ជាតិ
×![]()
ដោយ: ថ្មីៗ
ភ្នំពេញ៖ ប្រធានគណៈកម្មការចំពោះកិច្ចដែលមានភារកិច្ចទទួល ផ្ទៀងផ្ទាត់ និងប្រគល់ផែនទី លោក ហោ ណាំហុង បានសរសេរស្នើសុំតំណាងព្រឹទ្ធសភា និងរដ្ឋសភា គណបក្សនយោបាយ តំណាងរាជបណ្ឌិត្យសភា ព្រមទាំងឧត្តមក្រុមប្រឹក្សានៃអង្គចៅក្រម និងក្រុមប្រឹក្សាធម្មនុញ្ញា ដើម្បីចូលរួមពិនិត្យ ផ្ទៀងផ្ទាត់ និងធ្វើជាសាក្សី នៅក្នុងការពិនិត្យផែនទីដែលយកមកពីអង្គការសហប្រជាជាតិ។ ទាំងតំណាងព្រឹទ្ធសភា តំណាងរដ្ឋសភា ទាំងតំណាងគណបក្ស នយោបាយ និងរាជបណ្ឌិត្យសភា បានបង្ហាញសមាសភាពរបស់ខ្លួនដែលត្រូវចូលរួមក្នុងពិធីប្រគល់ និងពិនិត្យផែនទីដើមខ្ចីពី UN នៅព្រឹកថ្ងៃទី២០ សីហា។
សមាសភាពកម្ពុជាទាំងអស់នឹងត្រូវចូលរួមទទួលផែនទីពីដៃរបស់ មន្ត្រីអង្គការសហប្រជាជាតិ ២រូបដែលនឹងនាំផែនទីមកដល់កម្ពុជានៅយប់ ម៉ោង១០ថ្ងៃទី១៨សីហានេះ ហើយនឹងប្រគល់ជូនគណៈកម្មការចំពោះកិច្ចតំណាងរដ្ឋាភិបាលកម្ពុជានៅ ព្រឹកម៉ោង៩នៃថ្ងៃទី២០សីហា នៅវិមានសន្តិភាព។
តំណាងព្រឹទ្ធសភាពីគណបក្សប្រជាជនកម្ពុជា ៣រូបនិងគណបក្ស សម រង្ស៊ី ៣រូប៖
បើតាមការបញ្ជាក់របស់អ្នកនាំពាក្យព្រឹទ្ធសភា លោក ម៉ម ប៊ុននាង សមាសភាពតំណាង ព្រឹទ្ធសភាពីគណបក្សប្រជាជនកម្ពុជា ៣រូប រួមមាន ១ លោក ជា ជេដ្ឋ ប្រធាន គណៈកម្មការទី២ ព្រឹទ្ធសភា, ២ លោក គង់ សារាជ ប្រធានគណៈកម្មការទី៩ និង៣ លោក ម៉ម ប៊ុននាង អនុប្រធានគណៈកម្មការទី១០ និងជាអ្នកនាំពាក្យព្រឹទ្ធសភា។
ដោយឡែក តំណាងព្រឹទ្ធសភាគណបក្ស សម រង្ស៊ី លោក គង់ គាំ បញ្ជាក់សមាសភាព ៣រូប រួមមាន៖ ១ លោក ទាវ វណ្ណុល អនុប្រធានគណៈកម្មការទី៧, ២ លោក សេង ម៉ារឌី លេខាធិការ គណៈកម្មការទី១០ និង៣ លោក ចេប គីមអ៊ាង លេខាធិការគណៈកម្មការទី ១ព្រឹទ្ធសភា ។
តំណាងរដ្ឋសភា ពីគណបក្សប្រជាជនកម្ពុជា ៣រូបនិងគណបក្សសង្គ្រោះជាតិ ៣រូប៖
បើតាមការបញ្ជាក់របស់លោក ឈាង វុន សមាសភាពតំណាងរដ្ឋសភា មកពីគណបក្ស ប្រជាជនកម្ពុជា ៣រូប រួមមាន ១ លោក ប៉ែន បញ្ញា ប្រធានគណៈកម្មការទី៦ រដ្ឋសភា, ២ លោក ជៀម យៀប ប្រធានគណៈកម្មកាទី២ និងលោក ឈាង វុន ប្រធានគណៈកម្មការទី៥ ។
រីឯសមាសភាពតំណាងរដ្ឋសភាពីគណបក្សសង្គ្រោះជាតិ ៣រូប លោក អេង ឆៃអ៊ាង បញ្ជាក់ រួមមាន ១ លោក ងឹម ញេង សមាជិកគណៈកម្មការទី១ រដ្ឋសភា, ២ លោក អ៊ូ ច័ន្ទរ័ត្ន សមាជិកគណៈកម្មការទី១០ និង លោក គឹមសួរ ភីរិទ្ធ សមាជិកគណៈកម្មការទី៦ រដ្ឋសភា។
តំណាងគណបក្សនយោបាយ ១៥រូប ក្នុងនោះ គណបក្សប្រជាជនកម្ពុជា ៥រូប, គណបក្សសង្គ្រោះជាតិ ៥ រូប និងគណបក្ស ហ្វ៊ុន ស៊ិនប៉ិច ៥រូប៖
បើតាមការបញ្ជាក់របស់លោក សុខ ឥសាន សមាសភាពរបស់គណបក្សប្រជាជនកម្ពុជា ៥រូប រួមមាន ១ លោក សោម សឿន, ២ លោក សុខ ឥសាន, ៣ លោក កែ ប៊ុនឃាង, ៤ លោក ហង្ស ថុល, ៥ លោក ឱក គឹមហាន។
លោក អេង ឆៃអ៊ាង បញ្ជាក់ពីសមាសភាពទាំង៥រូបពីគណបក្សសង្គ្រោះជាតិដែរ រួមមាន ១ លោក អ៊ូ ច័ន្ទឬទ្ធិ, ២ លោក សេង មារឌី, ៣ លោក ឡុង រី, ៤ លោក កែវ ភារម្យ, ៥ លោក លឹម គឹមយ៉ា។
រីឯតំណាងគណបក្សហ្វ៊ុនស៊ិនប៉ិច លោក ញឹក ប៊ុនឆៃ ក៏បានប្រាប់ផងដែរ រួមមាន ១ លោក យូ ហុកគ្រី, ២ លោក អ៊ឹង ទាស៊ាម, ៣ លោក នុត សុខុម, ៤ លោក សាយ ហាក់ , ៥ លោក ផាន់ សិទ្ធី។
ដោយឡែក សមាសភាពពីរាជបណ្ឌិតសភា បើតាមលោក ឯម សុវណ្ណារ៉ា រួមមាន៖១ លោក សុខ ទូច, ២ លោក គិន ភា, ៣ លោក យ៉ង់ ពៅ, ៤ លោក ហ៊ាន ស្រស់។
ក្រៅពីនេះ គណៈកម្មការចំពោះកិច្ចក៏បានអញ្ជើញតំណាង ២រូបពីក្រុមប្រឹក្សាធម្មនុញ្ញ និង២រូបក្រុមប្រឹក្សានៃអង្គចៅក្រមដែរ។ ប្រមុខរដ្ឋាភិបាលកម្ពុជាបានសម្រេចបង្កើតគណៈកម្មការចំពោះកិច្ចមួយ ដើម្បីទទួល ប្រគល់ និងផ្ទៀងផ្ទាត់ផែនទី ដោយមានលោក ហោ ណាំហុង រដ្ឋមន្ត្រីការបរទេសខ្មែរគឺជាប្រធាន បន្ទាប់ពីបានទទួលព័ត៌មានជាផ្លូវការពីអគ្គលេខាធិការអង្គការសហប្រជាជាតិ លោក បាន គីមូន អំពីការយល់ព្រមឲ្យកម្ពុជាខ្ចីផែនទី។ លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន និងលោក អ៊ឹម ឈុនលឹម ទេសរដ្ឋមន្ត្រី រដ្ឋមន្ត្រីក្រសួងដែនដីនគរូបនីយកម្ម គឺជាអនុប្រធានគណៈកម្មការចំពោះកិច្ចនេះ៕
Tag:
ផែនទី
ព្រំដែន
© រក្សាសិទ្ធិដោយ thmeythmey.com
