ជាតិ
សង្គមជាតិ
គណបក្សសង្គ្រោះជាតិ៖«ទូរទស្សន៍ព្រះអាទិត្យ ជាញើសឈាមរបស់ពលរដ្ឋខ្មែរ»
× គណបក្សសង្គ្រោះជាតិ បានចាប់ផ្តើមប្រមូលវិភាគទានជាផ្លូវការ ដើម្បីបង្កើតបុស្តិ៍ទូរទស្សន៍ថ្មី គឺទូរទស្សន៍ព្រះអាទិត្យ។ យុទ្ធនាការប្រមូលថវិកា នេះ បានធ្វើឡើងនៅឯទីស្នាក់ការកណ្តាលគណបក្សសង្គ្រោះជាតិ ហើយនឹងត្រូវបន្តធ្វើរហូតទទួលបានថវិកាគ្រប់៣លានដុល្លារសម្រាប់ដំណើរការប៉ុស្តិ៍ទូរទស្សន៍ថ្មីនេះបាន។ ថ្នាក់ដឹកនាំគណបក្សសង្គ្រោះជាតិ សុទ្ធតែអះអាងថា ទូរទស្សន៍ព្រះអាទិត្យ គឺជាញើសឈាមរបស់ប្រជារាស្ត្រខ្មែរ ដែលត្រូវបង្កើតឡើងដើម្បីបម្រើផលប្រយោជន៍ប្រជាពលរដ្ឋ និងជាតិពិតប្រាកដ។
នៅថ្ងៃទី២៧ខែមិថុនានេះ គណបក្សសង្គ្រោះជាតិ បានចាប់ផ្តើមប្រមូលវិភាគទាន នៅទីស្នាក់ការគណបក្សសង្គ្រោះជាតិ ដើម្បីបង្កើតទូរទស្សន៍ព្រះអាទិត្យ។ យុទ្ធនាការប្រមូលថវិកា នេះនឹងបន្តធ្វើរហូតទទួលបានថវិកាគ្រប់៣លានដុល្លារសម្រាប់ដំណើរការប៉ុស្តិ៍ទូរទស្សន៍ថ្មី ដែលគ្រោងនឹងដំណើរការមុនដំណាច់ឆ្នាំ២០១៥នេះ ។
ថ្នាក់ដឹកនាំគណបក្សសង្គ្រោះជាតិសុទ្ធតែអះអាងថា ទូរទស្សន៍ព្រះអាទិត្យ នឹងផ្តល់ព័ត៌មានដែលមានវិជ្ជាជីវៈ បង្ហាញពីតថភាពពិតរបស់សង្គម ផ្តល់ការអប់រំដល់ប្រជាពលរដ្ឋ និងបង្កើតឡើងដើម្បីបម្រើផលប្រយោជន៍ប្រជាពលរដ្ឋ មិនមែនបង្កើតឡើងដើម្បីបម្រើប្រយោជន៍គណបក្សនោះទេ។
នៅក្នុងកម្មវិធីទទួលវិភាគទាននោះ លោក សម រង្ស៊ី ប្រធានគណបក្សសង្គ្រោះជាតិបានថ្លែង ថា៖«ទូរទស្សន៍ព្រះអាទិត្យ គឺជាទូរទស្សន៍ដែលនិយាយការពិត ឥតលម្លៀង»។ ត្រង់ចំណុចនេះ លោក សម រង្ស៊ី ចង់សំដៅទៅលើព័ត៌មានដែលកន្លងមកទូរទស្សន៍របស់បក្សកាន់អំណាចមិនបានផ្សាយឲ្យប្រជាពលរដ្ឋបានដឹង ដែលមានដូចជា ស្ថានការណ៍ព្រំដែន បញ្ហាអន្តោប្រវេសន៍ ការកាប់បំផ្លាញព្រៃឈើ ការរឹបអូសយកដីធ្លីប្រជាពលរដ្ឋ និងអំពើពុករលួយជាដើម។
លោក សម រង្ស៊ី ក៏បានបញ្ជាក់ជាថ្មីដែរថា ចំនួនទឹកប្រាក់ដែលជាវិភាគទានរបស់ប្រជាពលរដ្ឋម្នាក់ៗមិនសំខាន់នោះទេ អ្វីដែលសំខាន់ គឺទឹកចិត្តរបស់អ្នកដែលផ្តល់វិភាគទាននេះ។ ប្រធានគណបក្សសង្គ្រោះជាតិរូបនេះ បន្តថា៖«នេះជាប្រវត្តិសាស្ត្រដែលគណបក្សប្រឆាំងនៅកម្ពុជា មានទូរទស្សន៍របស់ខ្លួន ជាទូរទស្សន៍ដែលជាកម្មសិទ្ធិរបស់ប្រជាពលរដ្ឋខ្មែរ ជាញើសឈាមរបស់ប្រជារាស្ត្រខ្មែរ»។
សូមបញ្ជាក់ថា គណបក្សសង្គ្រោះជាតិបានចាប់ផ្តើមប្រមូលវិភាគទានដើម្បីបង្កើតទូរទស្សន៍ព្រះអាទិត្យនៅថ្ងៃទី២៥ខែមិថុនា។ គិតត្រឹមថ្ងៃត្រង់ថ្ងៃទី២៧ខែមិថុនានេះ គណបក្សសង្គ្រោះជាតិប្រមូលបានវិភាគទាន និងទឹកប្រាក់វិនិយោគបានប្រមាណ២០ម៉ឺនដុល្លារហើយ ក្នុងនោះទឹកប្រាក់ប្រមាណ១០ម៉ឺនដុល្លារជាទឹកប្រាក់វិនិយោគ និង១០ម៉ឺនដុល្លារទៀត ជាវិភាគទាន និងអំណោយរបស់សប្បុរសជន និងអ្នកគាំទ្រគណបក្សសង្គ្រោះជាតិ។
បើតាមលោក យឹម សុវណ្ណ អ្នកនាំពាក្យគណបក្សសង្គ្រោះជាតិ គណបក្សសង្គ្រោះជាតិ នឹងខិតខំប្រមូលវិភាគទានឲ្យបានគ្រប់៣លានដុល្លារ ដើម្បីសម្រេចគោលដៅដែលបានកំណត់ថាបុស្តិ៍ទូរទស្សន៍ថ្មីនេះ នឹងដំណើរការនៅចុងឆ្នាំ២០១៥ ។ លោកថា គណបក្សសង្គ្រោះជាតិ ក៏កំពុងពិចារណាអំពីការប្រមូលវិភាគទានពីសប្បុរជន និងអ្នកគាំទ្រនៅតាមបណ្តាខេត្តផងដែរ និងធ្វើយ៉ាងណាធានាថាវិភាគទានរបស់ពួកគាត់ បានចូលរួមចំណែកក្នុងការបង្កើតប៉ុស្តិ៍ទូរទស្សន៍ថ្មីនេះ៕
© រក្សាសិទ្ធិដោយ thmeythmey.com