ជាតិ
NGO ស្នើក្រសួងអប់រំរៀបចំកន្លែងស្នាក់នៅដល់បេក្ខជនប្រឡងបាក់ឌុប មកពីជនបទ
×![]()
ភ្នំពេញ៖ អង្គការក្រៅរដ្ឋាភិបាលអំពាវនាវក្រសួងអប់រំ យុវជន និងកីឡា រៀបចំកន្លែងស្នាក់នៅរយៈពេលខ្លីដល់បេក្ខជនប្រឡងបាក់ឌុប និងទប់ស្កាត់ការដំឡើងថ្លៃសេវាកម្មស្នាក់នៅ អំឡុងពេលបេក្ខជនប្រឡងបាក់ឌុបនៅទូទាំងប្រទេស។ យ៉ាងណា អ្នកនាំពាក្យក្រសួងថា ក្រសួងមិនមានលទ្ធភាពរៀបចំកន្លែងស្នាក់នៅនោះទេ លោកអំពាវនាវម្ចាស់សេវាកម្មទាំងអស់ គួរកុំដំឡើងថ្លៃសេវា។
នាយកប្រតិបត្តិសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិក លោក សន ជ័យ ពិនិត្យឃើញថា កាលពីសម័យប្រឡងបាក់ឌុបឆ្នាំ ២០១៤ ម្ចាស់ផ្ទះសំណាក់ ឬសណ្ឋាគារ បានឆ្លៀតដំឡើងថ្លៃសេវាស្នាក់នៅអំឡុងពេលបេក្ខជនប្រឡងមកពីជនបទស្នាក់នៅ។ លោកនិយាយថា ទង្វើនេះ បង្កផលប៉ះពាល់ធ្ងន់ធ្ងរដល់ជីវភាពរបស់បេក្ខជន ដោយលោកអះអាងថា ពួកគេភាគច្រើន ជាសិស្សកសិករក្រីក្រមកពីតាមទីជនបទ។
ដំណោះស្រាយបញ្ហានេះ ដើម្បីរួមចំណែកកាត់បន្ថយការចំណាយបេក្ខជន តំណាងអង្គការសង្គមស៊ីវិល លោក សន ជ័យ ស្នើដល់អាជ្ញាធរមានសមត្ថកិច្ចចាត់វិធានការ ផ្នែករដ្ឋបាល ទប់ស្កាត់ការដំឡើងថ្លៃ ស្នាក់នៅតាមផ្ទះសំណាក់ ឬសណ្ឋាគារនានានៅ តាមទីរួមខេត្ត។ ជាងនេះទៀត លោកស្នើក្រសួងអប់រំ គួររៀបចំផ្តល់កន្លែងស្នាក់នៅរយៈពេលខ្លីដល់បេក្ខជនមកពីជនបទ ដើម្បីរួមចំណែកកាត់បន្ថយភាពក្រីក្ររបស់បេក្ខជន។
ឆ្លើយតបនឹងបញ្ហានេះ អ្នកនាំពាក្យក្រសួងអប់រំ យុវជន និងកីឡាលោក រស់ សាលីន ប្រាប់ថា បញ្ហានេះកន្លងមក ក្រសួងអប់រំបានសិក្សារកដំណោះស្រាយដែរ តែលោកថា ក្រសួងពុំមាន លទ្ធិភាពរៀបចំកន្លែងស្នាក់នៅបាននោះទេ។ លោកថា៖«កន្លងមក យើងបានពិភាក្សាពិនិត្យ មើលអគារសិក្សានៅទំនេរធ្វើជាកន្លែងស្នាក់នៅដល់បេក្ខជនដែរ តែអគារទាំងនោះ ពុំមានអគ្គិសនី និងធានាសុវត្ថិភាពគ្រប់គ្រាន់ដល់បេក្ខជន ដូចនេះយើងសម្រេចមិនយកគោល ការណ៍បែបនេះទេ»។ យ៉ាងណា លោកអំពាវនាវម្ចាស់សេវាកម្មស្នាក់នៅទូទាំង កុំដំឡើងថ្លៃ សេវាកម្ម ដើម្បីចូលរួមការកាត់បន្ថយការចំណាយរបស់បេក្ខជន។
គួរបញ្ជាក់ថា សម័យប្រឡងបាក់ឌុបឆ្នាំនេះ នឹងប្រព្រឹត្តឡើនៅថ្ងៃទី២៤ ខែសីហា ឆ្នាំ២០១។ ទាំងថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម បេក្ខជនចុះឈ្មោះប្រឡងសរុប ៨៨៤៨៨នាក់ គិតទាំងបេក្ខជនប្រឡងធ្លាក់ឆ្នាំមុន ប៉ុន្តែតួលេខនេះ តិចជាងឆ្នាំ២០១៤ ដែលមានដល់ទៅ ៩១.៣៧៣នាក់។ មណ្ឌលប្រឡងសរុបមាន ១៤៩ ចែកជា ៣,៥៧៦បន្ទប់ នៅរាជធានីខេត្តទាំង ២៥ ៕
Tag:
បាក់ឌុប
សន ជ័យ
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
7 ថ្ងៃ
