អន្តរជាតិ
នយោបាយអន្តរជាតិ
UN សម្រេចជាឯកច្ឆ័ន្ទដាក់គោលដៅអភិវឌ្ឍន៍ប្រកបដោយនិរន្តភាពក្នុងរបៀបវារៈ ![](https://image.thmeythmey.com/pictures/2015/08/03/un-ageed-to-replace-mdgs.jpg)
×![]()
ឆ្នាំ២០១៥ ត្រូវបានស្គាល់ថាជាពេលកំណត់ចុងក្រោយនៃការអនុវត្តគោលដៅសហសវត្សន៍ របស់អង្គការសហប្រជាជាតិ។ បញ្ហាជាច្រើនត្រូវបានបន្សល់ទុកជាពិសេស ភាពក្រីក្រ ដែល ពិភពលោក ត្រូវចាត់វិធានការដើម្បីកាត់បន្ថយ និង លុបបំបាត់។ ឆ្លើយតបនឹងបញ្ហានេះ សមាជិកអង្គការសហប្រជាជាតិ បានសម្រេចជាឯកច្ឆ័ន្ទ ដោយដាក់បញ្ចូលគោលដៅអភិវឌ្ឍន៍ ប្រកបដោយនិរន្តភាព ដែលជាគោលដៅថ្មីជំនួសគោលដៅអភិវឌ្ឍន៍សហសវត្សន៍ក្នុងរបៀបវារៈ ដើម្បីអនុម័តចុងក្រោយក្នុងកិច្ចប្រជុំប្រចាំឆ្នាំខាងមុខនេះ។
ម្សិលមិញនេះ សមាជិកអង្គការសហប្រជាជាតិទាំង១៩៣រដ្ឋ បានសម្រេចជាឯកច្ឆ័នក្នុងការ ដាក់បញ្ចូលគោលដៅអភិវឌ្ឍន៍ប្រកបដោយនិរន្តភាព នៅក្នុងរបៀបវារៈថ្មីដើម្បីអនុម័តចុង ក្រោយ សម្រាប់អនុវត្តរយៈពេល១៥ឆ្នាំ(២០១៥-២០៣០) ។
គោលដៅអភិវឌ្ឍន៍ប្រកបដោយនិរន្តភាព គឺជាប្រធានបទមួយ ដ៏ចម្រោងចម្រាស់ដែល សមាជិកអង្គការសហប្រជាជាតិទាំង១៩៣រដ្ឋ បានឈ្លោះ និង ជជែកគ្នាដើម្បីដាក់ជារបៀប វារៈដើម្បីអនុវត្តន៍ចាប់ពី២០១៥តទៅនេះ។ គោលដៅនេះ មានភាពស្មុគស្មាញច្រើន ជាងគោល ដៅចាស់ ដែលបានអនុវត្តន៍កន្លងមក ដោយសារមានទិសដៅច្រើន ហើយទិសដៅមួយចំនួន ប៉ះពាល់នឹងអធិបតេយ្យភាពរបស់រដ្ឋ។ ដូច្នេះ ត្រូវចំណាយពេលក្នុងការពិគ្រោះយោបល់ ពីមេដឹកនាំរដ្ឋនីមួយៗជាមុន។
យ៉ាងណាក៏ដោយ ក្រោយពីបញ្ចប់កិច្ចប្រជុំជាច្រើនលើក ចុងក្រោយប្រធានបទដ៏ចម្រោង ចម្រាស់ ត្រូវទទួលបានការព្រមព្រៀងជាឯកច្ឆ័ន ពីរាល់សមាជិករបស់អង្គការសហប្រជា ជាតិ។ ក្នុងនោះ អគ្គលេខាធិការអង្គការសហប្រជាជាតិ លោក បាន គីមូន បានលើកឡើងថា «ការព្រមព្រៀងជាឯកច្ឆ័នគឺជាប្រវត្តិសាស្ត្រហើយសម្រាប់ការទទួលយករបៀបវារៈនេះ។ ក៏ ប៉ុន្តែ នឹងមានបញ្ហាជាច្រើនដែលនឹងត្រូវដោះស្រាយនៅពេលក្រោយ»។
ដោយឡែក សម្រាប់ការចំណាយនៅក្នុងការអនុវត្តន៍គោលដៅថ្មីនេះ មិនទាន់ត្រូវបាន គេកំណត់នៅឡើយនោះទេ។ ក៏ប៉ុន្តែអ្នកវិភាគសេដ្ឋកិច្ច បានប៉ាន់ស្មានថា ក្នុងមួយឆ្នាំនឹងត្រូវ ចំណាយពីចន្លោះប្រមាណ ៣.៣ ទៅ ៤.៥ ពាន់ពាន់លាន ដុល្លាសហរដ្ឋអាមេរិកសម្រាប់ ការអនុវត្តគោលដៅនេះ។
គួរបញ្ជាក់ផងដែរ គោលដៅអភិវឌ្ឍន៍ប្រកបដោយនិរន្តភាព នឹងត្រូវផ្តោតលើបញ្ហាប្រឈម សំខាន់ដូចជា លុបបំបាត់ភាពក្រីក្រ និង ភាពអត់ឃា្លន សមភាពយែនឌ័រ ប្រឆាំងជាមួយការ ផ្លាស់ប្តូរអាកាសធាតុ និង បញ្ហាប្រឈមជាច្រើនផ្សេងទៀត៕
© រក្សាសិទ្ធិដោយ thmeythmey.com