អន្តរជាតិ
វេទិកាមេគង្គក្រោមត្រៀមបង្កើនសមត្ថភាពដោះស្រាយបញ្ហាប្រែប្រួលអាកាសធាតុ ![](https://image.thmeythmey.com/pictures/2015/08/05/lower-mekong.jpg)
×![]()
កិច្ចប្រជុំថ្នាក់រដ្ឋមន្ត្រីស្តីីពីគំនិតផ្តួចផ្តើមមេគង្គក្រោមលើកទី៨ បិទបញ្ចប់ទៅប្រកបដោយផ្លែផ្កាដោយមានការឯកភាពគ្នាលើផែនការសកម្មភាព រយៈពេល ៥ឆ្នាំពីឆ្នាំ ២០១៦ ដល់ឆ្នាំ២០២០ ។ កិច្ចប្រជុំនេះធ្វើឡើងនៅក្នុងទីក្រុងកូឡាឡាំពួ ប្រទេសម៉ាឡេស៊ី ដោយមានរដ្ឋមន្ត្រីប្រទេសប្រទេសជាប់ដងទន្លេមេគង្គក្រោមដូចជាកម្ពុជា វៀតណាម ថៃ មីយ៉ាន់ម៉ា និងឡាវ ដោយរួមជាមួយរដ្ឋមន្ត្រីការបរទេសសហរដ្ឋអាមេរិកផងដែរ។ បណ្តារដ្ឋមន្ត្រីទាំងអស់ឯកភាពគ្នាថានឹងបន្តបង្កើនការសហប្រតិបត្តិការលើវិស័យស្នូលមួយចំនួនមានដូចជា សុខាភិបាល ការគ្រប់គ្រងធនធានទឹក សន្តិសុខថាមពល បរិស្ថាន ហេដ្ឋារចនាសម្ព័ន្ធ និងសន្តិសុខស្បៀងអាហារ ក៏ដូចជាសមភាពភេទផងដែរ ដែលវានឹងជំរុញឲ្យមានការអភិវឌ្ឍន៍ប្រកបដោយនិរន្តរភាពនៅអនុតំបន់ទន្លេមេគង្គ។ ក្រៅពីនេះបណ្តារដ្ឋជាប់ដងទន្លេមេគង្គបន្តស្នើឲ្យ សហរដ្ឋអាមេរិកតំណាងដោយរដ្ឋមន្ត្រីការបរទេស ចន ឃឺរី បន្តជួយបង្កើនការចែករំលែកបច្ចេកវិទ្យា និងបច្ចេកទេស ជួយពួកគេអាចដោះស្រាយបញ្ហាប្រឈមផ្នែកបរិស្ថាន ជាពិសេសការបម្រែបម្រួលអាកាសធាតុ ។
សូមស្តាប់ការបកស្រាយរបស់លោក សៅ ផលនិស្ស័យ៖
ប្រទេសម៉ាឡេស៊ីធ្វើជាម្ចាស់ផ្ទះរៀបចំ កិច្ចប្រជុំថ្នាក់រដ្ឋមន្ត្រីវេទិកាគំនិតផ្តួចផ្តើមមេគង្គក្រោមលើកទី៨នៅថ្ងៃពុធនេះ។ គេឃើញមានវត្តមានបណ្តារដ្ឋមន្ត្រីការបរទេសរដ្ឋជាប់ដងទន្លេមេគង្គមាន កម្ពុជា វៀតណាម ថៃ ឡាវ និងមីយ៉ាន់ម៉ា រួមជាមួយរដ្ឋមន្ត្រីការបរទេសអាមេរិកលោក ចន ឃឺរីផងដែរ។ កិច្ចប្រជុំគំនិតផ្តួចផ្តើមទន្លេមេគង្គក្រោមនេះ ជាវេទិកាថ្នាក់ខ្ពស់មួយដែលផ្តោតលើការពង្រឹងកិច្ចសហប្រតិបត្តិការរវាងបណ្តារដ្ឋជាប់ដងទន្លេមេគង្គ ជាមួយសហរដ្ឋអាមេរិកផ្តោតវិស័យសំខាន់ជាច្រើនដែលក្នុងនោះរួមមានវិស័យបរិស្ថាន សុខាភិបាល អប់រំ និងការអភិវឌ្ឍន៍ហេដ្ឋារចនាសម្ព័នរូបវ័ន្តក្នុងតំបន់។
សូមរំលឹកបន្តិចថា គំនិតផ្តួចផ្តើមមេគង្គក្រោម ត្រូវបានគេឯកភាពគ្នាបង្កើតឡើងក្នុងកិច្ចប្រជុំរវាងអតីតរដ្ឋមន្ត្រីការបរទេសអាមេរិកលោកស្រី ហ៊ីឡារី គ្លីនតុន និងរដ្ឋមន្ត្រីការបរទេសកម្ពុជា ឡាវ ថៃ និងវៀតណាម នៅថ្ងៃ ២៣ កក្កដា ឆ្នាំ២០០៩ នៅភូកេត ប្រទេសថៃ។ ហើយនៅក្នុងឆ្នាំ ២០១០ ទើបរដ្ឋាភិបាលមីយ៉ាន់ម៉ាសម្រេចចូលរួមជាសមាជិកនៃគំនិតផ្តួចផ្តើមមេគង្គក្រោមនេះដែរ។ ដោយសារទន្លេមេគង្គជាអាយុជីវិតប្រជាជនដែលរស់ជាប់ដងទន្លេ ការគ្រប់គ្រងធនធានទឹក និងថែរក្សាឲ្យបាននូវជីវចម្រុះជាអ្វីដែលប្រទេសអស់ត្រូវយកចិត្តទុកដាក់និងពង្រឹងកិច្ចសហប្រតិបត្តិការ។
យោងតាមសុន្ទរកថារដ្ឋមន្ត្រីការបរទេសអាមេរិកចុះផ្សាយក្រសួងការបរទេសថ្ងៃនេះ អ្វីដែលគួរឲ្យចាប់អារម្មណ៍មុនបើកកិច្ចប្រជុំ រដ្ឋមន្ត្រីការបរទេសអាមេរិកជាប្រធាននៃកិច្ចប្រជុំផងនោះ បានឆ្លៀតឱកាសនិយាយលេងសើចពីឈើច្រត់ដែលលោកកំពុងប្រើប្រាស់ក្រោយពេលលោកដួលកង់បាក់ជើងនៅទីក្រុងប៉ារីសប្រទេសបារាំង។ លោកបញ្ជាក់ថា លោកធ្លាប់ប្រើប្រាស់ឈើច្រត់ដដែលនេះចំនួនបីដងរួចមកហើយ ហើយឈើច្រត់នេះជារបស់ប្រធានាធិបតី ចន កេណ្ណឺឌី ។
ត្រលប់មកវិញ ក្នុងកិច្ចប្រជុំតំណាងប្រទេសដែលចូលរួមបានជជែកពិភាក្សាគ្នាលើសមិទ្ធផលដែលសម្រេចបានកន្លងមក និងឆ្លៀតឱកាសពិភាក្សាគ្នាលើគោលដៅចម្បងផ្សេងទៀតដែលត្រូវសម្រេចឲ្យបានក្នុងរយៈពេលប៉ុន្មានឆ្នាំទៅមុខទៀត ដោយប្រមុខការទូតអាមេរិកជាប្រធាននៃកិច្ចប្រជុំនេះដែរ។ ក្នុងសុន្ទរកថា លោក ឃឺរី បានកោតសរសើរប្រទេសជាសមាជិកដែលបានខិតខំប្រឹងប្រែងសម្រេចបាននូវសមិទ្ធផលយ៉ាងច្រើនកន្លងមក ជាពិសេសគោលដៅដែលភាគីបានកំណត់កន្លងមក។ មន្ត្រីជាន់ខ្ពស់ក្រុងវ៉ាស៊ីនតោនខាងលើបានឆ្លៀតឳកាសលើកឡើងពីការចូលរួមរបស់រដ្ឋាភិបាលក្រុងវ៉ាស៊ីនតោនក្នុងការជួយជ្រោមជ្រែងបណ្តារដ្ឋជាប់ដងទន្លេមេគង្គផងដែរតាមការដាក់ទុនវិនិយោគលើវិស័យស្នូលជាច្រើន។ យោងតាមសុន្ទរកថារបស់លោក ឃឺរី ចាប់តាំងពីបង្កើតវេទិការនេះឡើយ សហរដ្ឋអាមេរិកបានជួយដាក់ទុនវិនិយោគច្រើនជាង ១០០លានដុល្លារអាមេរិក។ ទុនវិនិយោគនេះ ប្រើប្រាស់ដើម្បីគាំទ្រឲ្យមានការហ្វឹកហ្វឺន បំពាក់បំប៉នសមត្ថភាព បង្កើតវេទិការសន្ទនារវាងអ្នកបង្កើតគោលនយោបាយ ផ្លាស់ប្តូរបទពិសោធន៍ មតិយោបល់រវាងប្រជាជននិងអ្នកជំនាញ និង បង្កើតអំណាចដល់ប្រជាជនដោយកសារជួយកសាងសមត្ថភាពក្នុងការគ្រប់គ្រងធនធាននិងដោះស្រាយបញ្ហាប្រឈមការអភិវឌ្ឍន៍ ក្នុងគោលដៅជំរុញឲ្យមានការអភិវឌ្ឍន៍ប្រកបដោយនិរន្តរភាព។ ប្រទេសដែលជាសមាជិកសុទ្ធតែទទួលបានផលប្រយោជន៍ច្រើនពីវេទិកានេះ។
ក្នុងអំឡុងពេលប្រជុំភាគីវៀតណាមដែលតំណាងដោយឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេស Pham Binh Minh បានស្នើទៅសមភាគីអាមេរិកឲ្យបង្កើនការវិនិយោគក្នុងការគាំទ្របណ្តារដ្ឋមេគង្គក្នុងការសម្របខ្លួននិងដោះស្រាយបញ្ហាប្រឈមបម្រែបម្រួលអាកាសធាតុ។ ការចែករំលែកបច្ចេកវិទ្យា និងបច្ចេកទេសជាវិធីសាស្ត្រចម្បងមួយដែលអាចបង្កើនសមត្ថភាពរដ្ឋជាប់ដងទន្លេមេគង្គក្នុងការដោះស្រាយបញ្ហាបរិស្ថាននិងសម្របខ្លួនឆ្លើយតការប្រែប្រួលអាកាសធាតុសកល។ ប្រទេសភាគច្រើននៅតំបន់មេគង្គកំពុងប្រឈមផលប៉ះពាល់ដែលបង្កមកពីកាប្រែប្រួលអាកាសធាតុសាកល ដែលក្នុងនោះមានប្រទេសខ្លះប្រឈមគ្រោះរាំងស្ងួរមិនអាចធ្វើស្រែចម្ការបាន ឯខ្លះទៀតប្រឈមគ្រោះមហន្តរាយទឹកជំនន់ជាដើម។ តាមពិតទៅ សមិទ្ធផលកន្លងមកជារឿងចាស់ ប៉ុន្តែបញ្ហាថ្មីច្រើនទៀតដែលបណ្តាភាគីពាក់ព័ន្ធកំពុងព្យាយាមដោះស្រាយ។ នោះគឺការដោះស្រាយបញ្ហាបរិស្ថានរក្សាឲ្យបានប្រព័ន្ធអេកូឡូស៊ី និងលើកកម្ពស់ការសាងសង់ហេដ្ឋារចនាសម្ព័ន្ធតំបន់តែម្តង។
ក្រៅពីស្នើឱ្យរដ្ឋាភិបាលអាមេរិកផ្តោតលើការបង្កើនការវិនិយោគលើបច្ចេកវិទ្យាដោះស្រាយបញ្ហាបរិស្ថាន រដ្ឋមន្ត្រីការបរទេសវៀតណាមក៏បានអំពាវនាវឲ្យរដ្ឋសមាជិកទាំងអស់កំណត់ផែនការសម្រាប់រយៈពេលប្រាំឆ្នាំទៅមុខដោយផ្តោតលើការកសាងហេដ្ឋារចនាសម្ព័ន្ធឆ្លាតនិងមានគុណភាពខ្ពស់ នៅក្នុងតំបន់វិញម្តង។ លើសពីនេះទៅទៀត លោកក៏ជំរុញឲ្យក្រុងវ៉ាស៊ីនតោន គាំទ្រគណកម្មការមេគង្គអន្តរជាតិដើម្បីបង្កើនសមត្ថភាពស្រាវជ្រាវ បច្ចេកទេស និងសកម្មភាពពាក់ព័ន្ធផ្សេងទៀតដើម្បីនិរន្តរភាព អនុតំបន់ទន្លេមេគង្គ។ បិទបញ្ចប់កិច្ចប្រជុំ រដ្ឋសមាជិកបានសម្រេចឯកភាពគ្នាលើផែនការសកម្មភាពរយៈពេលប្រាំឆ្នាំ ២០១៦ដល់ ២០២០ និងចេញសេចក្តីថ្លែងការណ៍រួមគ្នាផងដែរ៕
© រក្សាសិទ្ធិដោយ thmeythmey.com