ជាតិ
សង្គមជាតិ
ព្រៃឡង់ប្រែក្លាយជាទីវាលយ៉ាងអនាធិបតេយ្យដោយសារក្រុមហ៊ុនសម្បទាន
× សហគមន៍ អង្គការជាតិនិងអន្តរជាតិចំនួន៤៩កំពុងបារម្ភពីវាសនាព្រៃឈើ សត្វព្រៃ និងប្រជាសហគមន៍រាប់ម៉ឺនគ្រួសារដែលកំពុងរស់នៅពឹងផ្អែកលើការរកអនុវផលព្រៃឈើនៅក្នុងតំបន់ព្រៃឡង់។ នៅក្នុងសេចក្តីថ្លែងការណ៍រួមរបស់ខ្លួន បណ្តាញស្ថាប័នក្រៅរដ្ឋាភិបាល លើកឡើងថាធនធានទាំងនេះនឹងបាត់បង់ក្នុងរយៈពេលដ៏ខ្លីខាងមុខ ដោយសារក្រុមហ៊ុនសម្បទានជាច្រើនកំពុងកាប់រានក្លាយជាទីវាលយ៉ាងអនាធិបតេយ្យ។បណ្តាញសហគមន៍ អង្គការទាំងនោះ ស្នើដល់រដ្ឋាភិបាល ក្រសួងកសិកម្ម តុលាការ និងស្ថាប័នជាប់ពាក់ព័ន្ធទាំងអស់ចាត់វិធានការទប់ស្កាត់បទល្មើសព្រៃឈើនិងបញ្ឈប់ការគំរាមកំហែងដល់សកម្មជនព្រៃឡង់ជាដើម។
របាយការណ៍ស្រាវជ្រាវថ្នាក់ឃុំ បែបបរិមាណរបស់បណ្តាញសហគមន៍ព្រៃឡង់ ដែលសរសេរនៅក្នុងសេចក្តីថ្លែងការណ៍រួមស្តីពី«ដំណើរឆ្ពោះទៅរកវិនាសកម្មព្រៃឡង់»នេះធ្វើឡើងកាលពីខែឧសភាកន្លងមក បានបង្ហាញថា៖ នៅក្នុងឃុំចំនួន៣៣ ក្នុងតំបន់ព្រៃឡង់ និងឃុំផ្សេងទៀតដែលជាប់ព្រំប្រទល់ឃុំទាំង៣៣នេះ មានក្រុមហ៊ុនសម្បទានសរុបចំនួន៥៣ក្រុមហ៊ុន ដែលបានប្រតិបត្តិការ និងកំពុងប្រតិបត្តិការ នេះបើគិតត្រឹមចុងឆ្នាំ២០១។ ទំហំដីសម្បទានទាំងអស់គឺមាន សម្បទានដីសេដ្ឋកិច្ចមានចំនួនជាង ២៣ម៉ឺនហិកតា (២៣៤,៧៨៤.០៨ ហិកតា)។ សម្បទានរ៉ែមានចំនួន ២៦ម៉ឺនហិកតា (២៦៤,៦៩៣.២៣ ហិកតា)។ សម្បទានព្រៃឈើមានចំនួន ៨៨៤.២ ហិកតា និងសម្បទានដីសង្គមកិច្ចមានចំនួន ៤ពាន់ហិកតា។
ក្នុងរយៈពេល១០ឆ្នាំចុងក្រោយនេះ ការកាប់បំផ្លាញព្រៃឈើនៅក្នុងតំបន់ព្រៃឡង់ គឺធ្វើឡើងក្រោមរូបភាពនៃការផ្តល់ដីសម្បទានដល់ក្រុមហ៊ុនទាំងនោះ។បណ្តាញយុវជន សហគមន៍ព្រៃឈើ សហគមន៍ជនជាតិដើមភាគតិច អង្គការជាតិនិងអន្តរជាតិចំនួន៤៩ កំពុងព្រួយបារម្ភយ៉ាងខ្លាំងលើការបាត់បង់ព្រៃឈើ ដីព្រៃឈើ ជីវចម្រុះ ធនធានជលផលជាច្រើនទៀត ដែលត្រូវបានកាប់បំផ្លា និងឈូសឆាយដោយក្រុមហ៊ុនដីសម្បទាននៅក្នុងតំបន់ព្រៃឡង់។
ការផ្តល់ដីសម្បទានរាប់ម៉ឺនហិកតានៅក្នុងតំបន់ព្រៃឡង់នេះ ត្រូវបានក្រុមហ៊ុនកាប់បំផ្លាញឡើងរង្គាល និងដាំជំនួសឡើងវិញ ដោយដើមកៅស៊ូ ដំឡូងមី និងការធ្វើអាជីវកម្មរ៉ែដែកជាដើម។
ចំណែកឯ សកម្មជនការពារព្រៃឡង់ដែលខិតខំការពារ ទប់ស្កាត់បទល្មើសព្រៃឈើ និងការរុករានខុសច្បាប់របស់ក្រុមហ៊ុនទាំងនេះ តែបែរជាត្រូវរងនូវការគំរាមសម្លាប់ និងការគំរាមកំហែងនានាពីជនប្រព្រឹត្តបទល្មើស មន្ត្រីជំនាញ និងអាជ្ញាធរដែនដីមួយចំនួនទៅវិញ។
បញ្ហាចម្បងៗទាំងនេះត្រូវបានប្រជាសហគមន៍ព្រៃឡង់ បណ្តាញយុវជន អង្គការជាតិនិងអង្គការជាតិចំនួន៤៩ ចេញសេចក្តីថ្លែងការណ៍រួមស្នើទៅកាន់រដ្ឋាភិបាល ក្រសួងកសិកម្ម តុលាការ និងស្ថាប័នមានសមត្ថកិច្ចដែលពាក់ព័ន្ធទាំងអស់ ត្រូវចត់វិធានការទប់ស្កាត់បទល្មើសព្រៃឈើនៅក្នុងតំនប់ព្រៃឡង់ជាបន្ទាន់។ ត្រូវដាក់បញ្ចូលបណ្តាញសហគមន៍ព្រៃឡង់ទាំងបួនខេត្ត ជាតំបន់សហគ្រប់គ្រងព្រៃឡង់។ ចាត់វិធានការតាមផ្លូវច្បាប់ដល់មន្ត្រី និងអាជ្ញាធរដែលពាក់ព័ន្ធនឹងការធ្វើអាជីវកម្មឈើខុសច្បាប់នៅក្នុងតំបន់ព្រៃឡង់។ ត្រូវបញ្ឈប់គ្រប់រូបភាពគម្រាមកំហែង ពីប្រព័ន្ធតុលាការ និងកងកម្លាំងមានសមត្ថកិច្ចចំពោះសកម្មជនព្រៃឡង់។ ល៕
© រក្សាសិទ្ធិដោយ thmeythmey.com