អន្តរជាតិ
នយោបាយអន្តរជាតិ
ម៉ាឡេស៊ីអះអាងថាបំណែកស្លាបយន្តហោះរកឃើញនៅកោះបារាំងពិតជារបស់យន្តហោះបូអ៊ីងMH370 ![](https://image.thmeythmey.com/pictures/2015/08/06/68201592911mh370.jpg)
×![]()
នៅថ្ងៃពុធម្សិលមិញ នាយករដ្ឋមន្ត្រីម៉ាឡេស៊ីបានប្រកាសថា បំណែកយន្តហោះដែលគេរកឃើញនៅកោះRéunion ប្រទេសបារាំងនោះ ពិតជាបំណែកស្លាបយន្តហោះក្រុមហ៊ុនម៉ាឡេស៊ី ជើងហោះហើរMH370 ដែលបានបាត់ខ្លួន ជាមួយមនុស្ស២៣៩នាក់ កាលពីខែមិនា ឆ្នាំ២០១៤ ប្រាកដមែន។ ផ្ទុយទៅវិញ ក្រុមជំនាញបារាំងបានសំដែងការប្រុងប្រយ័ត្ននៅឡើយ ចំពោះការសន្និដ្ឋានបែបនេះ។
ក្រុមជំនាញបារាំងនៅប្រុងប្រយ័ត្នចំពោះការសន្និដ្ឋានលើអត្តសញ្ញាណរបស់បំណែកយន្តហោះដែលគេរកឃើញនៅកោះRéunion។ ក្រុមជំនាញបារាំងមិនចង់ពោលពាក្យថា វាជាបំណែកយន្តហោះបូអ៊ីង១០០ភាគរយទេ។ អ្នកជំនាញបារាំងគ្រាន់តែប្រាប់ថា ពិតជារបស់យន្តហោះបូអ៊ីង៧៧៧ ដោយសារតែលក្ខណៈបច្ចេកទេសនិងឯកសារពិសេសផ្តល់ដោយក្រុមហ៊ុនម៉ាឡេស៊ីប៉ុណ្ណោះ។
ឯកសារបច្ចេកទេសនេះ អាចអោយក្រុមជំនាញពិនិត្យឃើញថា បំណែកនេះពិតជាស្រដៀងគ្នាទៅនឹងស្លាបយន្តហោះបូអ៊ីង៧៧៧ ជើងហោះហើរ MH370។ ក្រុមជំនាញបារាំងបន្ថែមទៀតថា នៅព្រឹកថ្ងៃព្រហស្បតិ៍៦សីហានេះ នឹងមានការពិនិត្យវិភាគវាបន្ថែមទៀត ដើម្បីគូសបញ្ជាក់បន្ថែមទៀតពីការសន្និដ្ឋាននេះ។
អាជ្ញាធរម៉ាឡេស៊ីអះអាងតាំងពីថ្ងៃអាទិត្យម្ល៉េះថា បំណែកយន្តហោះជារបស់បូអ៊ីង៧៧៧។ គិតតាំងពីប្រភេទបូអ៊ីង៧៧៧ដាក់ដំណើរការពីឆ្នាំ១៩៩៥មក មានតែបូអ៊ីង២គ្រឿងប៉ុណ្ណោះ ដែលបង្កគ្រោះថ្នាក់ដល់អាយុជីវិតមនុស្ស។ ទី១គឺ បូអ៊ីងជើងហោះហើររបស់Asiana Airlines ដែលបានបើកបុកទំនប់មួយ នៅពេលចុះចតនៅSan Francisco នៅថ្ងៃ៦ កក្កដា ឆ្នាំ២០១៣។ កាលនោះ យុវជនចិន៣នាក់បានស្លាប់បាត់បង់ជីវិត។ ទី២ គឺបូអ៊ីងរបស់ម៉ាឡេស៊ីអ៊ែរឡាញជើងហោះហើរMH17 ដែលត្រូវបានគេបាញ់ទំលាក់នៅតំបន់ជម្លោះភាគខាងកើតអ៊ុយក្រែន កាលពីថ្ងៃ១៧កក្កដា ឆ្នាំ២០១៤។ មនុស្សទាំង២៩៨នាក់ត្រូវស្លាប់ទាំងអស់។
ឥឡូវនេះ គេកំពុងចោទសួររកមូលហេតុនៃគ្រោះថ្នាក់យន្តហោះជើងហោះហើរ MH370នេះ។ តើវាបានជួបគ្រោះថ្នាក់ក្នុងពេលកំពុងហោះហើរ រឺក៏ពេលធ្លាក់មក? បំណែកដែលរកឃើញនៅកោះបារាំងមានទំហំ២ម៉ែត្រការ៉េប៉ុណ្ណោះ។ អ្នកស្រាវជ្រាវមួយចំនួនគិតថា ប្រភេទនិងអាយុគ្រំលៀសដែលតោងជាប់បំណែកយន្តហោះនេះ អាចអោយគេសន្និដ្ឋានដឹងពីរយៈពេលដែលបំណែកយន្តហោះស្ថិតក្នុងទឹកសមុទ្រ ដឹងពីសីតុណ្ហភាពទឹក និងដឹងថា តើបំណែកនេះចេញមកពីទិសណា៕
© រក្សាសិទ្ធិដោយ thmeythmey.com