អន្តរជាតិ
នយោបាយអន្តរជាតិ
លោក ប្រាយុទ្ធ ប្រកាសបន្តតំណែងនាយករដ្ឋមន្ត្រី បើរដ្ឋធម្មនុញថ្មីមិនមានការគាំទ្រ ![](https://image.thmeythmey.com/pictures/2015/08/05/582015171227prayuth.jpg)
×![]()
លោកនាយករដ្ឋមន្ត្រីថៃ ប្រាយុទ្ធ ចាន់អូចា ប្រកាសលោកនឹងបន្តតំណែងជានាយករដ្ឋមន្ត្រីដដែល ប្រសិនបើរដ្ឋធម្មនុញ្ញថ្មីមិនអាចបញ្ចប់។ សេចក្តីប្រកាសនេះ ធ្វើឡើងខណៈពេលដំណើរនៃការធ្វើ រដ្ឋធម្មនុញ្ញថ្មី ហាក់ដូចជាមិនមានពន្លឺ និង កំពុងប្រឈមនឹងភាពចម្រូងចម្រាសជាច្រើន។
សូមស្ដាប់ពត៌មានលម្អិត៖
ក្រោយពីព្រះមហាក្សត្រតែងតាំងជានាយករដ្ឋមន្ត្រី លោកឧត្តមសេនីយ៍ប្រាយុទ្ធ ចាន់អូចា បានសន្យា បញ្ចប់នូវភាពជាប់គាំងនៃនយោបាយថៃ និង ស្តារលទ្ធិប្រជាធិបតេយ្យឡើងវិញ។ ក្នុងនោះ លោក ប្រាយុទ្ធ បានបង្កើតគណៈកម្មាធិការដើម្បីធ្វើការកែប្រែរដ្ឋធម្មនុញ្ញលើមាត្រាមួយចំនួនដើម្បីជាយន្តការ មួយអាចជួយដោះស្រាយបញ្ហានយោបាយពេលជាប់គាំង និង ដើម្បីជាជំហានមួយឈានទៅដល់ការបោះឆ្នោតជាសកលផងដែរ ។
ថ្វីត្បិតសេចក្តីព្រាងរដ្ឋធម្មនុញ្ញថ្មីត្រូវបានបញ្ចប់ ភាពចម្រោងចម្រាស់មិនត្រូវបានបញ្ចប់ជាមួយគ្នា នោះទេ ពោលគឺបទបញ្ញត្តិនៅក្នុងសេចក្តីព្រាងរដ្ឋធម្មនុញ្ញ បានបង្កើតបញ្ហាជាថ្មី។ កត្តានេះហើយ បានជំរុញឲ្យរដ្ឋាភិបាលថៃត្រូវពន្យាពេលនៃការបោះឆ្នោតជាសកលជាច្រើនលើកមកហើយ។
ជុំវិញនេះ មានរិះគន់មិនពេញចិត្តជាច្រើនពីសំណាក់ប្រជាជន និង គាំទ្រលទ្ធិប្រជាធិបតេយ្យ។ នោះ ក៏ព្រោះតែ គេចាត់ទុកនេះ គឺជាចេតនារបស់លោកប្រយុទ្ធដើម្បីក្រាញអំណាច និង បន្តរបបយោធា ហើយរបបគ្រប់គ្រងនេះ ពិតជាប៉ះពាល់ដល់ការលូតលាស់របស់សេដ្ឋកិច្ចជាតិ។
យ៉ាងណាក៏ដោយ យោងតាមការដកស្រង់សម្តីរបស់លោកប្រាយុទ្ធក្នុង The Nation លោកនាយករដ្ឋ មន្ត្រីប្រាយុទ្ធ បានបញ្ជាក់ថា លោកបានត្រៀមខ្លួនរួចរាល់ហើយសម្រាប់ផ្ទេរតំណែងទៅឲ្យនាយករដ្ឋ មន្ត្រីថ្មី ក៏ប៉ុន្តែ លោកគ្មានជម្រើសអ្វីក្រៅពីនៅក្នុងតំណែងនេះទេ ប្រសិនបើរដ្ឋធម្មនុញ្ញថ្មី នៅតែមិនទាន់ទទួលបានការគាំទ្រ។ បន្ថែមពីនេះ លោកនាយករដ្ឋមន្ត្រី ក៏បានស្នើឲ្យគណបក្សនយោបាយ ក៏ដូចជាប្រជាជនគាំទ្រ និង ការពារតំណែងរបស់លោកផងដែរ។
សូមបញ្ជាក់ផងដែរ បទបញ្ញត្តិចម្រូងចម្រាស ដែលធ្វើឲ្យជាប់គាំងនៃដំណើរការធ្វើរដ្ឋធម្មនុញ្ញថ្មី ជាប់ទាក់ទងជាមួយ នាយករដ្ឋមន្ត្រីអាចឡើងកាន់តំណែងមិនចាំបាច់កើតឡើងពីការបោះឆ្នោត និង ការតែងតាំងសមាជិកព្រឹទ្ធសភា ហើយដោយសារបញ្ហានេះ លោកប្រាយុទ្ធ បានពន្យាពេល ការបោះឆ្នោតពីឆ្នាំ ២០១៦ ទៅ២០១៧ ឬអាចយូរជាងនេះ៕
Tag:
ប្រាយុទ្ធ ចាន់អូចា
នាយករដ្ឋមន្ត្រីថៃ
© រក្សាសិទ្ធិដោយ thmeythmey.com