៀបចំឡើងដោយមានការត្រួតពិនិត្យដោយមន្ត្រីជាន់ខ្ពស់ក្រុងព្យុងយ៉ាងផង ហើយក្រោយសម្រេចជោគជ័យហើយមេដឹកនាំក្រុងព្យុយ៉ាងបានប្រកាសសាទរចំពោះជោគជ័យនេះផងដែរ។ បើតាមទីភ្នាក់ងារសារព័ត៌មានចិន Xinhua លោកគីម ជុងអ៊ុន បានសាទរការសម្រេចជោគជ័យនេះដែរ ដោយលោកសង្កត់ធ្ងន់ថា ជោគជ័យនេះនឹងនាំឲ្យកងទ័ពជើងទឹកកូរ៉េខាងជើងកាន់តែខ្លាំងនិងអាចការពារខ្លួនផុតពីការគំរាមកំហែងខាងក្រៅ។ លោក គីម ជុងអ៊ុន បានប្រកាសប្តេជ្ញាផងដែរថា របបដឹកនាំរបស់លោកនឹងបន្តប្រឹងប្រែងថែមទៀតដើម្បីអភិវឌ្ឍបច្ចេកវិទ្យាយោធារបស់ខ្លួន ដើម្បីឈានទៅផលិតអាវុធទំនើបៗផ្សេងទៀត ដើម្បីបង្កើនសមត្ថភាពការពារជាតិឲ្យកាន់តែខ្លាំងក្លាថែមទៀត។
កាលពីប៉ុន្មានខែមុន កូរ៉េខាងជើងបានធ្វើឲ្យក្រុងវ៉ាស៊ីនតោនភ្ងាក់ផ្អើលម្តងហើយ ដោយរបបដឹកនាំនេះបានបាញ់សាកល្បងមីស៊ីលចម្ងាយឆ្ងាយបាញ់ចេញពីនាវាមុជទឹកស្តង់ដាពិភពលោកផង។ សហរដ្ឋអាមេរិក និងក្រុងសេអ៊ូល ហាក់ដូចជាមិនជឿពីសមត្ថភាពផលិតអាវុធបានរហ័សរបស់ក្រុងព្យុងយ៉ាងនាពេលបច្ចុប្បន្នទេ ហើយពួកគេអះអាងថា ដើម្បីផលិតអាវុធទាំងនោះ វាប្រាកដណាស់ថា កូរ៉េខាងជើងត្រូវចំណាយលុយច្រើនណាស់ ដែលវាលើសពីសមត្ថភាពរបស់កូរ៉េខាងជើង។
© រក្សាសិទ្ធិដោយ thmeythmey.com
