ជាតិ
សេដ្ឋកិច្ច
អ្នកជំនាញបរទេសថា តម្លៃកៅស៊ូក្រែបនឹងកើនឡើងវិញនៅឆ្នាំ២០១៦
× ភ្នំពេញ៖ អ្នកវិនិយោគលើដំណាំកៅស៊ូ និងអ្នកដាំកៅស៊ូជាលក្ខណៈគ្រួសារបាក់ទឹកចិត្តអស់រយៈពេលជាច្រើនឆ្នាំមកហើយ ពីព្រោះ តម្លៃកៅស៊ូបានធ្លាក់ថ្លៃយ៉ាងគំហុកតាំងពីឆ្នាំ២០១០មក។ ប៉ុន្តែតម្លៃកៅស៊ូអាចនឹងងើបឡើងវិញនៅឆ្នាំ២០១៦ខាងមុខនេះ។ នេះបើយោងតាមការព្យាករណ៍របស់អ្នកជំនាញកៅស៊ូជនជាតិបរទេស។
លោក ហ្វ៊ីលីព ម៉ូណាំង អ្នកជំនាញកៅស៊ូជនជាតិបារាំងដែលមានវត្តមាននៅក្នុងប្រទេសកម្ពុជាជាង២០ឆ្នាំមកហើយនោះ បានឲ្យដឹងថា តម្លៃកៅស៊ូក្រែបអាចនឹងងើបឡើងវិញនៅពាក់កណ្តាលឆ្នាំ២០១៦ខាងមុខនេះ។
ការព្យាករណ៍របស់លោក ហ្វ៊ីលីព បានធ្វើឡើងបន្ទាប់ពីកៅស៊ូក្រែបបានធ្លាក់ថ្លៃតាំពីឆ្នាំ២០១០មកម្ល៉េះ។ កាលពីឆ្នាំពី២០១០ កៅស៊ូក្រែបមានតម្លៃ៣៩០០ដុល្លារក្នុង១តោន។ រីឯបច្ចុប្បន្ននេះ កៅស៊ូក្រែបមានតម្លៃ១២៣០ដុល្លារក្នុង១តោននៅលើទីផ្សាអន្តរជាតិ។ នៅលើទីផ្សារនៃប្រទេសកម្ពុជាវិញ កៅស៊ូក្រែបត្រូវបានគេទិញក្នុងតម្លៃ៧២០ដុល្លារក្នុង១តោនពីអ្នកដាំ។
កៅស៊ូក្រែបធ្លាក់ថ្លៃបណ្តាលមកពីមូលហេតុមួយចំនួន ក្នុងនោះ មានដូចជា៖ សេដ្ឋកិច្ចនៃប្រទេសចិនមិនល្អ, ថ្លៃទំនិញ និងទីផ្សារអន្តរជាតិស្ថិតក្នុងកម្រិតថមថយនៅឡើយ។
សូមបញ្ជាក់ថា កាលពីឆ្នាំ ២០១៤ កន្លងមក ប្រទេសកម្ពុជា មានផ្ទៃដីដាំកៅស៊ូចំនួន ៣៥០ ០០០ ហិកតា។ ទិន្នផលកៅស៊ូក្រែបកាលពីឆ្នាំ២០១៤កន្លងមក គឺ ៩៥ ០០០ តោន៕
© រក្សាសិទ្ធិដោយ thmeythmey.com