អន្តរជាតិ
បុរសជនជាតិម៉ារ៉ុកម្នាក់បានស្លាប់ដោយថប់ដង្ហើមក្នុងវ៉ាលីមួយ បន្ទាប់ពីប៉ុនប៉ងឆ្លងដែនចូលអេស្ប៉ាញ
×![]()
ដោយ: ធីតា
បុរសជនជាតិម៉ារ៉ុកអាយុ ២៧ ឆ្នាំម្នាក់បានស្លាប់ដោយថប់ដង្ហើម ដោយសារតែលាក់ខ្លួនក្នុងវ៉ាលីដែលដាក់ក្នុងឃ្លុបរថយន្តនៅលើស្រឡាងឆ្ពោះទៅកាន់ប្រទេសអេស្ប៉ាញ នេះបើតាមការប្រកាសរបស់មន្ត្រីប៉ូលិសអេស្ប៉ាញកាលពីថ្ងៃចន្ទកន្លងទៅនេះ។
បងប្រុសរបស់បុរសនេះមានអាយុ ៣៤ ឆ្នាំបានឆ្លងដែនដោយត្រឹមត្រូវតាមច្បាប់ ជាមួយនឹងរថយន្តមួយគ្រឿងនៅលើស្រឡាងដែលធ្វើដំណើរពីក្រុង Melilla មកកាន់ Almeria ស្ថិតនៅភាគខាងត្បូងអេស្ប៉ាញ។ បងប្រុសនេះចង់បញ្ជូនប្អូនដោយខុសច្បាប់មកកាន់ប្រទេសនេះ ដោយលាក់ប្អូនរបស់ខ្លួននៅក្នុងវ៉ាលីក្នុងឃ្លុបរថយន្ត។ ពេលមកដល់គោលដៅ ដោយសង្កេតឃើញថា ប្អូនប្រុសលែងមានដង្ហើម បងប្រុសក៏បានប្រាប់ដល់ក្រុមការងារនៅលើស្រឡាង និងក្រុមជួយសង្គ្រោះនៅកំពង់ផែ តែនៅតែមិនអាចជួយឲ្យប្អូនប្រុសបានដដែល។ បងប្រុសរូបនេះត្រូវបានចាប់ខ្លួន និងចោទប្រកាន់ពីបទមនុស្សឃាតដោយអចេតនា។
គួររម្លឹកថា កាលពីមីនាកន្លងទៅនេះ ប៉ូលិសក៏បានរកឃើញក្មេងប្រុសដើមកំណើត Ivory Coast អាយុ ៨ ឆ្នាំនៅក្នុងវ៉ាលីរបស់អ្នកដំណើរមួយផងដែរ។ រូបភាពស្កែននៃក្មេងប្រុសនេះនៅក្នុងវ៉ាលីដែលព្យាយាមឆ្លងដែនមកកាន់អេស្ប៉ាញ ដោយសារតែក្តីនឹករលឹកឪពុកម្តាយ ធ្វើឲ្យរំជើបរំជួលពេញផ្ទៃប្រទេស។ នៅទីបំផុត ក្មេងប្រុសនេះក៏ទទួលបានការអនុញ្ញាតឲ្យស្នាក់នៅក្នុងប្រទេសនេះជាបណ្តោះអាសន្ន ដើម្បីជួបជុំឪពុកម្តាយ។
ជារៀងរាល់ឆ្នាំ មានជនអន្តោប្រវេសន៍រាប់ពាន់នាក់ដែលប្រថុយជីវិតមកកាន់ទីក្រុង Ceuta និង Melilla ដែលជាព្រំដែនគោករវាងទ្វីបអាហ្វ្រិក និងសហភាពអឺរ៉ុប។ អ្នកខ្លះព្យាយាមផ្លោះរំលងរបងកម្ពស់ ៧ ម៉ែត្រដែលខណ្ឌចែករវាងម៉ារ៉ុក និងអេស្ប៉ាញ។ ចំណែកអ្នកខ្លះទៀតព្យាយាមមកកាន់ទឹកដីអឺរ៉ុបនេះតាមផ្លូវទឹក៕
Tag:
ម៉ារ៉ុក
អេស្ប៉ាញ
© រក្សាសិទ្ធិដោយ thmeythmey.com
