ក្រសួងប្រៃសណីយ៍៖គ្មានប្រព័ន្ធថតសំឡេង និងតាមដានស្ដាប់ការសន្ទនាសាធារណៈជនឡើយ

ជាតិ

ក្រសួងប្រៃសណីយ៍៖គ្មានប្រព័ន្ធថតសំឡេង និងតាមដានស្ដាប់ការសន្ទនាសាធារណៈជនឡើយ

28, Aug 2015 , 3:57 pm

រូបភាព

ដោយ: ធឿន បញ្ញាឬទិ្ធ

ក្រសួងប្រៃសណីយ៍ និងទូរគមនាគមន៍ បដិសេធថា មិនមានប្រព័ន្ធទិន្នន័យ ឬប្រព័ន្ធឌីជីថលសម្រាប់ថតសំឡេង និងតាមដានស្ដាប់ការសន្ទនាតាមទូរសព្ទរបស់សាធារណៈជនឡើយ។ ការបដិសេធនេះ គឺបំភ្លឺតបនឹងករណីបទល្មើសតាមប្រព័ន្ធទូរគមនាគមន៍ ប្រព្រឹត្តដោយជនជាតិកូរ៉េ ១០នាក់ ដែលបានជ្រៀតចូលក្នុងគេហទំព័រ និងទិន្នន័យក្រសួង។ នេះបើតាមសេចក្ដីបំភ្លឺរបស់ក្រសួងប្រៃសណីយ៍ ចុះថ្ងៃទី២៧ សីហា។

សេចក្ដីបំភ្លឺ បញ្ជាក់ថា ជនជាតិកូរ៉េទាំង១០នាក់បានជ្រៀតចូលក្នុងគេហទំព័រ និងប្រព័ន្ធទិន្នន័យរបស់ក្រសួង ដើម្បីលួចស្ដាប់ការសន្ទនាគ្នាតាមទូរស័ព្ទរបស់សាធារណជន គឺជាការលើកឡើងដែលគ្មានការពិតនោះទេ។ ហើយក្នុងរយៈពេលកន្លងទៅ គេហទំព័រផ្លូវការរបស់ក្រសួងប្រៃសណីយ៍ ពុំធ្លាប់ត្រូវបានជ្រៀតចូល ឬវាយប្រហារពីមជ្ឈដ្ឋានណាមួយឡើយ។

សេចក្ដីបំភ្លឺ បានអះអាងដូច្នេះថា៖ «ក្រសួងប្រៃសណីយ៍ និងទូរគមនាគមន៍គ្មានទេនូវរបស់ដែលហៅថា ប្រព័ន្ធទិន្នន័យ ឬប្រព័ន្ធឌីជីថលសម្រាប់ថតសំឡេង និងតាមដានស្ដាប់ការសន្ទនាគ្នាតាមទូរស័ព្ទរបស់សាធារណជន ហើយសកម្មភាពដូចបានលើកឡើងខាងលើនេះ មិនមែនជាអាណត្តិរបស់ក្រសួងឡើយ»។

ជនជាតិកូរ៉េទាំង១០នាក់ ដែលត្រូវតុលាការដំបូងសម្រេចកាត់ទោសឲ្យជាប់ពន្ធនាគារម្នាក់មួយឆ្នាំ ពីបទ ចូលរួមនៅក្រុម ឬឃុបឃិតនៃការប្រព្រឹត្តបទល្មើស កាលពីថ្ងៃទី ២៦ សីហា ឆ្នាំ២០១៥ នោះ គឺពួកគេត្រូវបានសមត្ថកិច្ចបានតាមស្រាវជ្រាវយ៉ាងហ្មត់ចត់ កាលពីថ្ងៃទី ១២ វិច្ឆិកា ឆ្នាំ២០១៤កន្លងមក ដោយសង្ស័យថា ពួកគេប្រមូលផ្ដុំគ្នាប្រព្រឹត្តបទល្មើសតាមប្រព័ន្ធបច្ចេកវិទ្យាគមនាគមន៍ និងព័ត៌មាន។ ហើយសមត្ថកិច្ចអាជ្ញាធរក៏បានរឹបអូសវត្ថុតាងមួយចំនួនសម្រាប់ប្រព្រឹត្តបទល្មើស។នេះបើតាមសេចក្តីបំភ្លឺបន្ថែមរបស់ក្រសួងប្រៃសណីយ៍ខាងលើ៕