អន្តរជាតិ
នយោបាយអន្តរជាតិ
រុស្ស៊ីត្រៀមទ័ពនិងអាវុធប្រឆាំងតបបើអាមេរិកហ៊ានធ្វើឲ្យខ្លួនទាល់ច្រក ![](https://image.thmeythmey.com/pictures/2015/06/16/1662015164734140212_feifer_putin_ap.jpg)
×![]()
មហិច្ឆតាសហរដ្ឋអាមេរិកចង់សាងកម្លាំងទ័ពនៅអឺរ៉ុបខាងកើតមិនឆ្ងាយប៉ុន្មានពីព្រំដែនរុស្ស៊ីកំពុងធ្វើឲ្យភាពតានតឹងកើនឡើងកាន់តែខ្លាំង។ ឆ្លើយតបបញ្ហានេះ រុស្ស៊ីបានព្រមានឆ្លើយតបក្រុងក្រុងវ៉ាស៊ីនភ្លាមៗ បើមានការអាមេរិកថ្លើមធំហ៊ានបញ្ជូនទ័ព និងដឹកអាវុធទៅដាក់ក្បែរព្រំដែនខ្លួនមែននោះ។ ម្សិលមិញមន្ត្រីយោធាជាន់ខ្ពស់រុស្ស៊ីបាន សង្កត់ធ្ងន់ថា រុស្ស៊ីនឹងជ្រើសរើសយកយុទ្ធសាស្ត្រដែលគឃ្លើននិងកោងកាចបំផុតមិនធ្លាប់ក្រោយបញ្ចប់សង្គ្រាមត្រជាក់ដើម្បីតបតវិញរាល់ការគំរាមកំហែងសន្តិសុខ។ នេះជាសាររុស្ស៊ីទៅកាន់រដ្ឋអឺរ៉ុបខាងកើតដែលព្យាយាមទទូចសុំឲ្យក្រុងវ៉ាស៊ីនតោនចេញមុខប្រើប្រាស់អំណាចយោធារបស់ខ្លួននៅដើម្បីកំញើញរុស្ស៊ី។ ជុំវិញបញ្ហានេះ បើគេព្រួតគ្នារុញរុស្ស៊ីឲ្យទាល់ច្រកនោះ វាប្រាកដណាស់ថា រុស្ស៊ីនឹងសងសឹកវិញតាមអ្វីដែលខ្លួនអាចធ្វើបានព្រោះរុស្ស៊ីមហាអំណាចមិនមែនប្រទេសតូចតាចឯណា។
សូមស្តាប់ការបកស្រាយរបស់លោក សៅ ផលនិស្ស័យ៖
សម្តីមន្ត្រីក្រុងគៀវថាចង់សុំបក្សសម្ព័ន្ធយោធាណាតូនិងអាមេរិក ឲ្យតំឡើងប្រព័ន្ធមីស៊ីលក្នុងទឹកដីខ្លួនកន្លងមកធ្វើឲ្យរុស្ស៊ីខឹងសម្បារមិនទាន់បាត់ឡើយ ។ ស្រាប់តែថ្មីៗនេះទៀតរុស្ស៊ីខឹងច្រឡោតជាថ្មី ដោយសហរដ្ឋអាមេរិកប្រកាសថាខ្លួនមានផែនការកសាងកម្លាំងទ័ពនៅអឺរ៉ុបខាងកើតនិងរដ្ឋបាល់ទិកដើម្បីការពារសម្ព័ន្ធមិត្ត។ ផែនការបញ្ជូនអាវុធធុនធ្ងន់និងកងទ័ពប្រហែល៥ពាន់នាក់ របស់រដ្ឋបាលក្រុងវ៉ាស៊ីនតោន មិនទាន់ត្រូវគេសម្រេចយល់ព្រមនៅឡើយទេ ហើយគេក៏មិនរំពឹងថា សកម្មភាពនេះអាចកើតឡើងដែរ។ យ៉ាងណាមិញ បើសិនជាស្ថានការណ៍បែបនេះកើតមានឡើងមែន ការប្រឈមមុខដាក់គ្នាដោយយោធាអាចនឹងកើនឡើងខ្លាំង ។
១.ផែនការអាមេរិក បង្ខំឲ្យរុស្ស៊ីឆ្លើយតបដោយអាវុធ?
តាំងពីវិបត្តិអ៊ុយក្រែនផ្ទុះឡើង ដោយមានការលូកដៃពីសំណាក់រដ្ឋាភិបាលលោក វ្ល៉ាឌីមៀ ពូទីន រដ្ឋអឺរ៉ុបខាងកើតជាពិសេសក្រុមអតីតរដ្ឋសហភាពសូវៀតដេកមិនលក់បក់មិនល្ហើយដ្បិតខ្លាចរុស្ស៊ីឈ្លានពានខ្លួនបន្តទៀត។ តាំងពីពេលនោះមក បណ្តារដ្ឋបាល់ទិកបានបន្តទទូចស្នើសុំរដ្ឋាភិបាលលោក បារ៉ាក់ អូបាម៉ា ឲ្យផ្តល់ការការពារខ្លួនឲ្យផុតពីការគំរាមកំហែងខាងក្រៅ។ ដើម្បីបង្ហាញទៅកាន់រដ្ឋទាំងនោះថាខ្លួនមានឆន្ទៈពង្រឹងអំណាចយោធាអាមេរិកទប់ទល់រុស្ស៊ី ដើម្បីការពារសមាជិកណាតូទាំងនោះ អាមេរិកគ្រោងថានឹងពង្រាយទ័ពនិងអាវុធទៅទីនោះ។ ប៉ុន្តែត្រង់ថាអាមេរិកក្លាហានលកម្រិតណា ដើម្បីប្រឈមជាមួយរុស្ស៊ីនោះមិនទាន់មានអ្នកណាម្នាក់អាចស្មានបានឡើយ។ យ៉ាងណាមិញ គម្រោងការរបស់អាមេរិកកំពុងក្លាយជាក្តីបារម្ភរបស់ប្រទេសមួយចំនួននៅក្នុងតំបន់។ រដ្ឋាភិបាលក្រេមឡាំងបានព្រមានអឺរ៉ុបនិងក្រុងវ៉ាស៊ីនតោន កុំព្រួតគ្នារុញឲ្យខ្លួនទាល់ច្រក។ បើសិនរឿងនេះកើតមានឡើងមែន រុស្ស៊ីគ្មានជម្រើសអ្វីក្រៅពីលើកទ័ពដាក់តាមព្រំដែនវិញឡើយ។ បើតាមសម្តីមន្ត្រីយោធារុស្ស៊ី Yuri Yakubov ក្រុងម៉ូស្គូនឹងពង្រឹងកម្លាំងខ្លួនតាមបណ្តោយព្រំដែនភាគខាងលិចជាប់អឺរ៉ុប ហើយទ័ពប្រយុទ្ធ អាវុធធុនធ្ងន់ យន្តហោះចម្បាំងនិងមីស៊ីលនឹងត្រូវពង្រាយតាមបន្ទាត់ព្រំដែនដូចគ្នា។ រុស្ស៊ីមានសេរីភាពពេញលេញក្នុងការពង្រាយទ័ព តំឡើងប្រព័ន្ធមីស៊ីល ធ្វើលំហាត់យោធាក្នុងដែនអធិបតេយ្យរបស់ខ្លួន ដើម្បីធានាថាគ្មានការគំរាមកំហែងពីខាងក្រៅ។ ទីតាំងយុទ្ធសាស្ត្រដែលរុស្ស៊ីអាចនឹងតំឡើងកាំជ្រួចមីស៊ីល រួមមាន Kaliningradដែលជាប់លីទុយនី និងប៉ូឡូញ និងអាចបន្ថែមចំនួនទ័ពនៅមូលដ្ឋានទ័ពរបស់ខ្លូននៅបេឡារ៉ុសផងដែរ។ ការប្រឈមមុខដាក់គ្នានិងប្រណាំងប្រជែងសព្វាវុធនឹងកើតមានឡើងចៀសមិនផុតឡើយ បើសិនជាគម្រោងការក្រុងវ៉ាស៊ីនតោនសម្រេចជោគជ័យ។រុស្ស៊ីនៅតែជឿជាក់ថា សហរដ្ឋអាមេរិកនឹងមិនបន្តបង្ករឿងនិងធ្វើឲ្យការប្រឈមមុខដោយអាវុធកើតឡើងនៅអឺរ៉ុបឡើយ។
២.អ្នកនយោបាយអាមេរិកខ្វែងគំនិតគ្នារឿងបញ្ហាអ៊ុយក្រែន ជាឧបសគ្គក្នុងការសាងកម្លាំងអាមេរិកនៅអឺរ៉ុប
យ៉ាងណាក៏ដោយ គោលនយោបាយការបរទេសរដ្ឋាភិបាលអាមេរិក ប្រឆាំងរុស្ស៊ីនៅក្នុងបញ្ហាជម្លោះអ៊ុយក្រែននៅតែជារឿងប្រទាំងប្រទើសនិងចម្រូងចម្រាសនៅឡើយក្នុងបរិបទនយោបាយអាមេរិកខ្លួនឯង។ វាប្រាកដណាស់ ដែលមានអ្នកនយោបាយអាមេរិកចង់ឲ្យមានការប្រើប្រាស់វិធានក្តៅព្រមានរុស្ស៊ីឲ្យដកដៃចេញពីបញ្ហាអ៊ុយក្រែន ប៉ុន្តែមិនមែនមានន័យថារាល់អ្នកនយោបាយនោះឡើយ។ ក្នុងនយោយបាយអាមេរិកគេផ្តោតលើតែសមាជិកបក្សពីរប៉ុណ្ណោះ បន្តអ្នកនយោបាយទាំងពីរបក្សមើលឃើញរុស្ស៊ីក្នុងជម្លោះអ៊ុយក្រែនប្លែកៗគ្នា។ បក្សសាធារណរដ្ឋ ចង់ឲ្យរដ្ឋាភិបាលអាមេរិកបញ្ជូនអាវុធសម្លាប់មនុស្សទៅអ៊ុយក្រែន សាងកម្លាំងទ័ពនៅអឺរ៉ុប និងចាត់ទុករុស្ស៊ីជាគ្រោះថ្នាក់ខ្លាំង ខណៈសមាជិកបក្សប្រជាធិបតេយ្យភាគតិចដែលយល់ដូចបក្សសាធារណ។ ផ្នត់គំនិត និងការមើលឃើញបញ្ហាខុសគ្នានេះរបស់អ្នកនយោបាយ ជាឧបសគ្គមួយសម្រាប់រដ្ឋាភិបាលអាមេរិក ហើយការសម្រេចអនុញ្ញាតឲ្យមានការពង្រឹងអំណាចយោធានៅអឺរ៉ុបខាងកើត វាប្រហែលជាត្រូវការពេលវេលាយូរ ឬមិនអាចជោគជ័យផងក៏ថាបាន។
៣.សមាជិកណាតូគ្មានសាមគ្គីភាពគ្នាគាំទ្រការប្រឈមមុខដោយអាវុធជាមួយរុស្ស៊ី
ជុំវិញការប្រណាំងប្រជែងសព្វាវុធ និងការត្រៀមខ្លួនដាក់គំនៀបលើរុស្ស៊ីដោយប្រើប្រាស់យោធាដែលជាគំនិតផ្តួចផ្តើមរបស់អាមេរិក អាចរុញច្រានឲ្យភាគីធ្លាក់ក្នុងសង្គ្រាម ពោលគឺ ណាតូ អាចប៉ះទង្គិចជាមួយរុស្ស៊ីជាយថាហេតុ។ ប៉ុន្តែជាធម្មតារឿងធ្វើសង្គ្រាម សហរដ្ឋអាមេរិកតែងពឹងពាក់លើការចូលរួមរបស់កម្លាំងទ័ពសមាជិកណាតូ។ អាមេរិកមិនដែលចេញមុខទូលភ្នំតែម្នាក់ឯងឡើយដើម្បីធ្វើសង្គ្រាមនៅក្រៅប្រទេសដូច្នេះ។ បច្ចុប្បន្នសមាជិកទាំង ២៨ នៅតែខ្វែងគំនិតគ្នាជុំវិញការប្រឆាំងរុស្ស៊ីដោយប្រើកម្លាំងយោធា ហើយភាគច្រើននៃសមាជិក រួមទាំងមេដឹកនាំណាតូផងនោះមានឆន្ទៈតិចតួចប៉ុណ្ណោះក្នុងការគាំទ្រចំណាត់ការក្រុងវ៉ាស៊ីនតោន។ ដែលនេះមានន័យថា ណាតូនៅទន់ខ្សោយ និងមិនសាមគ្គីគ្នាដើម្បីធ្វើសង្គ្រាមជាមួយរុស្ស៊ីនិងដើរតាមជំហរអាមេរិកឡើយ។ តាមពិតទៅរដ្ឋាភិបាលលោកពូទីនមើលឃើញពីចំណុចខ្សោយបក្សសម្ព័ន្ធយោធានេះជាពិសេសការមានផលប្រយោជន៍ផ្សេងគ្នារបស់សមាជិក។ អ្វីដែលសំខាន់សមាជិកភាគច្រើនរបស់ណាតូសុទ្ធតែពឹងផ្អែកលើពាណិជ្ជកម្មជាមួយរុស្ស៊ី។ សូម្បីអាល្លឺម៉ង់ អ៊ីតាលី បារាំងប៉ូឡូញ តួកគី ដែលជាសមាជិកសំខាន់របស់បក្សសម្ព័ន្ធយោធានេះក៏មិនដែលហ៊ានធ្វើអ្វីឲ្យប៉ះពាល់ដល់ទំនាក់ទំនងជាមួយរុស្ស៊ីដែរ ទោះពួកគេរងសម្ពាធក្រុងវ៉ាស៊ីនតោនក៏ដោយ។ កាលពីថ្មីៗកន្លងទៅនេះ ប្រធានាធិបតី រុស្ស៊ី ព្យាយាមរកឱកាសពង្រឹងចំណងសេដ្ឋកិច្ចជាមួយរដ្ឋាភិបាលតួកគី ដោយពិភាក្សាគម្រោងសង់បំពង់បង្ហូរប្រេងពីរុស្ស៊ីទៅប្រទេសតួកគី។ ត្រូវចាំថា តួកគីជារដ្ឋសមាជិកដែលមានទ័ពក្នុងណាតូលំដាប់ទី២បើសិនរុស្ស៊ី និងតួកគី ល្អូកល្អើនជាមួយគ្នា គេមិនសង្ឃឹមថាណាតូចិត្តសឿងហ៊ានប្រឈមមុខជាមួយរុស្ស៊ីដោយប្រើអាវុធឡើយ៕
© រក្សាសិទ្ធិដោយ thmeythmey.com