ជាតិ
សង្គមជាតិ
ក្រសួងធនធានទឹកប្រាប់ឲ្យពលរដ្ឋប្រុងប្រយ័ត្នជាមួយភ្លៀងធ្លាក់ខ្លាំង និងខ្យល់បក់ខ្លាំង
× ភ្លៀង ផ្គរ រន្ទះ នឹងកើតមានឡើងបណ្តាខេត្តនៅតំបន់មាត់សមុទ្រ និងបណ្តាខេត្តក្រុងចំនួន៩ ដែលស្ថិតនៅក្នុងតំបន់ខ្ពង់រាប រួមមានគឺខេត្តកំពង់ឆ្នាំង កំពង់ចាម ត្បូងឃ្មុំ កំពង់ធំ តាកែវ ព្រៃវែង ស្វាយរៀង ខេត្តកណ្តាល និងក្រុងភ្នំពេញ។ ក្រសួងធនធានទឹក និងឧតុនិយម ក៏បានអំពាវឲ្យប្រជាពលរដ្ឋប្រុងប្រយ័ត្នជាមួយ ភ្លៀងធ្លាក់ខ្លាំង និងខ្យល់បក់ខ្លាំង។
នាយកដ្ឋានឧតុនិយមនៃក្រសួងធនធានទឹក និងឧតុនិយម បានសរសេរនៅត្រង់ចំណុចប្រកាសអាសន្ននៅក្នុងគេហទំព័រខ្លួនថា៖«ភ្លៀង ផ្គរ រន្ទះកើតមានឡើងបណ្តាខេត្តមួយចំនួននៅតំបន់ខ្ពង់រាប និងតំបន់មាត់សមុទ្រ។ ខ្យល់បក់ខ្លាំងនៅលើឆ្នេរសមុទ្រ នឹងនៅលើផ្ទៃសមុទ្រ រលកសមុទ្រអាចមានកំពស់ចាប់ពី១ទៅ២ម៉ែត្រ »។ នាយកដ្ឋានឧតុនិយម បានបង្ហាញពីស្ថានភាពអាកាសធាតុដែលអាចនឹងកើតឡើងនៅតំបន់ទាំងពីរនេះ ត្រូវបានបង្ហាញក្នុងរយៈពេល៣ថ្ងៃជាប់គ្នាគឺពីថ្ងៃទី២កក្កដា ដល់ថ្ងៃទី៤ខែកក្កដា ។
លោក អ៊ុំ រីណា ប្រធាននាយកដ្ឋានឧតុនិយមបានថ្លែងប្រាប់សារព័ត៌មានថ្មីៗនៅថ្ងៃនេះថា ស្ថានភាពអាកាសធាតុដែលមានភ្លៀង ផ្គរ រន្ទះនេះ មិនមែនកើតឡើងតែក្នុងរយៈពេល៣ថ្ងៃនេះទេ វាអាចបន្តកើតមានទៀត ឬក៏ប្រែប្រួល។ លោក ពន្យល់ថា៖«យើងធ្វើការព្យាករណ៍ពីស្ថានភាពអាកាសធាតុរយៈពេល៣ថ្ងៃមុន ដូច្នេះលទ្ធផលនៃការព្យាករណ៍ក៏បង្ហាញ៣ថ្ងៃដែរ។ នៅថ្ងៃស្អែកយើងព្យាករណ៍ទុកមុន៣ទៀត ដូច្នេះស្ថានភាពអាកាសធាតុ មិនមែនមានន័យថា ភ្លៀង ផ្គរ រន្ទះ អាចកើតមានតែក្នុងរយៈពេល៣ថ្ងៃ ដូចដែលយើងជូនដំណឹងនៅថ្ងៃនេះទេ វានឹងប្រែប្រួលទៀត ដូច្នេះទាមទារឲ្យមានការតាមដានរាល់ថ្ងៃ»។
យ៉ាងណាក៏ដោយប្រធាននាយកដ្ឋានឧតុនិយមរូបនេះ បានគូសបញ្ជាក់ថា បាតុភូតភ្លៀង ផ្គរ រន្ទះនេះមិនកើតមានច្រើនដូចនៅដើមរដូវវស្សាពីខែមេសា ដល់ខែមិថុនានោះទេ។ លោក ថា ចាប់ពីខែកក្កដា រហូតដល់ខែសីហា ស្ថានភាពទាំងនេះនឹងបន្តថយជាលំដាប់ និងកាន់តែតិចទៅៗ នៅចុងរដូវគឺវស្សាគឺនៅចន្លោះខែតុលា រហូតដល់សប្តាហ៍ទី៣នៃខែវិច្ឆិកា។
ជាមួយគ្នានោះដែរក្រសួងធនធានទឹក និងឧតុនិយម ក៏អំពាវនាវឲ្យប្រជាពលរដ្ឋប្រុងប្រយ័ត្នជាមួយងធ្លាក់ខ្លាំង និងខ្យល់បក់ខ្លាំងផងដែរ៕
© រក្សាសិទ្ធិដោយ thmeythmey.com