អន្តរជាតិ
នយោបាយអន្តរជាតិ
រុស្ស៊ីគ្មានផែនការបញ្ជូនទ័ពទៅច្បាំងកម្ចាត់ក្រុមរដ្ឋឥស្លាមនៅស៊ីរីឡើយ ![](https://image.thmeythmey.com/pictures/2015/08/06/putine_syria.jpg)
×![]()
អ្នកនាំពាក្យប្រធានាធិបតីរុស្ស៊ីលោក Dmitry Peskov បានអះអាងថា រុស្ស៊ីគ្មានផែនការបញ្ជូនកងទ័ពរបស់ខ្លួនទៅច្បាំងជាមួយក្រុមរដ្ឋឥស្លាមនៅក្នុងប្រទេស៊ីរីឡើយ។ ការលើកឡើងនេះកើតមានឡើងក្រោយពេលដែលមានព័ត៌មានថា រុស្ស៊ីបញ្ជូនទ័ពទៅជួយរដ្ឋាភិបាលលោក បាសា អាល់អាសាដដើម្បីកម្ចាត់ក្រុមរដ្ឋឥស្លាមនៅពេលខាងមុខ។ មកទល់ពេលនេះរដ្ឋាភិបាលស៊ីរីមិនបានសុំឲ្យរុស្ស៊ីជួយច្បាំងខ្លួននៅឡើយទេ។
លោក មុំ ពិទូរ្យ លម្អិតព័ត៌មាននេះ
រុស្ស៊ីគ្មានផែនការបញ្ជូនកងទ័ពទៅកាន់ប្រទេសស៊ីរីដើម្បីច្បាំងជាមួយក្រុមរដ្ឋឥស្លាមដែលកំពុងអុកឡុកប្រទេសស៊ីរីនិងប៉ងផ្តួលរំលំរដ្ឋាភិបាលបច្ចុប្បន្ននោះឡើយ។ នេះជាការលើកឡើងរបស់លេខាធិការទទួលបន្ទុកកិច្ចការព័ត៌មានរបស់ប្រធានាធិបតីលោក Dmitry Peskov។
ការលើកឡើងនេះជាការឆ្លើយតបនឹងសំណួរបស់អ្នកសារព័ត៌មាន ដែលដាក់ការសង្ស័យថារុស្ស៊ីកំពុងរៀបចំកងទ័ពដើម្បីជួយគាំទ្ររដ្ឋាភិបាលក្រុងដាម៉ាសប្រឆាំងក្រុមរដ្ឋឥស្លាម។ មន្ត្រីជំនិតលោក វ្ល៉ាឌីមៀ ពូទីន រូបនេះបានសង្កត់ធ្ងន់ដែរថា រុស្ស៊ីគ្មានផែនការបញ្ជូនទ័ពទៅស៊ីរីឡើយ ព្រោះថា មកទល់ពេលនេះលោក អាសាដ មិនបានស្នើសុំឲ្យរដ្ឋាភិបាលរុស្ស៊ីជួយខ្លួននោះទេ។
យ៉ាងណាក៏ដោយ ក្រុមអ្នកកាសែតដាក់ការសង្ស័យ និងចោទសួរមន្ត្រីជាន់ខ្ពស់រដ្ឋាភិបាលរុស្ស៊ី ដោយសារតែឧត្តមសេនីយ៍យោធាជើងអាកាសរុស្ស៊ីលោក Vladimir Shamanov បញ្ជាក់ថាកងកម្លាំងរបស់លោកចង់ជួយកងទ័ពស៊ីរី ដើម្បីប្រយុទ្ធប្រឆាំងក្រុមសកម្មប្រយុទ្ធរដ្ឋឥស្លាមដែលកំពុងវាយដណ្តើមទឹកដីនៅស៊ីរី និងបណ្តាក្រុមភេរវជនផ្សេងទៀតផងដែរ។ លោកបានអធិប្បាយថា ប្រសិនបើករណីដែលមានបញ្ជាពីរដ្ឋាភិបាល កងទ័ពរបស់លោកនឹងចេញប្រតិបត្តិការដើម្បីជួយសហការជាមួយកងទ័ពស៊ីរីភ្លាមៗតែម្តង។
ទាក់ទិនបញ្ហានេះ លេខាធិការព័ត៌មានរបស់ប្រធានាធិបតី Dmitry Peskov ក៏បានលួចបង្ហើបផងដែរ បើទោះជាបច្ចុប្បន្នគ្មានការសម្រេចចិត្តជាផ្លូវការនៅឡើយក៏ដោយ កងទ័ពប្រយុទ្ធរបស់រុស្ស៊ីបច្ចុប្បន្នត្រៀមខ្លួនរួចជាស្រេចហើយ រង់ចាំតែបទបញ្ជារបស់មេបញ្ជាការកងទ័ពកំពូល លោក វ្ល៉ាឌីមៀ ពូទីន តែប៉ុណ្ណោះ។
គេរំពឹងថា រដ្ឋាភិបាលលោក អាសាដ នឹងអាចស្នើសុំទៅកាន់លោក ពូទីន ផ្ទាល់នៅពេលខាងមុខ ប្រសិនបើកងទ័ពលោកមិនអាចបន្តទ្រាំទ្រក្នុងការប្រយុទ្ធជាមួយក្រុមរដ្ឋឥស្លាមទៀតនោះ។ រុស្ស៊ីនឹងមិនបោះបង់របបដឹកនាំក្រុងដាម៉ាសឡើយ ទោះជាក្នុងកាលៈទេសៈណាក៏ដោយ។
សូមបញ្ជាក់ផងថា សហរដ្ឋអាមេរិក បានដឹកនាំរដ្ឋអារ៉ាប់ដែលជាផ្នែកនៃក្រុមសម្ព័ន្ធអន្តរជាតិ បើកការវាយប្រហារតាមផ្លូវអាកាសដើម្បីកម្ចាត់ក្រុមរដ្ឋឥស្លាមនៅទឹកដីស៊ីរី ។ ការប្រើប្រាស់យន្តហោះទម្លាក់គ្រប់នៅស៊ីរី គ្មានការយល់ព្រមជាមុនពីរដ្ឋាភិបាលក្រុងដាម៉ាសឡើយ ដែលវារំលោភអធិបតេយ្យស៊ីរី៕
© រក្សាសិទ្ធិដោយ thmeythmey.com