អន្តរជាតិ
នយោបាយអន្តរជាតិ
ចិនត្រៀមជួយមីយ៉ាន់ម៉ាសង់ហេដ្ឋារចនាសម្ព័ន្ធខូចខាតព្រោះទឹកជំន់ឡើងវិញ ![](https://image.thmeythmey.com/pictures/2015/08/05/china-myanmarq.jpg)
×![]()
ក្រុមសង្គ្រោះចិនបានមកដល់ប្រទេសមីយ៉ាន់ម៉ាហើយ ដើម្បីបើកប្រតិបត្តិការជួយសង្គ្រោះប្រជាជនដែលរងគ្រោះដោយសារគ្រោះមហន្តរាយទឹកជំនន់។ ក្រុមសង្គ្រោះត្រូវបានគេបែងចែកជាច្រើនក្រុមនិងត្រូវចេញជួយសង្គ្រោះប្រជាជននៅតំបន់ដែលរងគ្រោះធ្ងន់ធ្ងរដោយសារទឹកជំនន់នេះ។ ក្រៅពីបញ្ជូនក្រុមសង្គ្រោះទៅជួយប្រជាជនមីយ៉ាន់ម៉ា រដ្ឋាភិបាលក្រុងប៉េកាំងក៏ត្រៀមផ្តល់ជំនួយដល់មីយ៉ាន់ម៉ាដើម្បីសាងសង់សាលារៀន និងហេដ្ឋារចនាសម្ព័ន្ធដែលខូចខាតឡើងវិញនៅតំបន់ដែលរងគ្រោះខ្លាំងផងដែរ។
លោក មុំ ពិទូរ្យ លម្អិតព័ត៌មាននេះ
ម្សិលមិញនេះ ក្រុមសង្គ្រោះចិនបានទៅដល់ប្រទេសមីយ៉ាន់ម៉ាហើយ ដើម្បីជួយសង្គ្រោះប្រជាជនដែលរងគ្រោះដោយសារទឹកជំនន់។ ក្រុមសង្គ្រោះរបស់ចិនជាក្រុមសង្គ្រោះអន្តរជាតិដំបូងបំផុតដែលបានសហការជាមួយអាជ្ញាធរមីយ៉ាន់ម៉ាដើម្បីជួយប្រជាជនដែលកំពុងប្រឈមគ្រោះថ្នាក់ព្រោះតែមហន្តរាយគ្រោះទឹកជំនន់។ បើតាមមន្ត្រីមូលដ្ឋានអ្នកស្លាប់ព្រោះតែគ្រោះមហន្តរាយទឹកជំនន់នេះ មានសរុបជាង៤០នាក់ហើយ ហើយប្រជាជនរាប់ម៉ឺននាក់ផ្សេងទៀតត្រូវគេជម្លៀសទៅកាន់កន្លែងមានសុវត្ថិភាពរួចរាល់ហើយដែរ។
ការបញ្ជូនក្រុមសង្គ្រោះមកភ្លាមៗរបស់ចិនដើម្បីជួយប្រជាជនមីយ៉ាន់ម៉ានេះ ត្រូវបានគេកោតសរសើរច្រើន ហើយចិនបានបញ្ជាក់ថា ការជួយប្រជាជនមីយ៉ាន់ម៉ាក្នុងគ្រាមានអាសន្ននេះជាសកម្មភាពមនុស្សធម៌ធ្វើឡើងក្នុងនាមជាអ្នកជិតខាងល្អប៉ុណ្ណោះ។
ក្រុមសង្គ្រោះត្រូវបានគេបែងចែកជាច្រើនក្រុមដើម្បីប្រតិបត្តិការជួយសង្គ្រោះប្រជាជននៅតំបន់មួយចំនួនដែលប្រឈមទឹកលិចធ្ងន់ធ្ងរជាងគេក្នុងនោះមាន Sagaing Magway និងរដ្ឋរ៉ាក់ឃិន (Rakhine)។ គ្រាន់តែទៅដល់មីយ៉ាន់ម៉ាភ្លាម ក្រុមសង្គ្រោះទីមួយប្រញាប់ប្រញាប់ចាកចេញទៅកាន់រដ្ឋរ៉ាក់ឃិនភ្លាម ដើម្បីសង្គ្រោះប្រជាជន និងចែកចាយសម្ភារៈប្រើប្រាស់ចាំបាច់ដល់ប្រជាជននៅទីនោះ។ ចំណែក ដោយឡែកក្រុមទី២ និងក្រុមទីបី ឈរជើងចាំចុះអន្តរាគមន៍ ករណីចាំបាច់ ឬប្រសិនបើក្រុមសង្គ្រោះទីមួយត្រូវការជំនួយដោយស្ថានការណ៍កាន់តែអាក្រក់ឡើង។
ចំណែកក្រុមសង្គ្រោះផ្សេងទៀតដឹកនាំដោយឯកអគ្គរដ្ឋទូតចិនប្រចាំនៅមីយ៉ាន់ម៉ាផ្ទាល់គឺលោក Hong Liang។ លោក Hong Liang បានឲ្យដឹងថា ក្រុមរបស់លោកបានចាត់ចែងធ្វើសកម្មភាពចែកចាយជំនួយដល់ប្រជាជនពីរលើកកាលពីម្សិលមិញ។ ជំនួយលើកទីមួយត្រូវបានផ្តល់ឲ្យប្រជាជនមីយ៉ាន់ម៉ា ១៥៤៥ គ្រួសារ នៅភាគខាងលិចខេត្តរ៉ាក់ឃិននិងលើកទីពីរផ្តល់ជូនប្រជាជនប្រហែល២ម៉ឺនគ្រួសារនៅតំបន់ Sagaing ។ ឯកអគ្គរដ្ឋទូតចិនខាងលើក៏បានបញ្ជាក់ច្បាស់ផងដែរថា រដ្ឋាភិបាលក្រុងប៉េកាំងក៏នឹងផ្តល់ជំនួយសម្រាប់សាងសង់ហេដ្ឋារចនាសម្ព័ន្ធ សាលារៀន និងសំណង់នានាដែលរងការបំផ្លិចបំផ្លាញដោយសារគ្រោះទឹកជំនន់ឡើងវិញដែរ ក្រៅពីជួយសង្គ្រោះ និងផ្តល់ជំនួយដល់ប្រជាជនដែលរងគ្រោះ។
ចំណែកប្រជាកសិករមីយ៉ាន់ម៉ាដែលខូចខាតផលដំណាំនិងស្រូវដោយសារទឹកជនលិច ក្រុងប៉េកាំងនឹងផ្តល់ពូជស្រូវនិងពូជគ្រាប់ធញ្ញជាតិជាដើម ដើម្បីឲ្យប្រជាជនអាចមានលទ្ធភាពប្រកបរបរកសិកម្មឡើងវិញក្រោយទឹកស្រក។ បើតាមការវាយតម្លៃជារួម ក្រុងប៉េកាំងនឹងចំណាយលុយប្រហែលជា ៣សែនដុល្លារអាមេរិកសម្រាប់គម្រោងសង្គ្រោះជំហានដំបូងនេះ៕
© រក្សាសិទ្ធិដោយ thmeythmey.com